អន្តរជាតិ
ក្មេងស្រីហ្វីលីពីនម្នាក់ចុចទិញអាហារតាម App ដដែលៗ រហូតដល់មានអ្នកដឹកជញ្ជូន៤២នាក់ទៅដល់ផ្ទះ
× ក្មេងស្រីហ្វីលីពីនម្នាក់រស់នៅក្រុង Cebu បានបញ្ជាទិញម្ហូបអាហារតាម App ដើម្បីញ៉ាំជាអាហារថ្ងៃត្រង់ជាមួយជីដូនរបស់ខ្លួន។ ដោយសារអ៊ីនធ័រណិតយឺត នាងបានចុចកុម្ម៉ង់ម្តងហើយម្តងទៀត ហើយទីបំផុតអ្នកជញ្ជូនដល់ទៅ៤២នាក់ បានយកអាហារទៅដល់ផ្ទះរបស់នាង។
កាលពីថ្ងៃទី២៥ ខែវិច្ឆិកា អ្នកស្រុកនៅតំបន់ Mabolo ក្រុង Cebu មានការភ្ញាក់ផ្អើលយ៉ាងខ្លាំងដោយអ្នកដឹកជញ្ជូនម្ហូបដល់ទៅជាង៤០នាក់បានទៅដល់បន្តបន្ទាប់គ្នានៅមុខផ្ទះរបស់គ្រួសារមួយ។
ក្រោយសាកសួរ ម៉ូតូនីមួយៗសុទ្ធតែដឹកសាច់មាន់បំពងពីរប្រអប់ដូចៗគ្នា ដោយអ្នកបញ្ជាទិញគឺជាក្មេងស្រីម្នាក់។ គណនីហ្វេសប៊ុកឈ្មោះ Dann Kayne Suarez ដែលជាអ្នកជិតខាងបានរៀបរាប់ថា តាមពិតក្មេងស្រីនោះ ចង់ទិញតែសាច់មាន់បំពងពីរប្រអប់ប៉ុណ្ណោះ ដើម្បីញ៉ាំអាហារថ្ងៃត្រង់ជាមួយជីដូន ប៉ុន្តែអ៊ីនធ័រណិតយឺត ដោយនាងស្មានតែមានបញ្ហា ទើបបន្តចុចកុម្ម៉ង់សារជាថ្មីម្តងហើយម្តងទៀត។
កុមារី បានស្រែកយំ ដោយអះអាងថា នាងគ្មានបំណងធ្វើបែបនេះនោះឡើយ ព្រោះនាងកុម្ម៉ង់ទិញមាន់បំពងតែក្នុងថវិកាប្រមាណ៤ដុល្លារអាមេរិកប៉ុណ្ណោះ ប៉ុន្តែដោយសារបច្ចេកទេស នាងត្រូវចំណាយរហូតដល់ទៅជាង១៦៥ដុល្លារ ជាចំនួនមួយដែលនាងមិនអាចដោះស្រាយទេព្រោះឪពុកម្តាយនាងទុកលុយឲ្យតែបន្តិចបន្តួចប៉ុណ្ណោះ។ នេះបើយោងតាមការផ្សាយរបស់ The Sun Star Cebu។
ទោះបីជាយ៉ាងណាក៏ដោយ លោក Suarez បានអះអាងថា អ្នកជិតខាង រួមទាំងលោកបាននាំគ្នាជួយទិញអាហារទាំងនោះ ខណៈអ្នកដឹកជញ្ជូនមួយចំនួនសុខចិត្តមិនយកលុយ ហើយចេញទៅដឹកម្ហូបឲ្យអ្នកផ្សេងទៀត៕
© រក្សាសិទ្ធិដោយ thmeythmey.com