បន្ថែម​ពី​អ៊ីរ៉ាក់​និង​អា​ហ្វ​ហ្កា​នី​ស្ថាន លោក ត្រាំ បញ្ជា​ឲ្យ​ដកទ័ព​អាមេរិក​ចេញពី​សូ​ម៉ាលី​ទៀត​
សង្គមអន្តរជាតិ​
អន្តរជាតិ
បន្ថែម​ពី​អ៊ីរ៉ាក់​និង​អា​ហ្វ​ហ្កា​នី​ស្ថាន លោក ត្រាំ បញ្ជា​ឲ្យ​ដកទ័ព​អាមេរិក​ចេញពី​សូ​ម៉ាលី​ទៀត​
05, Dec 2020 , 9:29 pm        
រូបភាព
កងទ័ពអាមេរិកនៅសូម៉ាលី។ រូបភាពីវេបសាយទីបញ្ជាការកងទ័ពអាមេរិកប្រចាំអាហ្រ្វិក
កងទ័ពអាមេរិកនៅសូម៉ាលី។ រូបភាពីវេបសាយទីបញ្ជាការកងទ័ពអាមេរិកប្រចាំអាហ្រ្វិក
​ប្រធានាធិបតី​អាមេរិក ដូ​ណា​ល់ ត្រាំ បានចេញ​បញ្ជា​ឲ្យ​ដកទ័ព​អាមេរិក​ភាគច្រើន​ចេញពី​សូ​ម៉ាលី ទី​ដែល​ពួកគេ​ប្រយុទ្ធ​ក្រុម​ជ្រុលនិយម Al Shabab ។ នេះ​បើតាម​ការប្រកាស​របស់​មន្ទីរ​បញ្ច​កោណ​នៅ​ថ្ងៃទី​៤ ខែធ្នូ​។ សូ​ម៉ាលី ជា​គោលដៅ​ដកទ័ព​ទី​បី​របស់​អាមេរិក បន្ថែម​ពីលើ​អ៊ីរ៉ាក់ និង​អា​ហ្វ​ហ្កា​នី​ស្ថាន​ទៅតាម​អ្វីដែល​លោក ត្រាំ បកស្រាយ​ថា ជាការ​បញ្ចប់​វត្តមាន​ក្នុង​សង្គ្រាម​មិនចេះចប់​នៅ​បរទេស ដែល​មិនមាន​ប្រយោជន៍​អ្វី ក្រៅពី​ការខាតបង់​។​

 
​បន្ថែម​ពីលើ​អ៊ីរ៉ាក់ និង​អា​ហ្វ​ហ្កា​នី​ស្ថាន ប្រធានាធិបតី​ជិត​ចប់​អាណត្តិ ដូ​ណា​ល់ ត្រាំ ក៏​ចេញ​បញ្ជា​ឲ្យ​ដកទ័ព​អាមេរិក​ចេញពី​ប្រតិបត្តិការ​នៅ​សូ​ម៉ាលី​ទៀត ដែល​ជាការ​អនុវត្តតាម​សន្យា​ពេល​លោក​ឃោសនា​ក្នុងការ​បោះឆ្នោត​ប្រធានាធិបតី​ឆ្នាំ​២០១៦ ។ ដូច​ប្រទេស​មជ្ឈិមបូព៌ា​ទាំងពីរ​ដែរ អាមេរិក​នឹង​ដកទ័ព​ភាគច្រើន និង​សព្វាវុធ​ចេញពី​សូ​ម៉ាលី​ដែល​នៅតែ​រួមរឹត​ទៅដោយ​អំពើហិង្សា​បង្កដោយ​ក្រុម​ភេរ​ជន Al Shabab ។ 
 
​បើតាម​ការប្រកាស​រប​ស់​មន្ទីរ​បញ្ច​កោណ លោក​ប្រធានាធិបតី ត្រាំ បាន​បញ្ជា​ឲ្យ​ក្រសួងការពារជាតិ និង​ទីបញ្ជាការ​កងទ័ព​អាមេរិក​ប្រចាំ​អាហ្វ្រិក ឲ្យ​រើ​សព្វាវុធ និង​កងទ័ព​ភាគច្រើន​ចេញពី​សូ​ម៉ាលី​នៅត្រឹម​ដើ​ឆ្នាំ​២០២១​។ ដើម្បី​ស្រាយ​មន្ទិល​ថា អាមេរិក​ដោះដៃ​ពី​ទ្វីប​ដ៏​ធំ​នេះ ក្រសួងការពារជាតិ​អាមេរិក​សង្កត់ធ្ងន់ថា អាមេរិក មិនមែន​កំពុង​ដកខ្លួន​លែង​ចូលរួម​ពី​អាហ្វ្រិក​ឡើយ​។ 
 
«​យើង​នឹង​បន្តធ្វើ​ប្រតិបត្តិ​ការប្រឆាំង​អង្គការ​ជ្រុលនិយម​ហិង្សា​ដែល​បង្ក​ការ​គំរាម​ដល់​សន្តិសុខ​យើង ជាមួយនឹង​ការធានា​ថា នឹង​រក្សា​គុណប្រយោជន៍​យុទ្ធសាស្ត្រ​ក្នុងការ​ប្រកួតប្រជែងរ​បស់​អំណាច​។​» នេះ​ជាការ​បញ្ជាក់​របស់​មន្ទី​រ​បញ្ច​កោណ​ដែល​ផ្សាយ​ដោយ​ទីភ្នាក់ងារ​ព័ត៌មាន AFP ។ 
 
​ទីបញ្ជាការ​កងទ័ព​អាមេរិក​ប្រចាំ​អាហ្វ្រិក មាន​កងទ័ព​៧០០​នាក់​នៅ​សូ​ម៉ា​លៅ​ដែលមាន​សមាសភាព​មក​ពី​កម្លាំង​ប្រតិបត្តិការ​សន្តិសុខ និង​បុគ្គលិក​សន្តិសុខ​ឯកជន​ផង​។ ពួកគេ​ធ្វើ​ប្រតិបត្តិ​ការប្រយុទ្ធ​ក្រុម Al Shabab ផង និង​បង្វឹក​កម្លាំង​ក្នុងស្រុក​ផង​។ នៅ​សូ​ម៉ាលី ទ័ព​អាមេរិក​ធ្វើ​សកម្មភាព​តាំងពី​ដើមឆ្នាំ​២០០០​មក សំដៅ​បោសសម្អាត​ក្រុម​ជ្រុលនិយម​ដែលមាន​ទំនាក់​ទំនងជា​អង្គការ​ភេរវជន​ធំៗ​ដូចជា​ក្រុម​រដ្ឋ​ឥស្លាម និង​ក្រុម​អាល់​កៃ​ដា​ជាដើម​៕
 
 

Tag:
 អាមេរិក​
  សូ​ម៉ាលី​
  ដូ​ណា​ល់ ត្រាំ
© រក្សាសិទ្ធិដោយ thmeythmey.com