ជាតិ
អ្នកចិញ្ចឹមអន្ទង់នៅស្រុកកញ្ជៀច ខេត្តព្រៃវែង ចែករំលែកបច្ចេកទេសចិញ្ចឹមក្នុងអាង
× លោក អុក សំណាង ជាអ្នកចិញ្ចឹមអន្ទង់ នៅភូមិជើងទឹក ឃុំកញ្ជ្រៀច ស្រុកកញ្ជ្រៀច ខេត្តព្រៃវែង ។ កសិករវ័យ ៤១ឆ្នាំរូបនេះ មានបទពិសោធន៍ចិញ្ចឹមអន្ទង់ច្រើនឆ្នាំមកហើយ។ ដោយមើលឃើញថា ទីផ្សារអន្ទង់មានតម្រូវការច្រើន តម្លៃសមរម្យ ប៉ុន្តែការផ្គត់ផ្គង់នៅមានកម្រិតនៅឡើយនោះ កសិកររូបនេះ រីករាយនឹងចែករំលែកបច្ចេកទេសចិញ្ចឹមអន្ទង់ឲ្យបានផលខ្ពស់ទៅកសិករផ្សេងទៀត តាមរយៈសារព័ត៌មានThmeyThmey25។
បើតាមលោក អុក សំណាង កូនអន្ទង់ដែលយកមកចិញ្ចឹម គឺអាចទិញពីអ្នកនេសាទ ឬអ្នកចិញ្ចឹមមុនៗបាន។ ចំពោះការចិញ្ចឹមអន្ទង់ ត្រូវការពេលយូរជាងចិញ្ចឹមត្រី ពោលគឺយ៉ាងតិចចាប់ពី ៦ខែឡើងទៅ ទើបធំល្មមអាចចាប់លក់បាន។អន្ទង់មានតម្លៃ ពី ៣ម៉ឺនរៀល ទៅ ៤ម៉ឺនរៀល នៅតាមតំបន់ និងរដូវនីមួយៗ។
ដើម្បីចិញ្ចឹមអន្ទង់ក្នុងអាង ទទួលបានទិន្នផលខ្ពស់ ត្រូវរៀបចំអាងឲ្យបានត្រឹមត្រូវ បើសិនអាងមានទំហំ ១ម៉ែត្រការ៉េ អាចដាក់កូនអន្ទង់ ពី ២៥០ក្បាល ទៅ ៣០០ក្បាល ឬអាង ៤ម៉ែត្រការ៉េ អាចដាក់កូនអន្ទង់ ចន្លោះ ៤០គីឡូ ទៅ៥០គីឡូក្រាម ។ ម្យ៉ាងទៀត ត្រូវគិតពីកត្តាមួយចំនួនដូចជា ដើមទុន ទឹក ចំណី ការថែទាំ និងជំងឺលើសត្វអន្ទង់។
ទឹក៖ ដោយអន្ទង់ ជាសត្វរស់នៅក្នុងទឹក ដូច្នេះបើទឹកមិនល្អ គឺមិនអាចចិញ្ចឹមបានទេ ។ ទឹកដែលល្អបំផុត គឺជាទឹកដែលបានពីប្រភពដូចជា ទន្លេ ស្ទឹង អូរ បឹង ឬត្រពាំង ព្រោះទាំងកម្រិត PH និងកម្រិតអំបិលគ្រប់គ្រាន់ សម្រាប់ការចិញ្ចឹមអន្ទង់។ យើងក៏អាចប្រើទឹកអណ្តូងបានដែរ បើទឹកនោះមិនមានជាតិពុល ដូចជា អាសេនិក ឬជាតិកំបោរជាដើម។
ប្រភពចំណី និងរបៀបដាក់ចំណី៖ យើងអាចយក ត្រីស្រស់ ឬត្រី ទើបងាប់មិនទាន់ស្អុយ ធ្វើជាចំណីអន្ទង់បាន។ អន្ទង់ជាសត្វដែលស៊ីសាច់ បើចំណីមិនគ្រប់គ្រាន់ វានឹងមិនធំធាត់ល្អនោះទេ ។ យើងអាចកិនត្រីធំ ឬកូនត្រី លាយជាមួយចំណីគ្រាប់ ដែលមានប្រូតេអ៊ីនខ្ពស់ តែត្រូវមានធាតុផ្សំពីត្រីយ៉ាងតិច ៧០ភាគរយ ។ ដោយក្នុង ១ថ្ងៃ ផ្ដល់ចំណីអន្ទង់ម្តង ( នៅពេលល្ងាច ឬពេលយប់)។ ការដាក់ចំណី មិនត្រូវដាក់ចូលក្នុងទឹក ឬក្នុងអាងចិញ្ចឹមទេ គឺត្រូវដាក់ក្នុងកញ្ច្រែង ដែលចងព្យួរប៉ប្រះផ្ទៃទឹកទុកឲ្យវាស៊ី ។ ក្រោយពេលដាក់ចំណីបានប្រហែល២ម៉ោង ត្រូវលើកកញ្ច្រែងនោះចេញ និងត្រូវសំអាតចំណីដែលធ្លាក់ទៅបាតអាងឲ្យអស់ ដើម្បីកុំឲ្យទឹកឆាប់ស្អុយ។
រូបភាពពីលោក អុក សំណាង
ការថែទាំ៖ ការចិញ្ចឹមអន្ទង់ មិនងាយស្រួលដូចចិញ្ចឹមត្រីទេ ព្រោះត្រូវការផ្លាស់ប្តូរទឹកឲ្យបានទៀងទាត់។ ត្រូវប្ដូរទឹក ២ថ្ងៃម្ដង។ ត្រូវសម្អាតស្លែចេញ ពីក្នុងអាងចិញ្ចឹម ក៏ជាការចាំបាច់ដែរ និងត្រូវសម្អាតរាល់ ១០ថ្ងៃម្ដង ដើម្បីបង្ការ កុំឲ្យកើតមានមេរោគ ចេញពីស្លែនៅក្នុងអាងចិញ្ចឹម ប៉ះពាល់ដល់សុខភាពរបស់អន្ទង់បាន ។
ជំងឺ៖ ជាទូទៅជំងឺដែលកើតមាននៅលើសត្វអន្ទង់គឺ ជំងឺហើមពោះ ដែលបណ្តាលមកពីចំណីមានមេរោគ ចំណីមានក្លិនស្អុយ។ រីឯជំងឺរលាកស្បែក វាបណ្តាលមកពីការដាច់រលាត់ស្បែក ឬសាច់របស់វាដោយសារផ្ទៃអាង មិនស្អាត មិនរលោងជាដើម៕
Tag:
កសិកម្ម
វារីវប្បកម្ម
អន្ទង់
ព្រៃវែង
© រក្សាសិទ្ធិដោយ thmeythmey.com