កីឡាអន្តរជាតិ
អន្តរជាតិ
Nations League៖ អ៊ីតាលី ជួបអេស្ប៉ាញ ឯបែលហ្ស៊ិក ប៉ះបារាំង
× អ៊ីតាលីត្រូវទទួលភ្ញៀវអេស្ប៉ាញ ខណៈបែលហ្ស៊ិកជួបបារាំងនៅវគ្គ៤ក្រុមចុងក្រោយពានរង្វាន់ Nations League។ សហព័ន្ធកីឡាបាល់ទាត់អឺរ៉ុប (UEFA) ប្រកាសដូច្នេះនៅថ្ងៃទី៤ ធ្នូ ដោយអ៊ីតាលីនឹងធ្វើម្ចាស់ផ្ទះនៅខែតុលា ឆ្នាំក្រោយ។
UEFA និយាយថា ជំនួបវគ្គពាក់កណ្តាលផ្តាច់ព្រ័ត្រ នឹងធ្វើឡើងនៅកីឡដ្ឋាន San Siro ក្នុងទីក្រុង Milan នាថ្ងៃទី៦ ខែតុលា ឆ្នាំ២០២១ និងកីឡដ្ឋាន Allianz នៅទីក្រុង Turin នៅមួយថ្ងៃបន្ទាប់។ សម្រាប់ការប្រកួតវគ្គផ្តាច់ព្រ័ត្រ UEFA បានសម្រេចជ្រើសយក San Siro ដែលប្រព្រឹត្តិទៅនៅថ្ងៃទី១០ ខែតុលា ខណៈជំនួបដណ្តើមចំណាត់ថ្នាក់ទី៣ និងធ្វើនៅ Allianz ថ្ងៃដដែលនោះ។
អ៊ីតាលី ដែលឈរនៅកំពូលតារាងពូល A1 នាការប្រកួតវគ្គសន្សំពិន្ទុ Nations League ត្រូវប៉ះអេស្ប៉ាញដែលនៅកំពូលតារាងពូល A4។ នេះជាការជួបគ្នាលើកដំបូងក្នុងការប្រកួតពានអឺរ៉ុប ចាប់តាំងពីជួបគ្នាលើកចុងក្រោយក្នុងពានរង្វាន់ Euro ឆ្នាំ ២០១៦។
ដោយឡែកបែលហ្ស៊ិកបញ្ចប់ទៅក្នុចំណាត់ថ្នាក់ទី១ពូល A2 ត្រូវតតាំងជាមួយបារាំងដែលឈរលេខ១ពូល A3។ នេះក៏ជាការប៉ះគ្នារវាងក្រុមលេខ១ និងលេខ២ពិភពលោក FIFA World Ranking ផងដែរ។
ម្ចាស់ជើងឯក Nations League ឆ្នាំមុន ព័រទុយហ្គាល់បានធ្លាក់ទៅហើយ ក្រោយទទួលបានចំណាត់ថ្នាក់ទី២ ពូល A3៕
© រក្សាសិទ្ធិដោយ thmeythmey.com