អា​ហ្ស​ង់​ទីន នឹង​យកពន្ធ​ពី​អ្នកមាន​ដើម្បី​ជួយ​អ្នកក្រ​ដែល​រងគ្រោះ​ដោយសារ​កូ​វីដ​-១៩
COVID-19
អន្តរជាតិ
អា​ហ្ស​ង់​ទីន នឹង​យកពន្ធ​ពី​អ្នកមាន​ដើម្បី​ជួយ​អ្នកក្រ​ដែល​រងគ្រោះ​ដោយសារ​កូ​វីដ​-១៩
06, Dec 2020 , 11:05 am        
រូបភាព
ស្រ្តីអាហ្សង់ទីនពាក់ម៉ាស់ក្នុងរដ្ឋធានីប៊ុយណូស៊ែ។ រូបភាព Xinhua
ស្រ្តីអាហ្សង់ទីនពាក់ម៉ាស់ក្នុងរដ្ឋធានីប៊ុយណូស៊ែ។ រូបភាព Xinhua
​ព្រឹទ្ធសភា​អា​ហ្ស​ង់​ទីន នៅ​ថ្ងៃទី​៥ ខែធ្នូ បានអនុម័ត​សេចក្ដីស្នើច្បាប់​មួយ​ដែល​នឹង​បើកផ្លូវ​ដល់​ការយកពន្ធ​ពី​អ្នកមាន​ប្រទេស ក្នុង​គោលបំណង​ប្រមូល​លុយ​ដើម្បី​ជួយ​អ្នកក្រីក្រ និង​អាជីវកម្ម​ដែល​រងគ្រោះ​ដោយសារ​ជំងឺ​កូ​វីដ​-១៩ ។ ក្រុម​បក្សប្រឆាំង​បាន​ជំទាស់​ការចេញ​ច្បាប់​បែបនេះ ប៉ុន្តែ​រដ្ឋាភិបាល​ទីក្រុង​ប៊ុ​យ​ណូ​ស៊ែ ដាក់​គោលដៅ​ប្រមូល​លុយ​ឲ្យ​បាន​ចំនួន​ជិត​៤​ពាន់​លាន​ដុល្លារ​ដើម្បី​យកទៅ​ដោះស្រាយ​ចំពោះមុខ​។​

 
​ដោយ​សំឡេង​៤២​ទល់នឹង​២៦ ព្រឹទ្ធសភា​អា​ហ្ស​ង់​ទីន បានអនុម័ត​សេចក្ដីស្នើច្បាប់​សាមគ្គីភាព និង​ការចូលរួម​ពិសេស ឬក៏​ត្រូវបាន​ហៅថា ច្បាប់​ពន្ធ​មហាសេដ្ឋី​។ នេះ​ជាការ​ផ្ដល់​ភ្លើង​បៃតង​ចុងក្រោយ​លើ​សេចក្ដីស្នើច្បាប់​នេះ ក្រោយ​រដ្ឋសភា​អា​ហ្ស​ង់​ទីន បាន​យល់ព្រម​រួចហើយ​។ 
 
​ក្រោម​ច្បាប់​ថ្មី ប្រជាជន​អា​ហ្ស​ង់​ទីន​ដែលមាន​ទ្រព្យសម្បត្តិ​លើស​២,៤៥​លាន​ដុល្លារ នឹងត្រូវ​ជាប់​កា​ត្វ​កិច្ច​ពន្ធ​យ៉ាងតិច​២​ភាគរយ ហើយ​ដែល​ត្រូវ​បង់​តែម្ដង​ប៉ុណ្ណោះ​។ រដ្ឋាភិបាល​អា​ហ្ស​ង់​ទីន ដាក់​គោលដៅ​ប្រមូល​ឲ្យ​បាន​៣,៧​ពាន់​លាន​ដុល្លារ​ដើម្បី​ប្រើប្រាស់​លើ​ការជួយ​អ្នកក្រីក្រ អាជីវកម្ម​ដែល​រង​ប៉ះពាល់​ដោយសារ​ជំងឺ​កូ​វីដ​-១៩ និង​ការចំណាយ​ផ្សេងទៀត​លើ​ការប្រយុទ្ធប្រឆាំង​ជំ​ង​នេះ ខណៈ​សេដ្ឋកិច្ច​របស់​ប្រទេស​រីកចម្រើន​ទី​បី​របស់​អាមេរិក​ឡាទីន រង​ផលប៉ះពាល់​ខ្លាំង​។ 
 
​នាយក​ទីភ្នាក់ងារ​ពន្ធ​អា​ហ្ស​ង់​ទីន លោក Mercedes Marcó del Pont លើកឡើងថា មនុស្ស​យ៉ាងហោចណាស់​១២០០០​នាក់ នឹង​ជាប់​កាតព្វកិច្ច​ក្រោម​ច្បាប់​ថ្មី​។ 
 
​ច្បាប់​ដែល​រៀបចំ​ដោយ​បក្ស​កាន់អំណាច​របស់​ប្រធានាធិបតី Alberto Fernandez រង​ការរិះគន់​ពី​សំណាក់​ក្រុមប្រឆាំង​ខ្លាំង​ដែរ​។ លោក Daniel Pelegrina ប្រធាន​អង្គការ​សង្គម​ជនបទ​អា​ហ្ស​ង់​ទីន ដែលជា​អង្គការ​ដ៏​មាន​ឥទ្ធិពល​មួយ រិះគន់ថា អ្នកសរសេរ​ច្បាប់ គឺ​លោក Carlos Heller ចង់​បង្ហាញថា ច្បាប់​នេះ​ជាការ​ចូលរួម​វិភាគទាន​របស់​អ្នកមាន តែ​ការពិត ច្បាប់​នេះ នឹង​ស្ថិតនៅ​រហូត មិនមែន​ត្រូវ​បង់​តែម្ដង​ឡើយ​។​
 
​អា​ហ្ស​ង់​ទីន មាន​អ្នក​ឆ្លង​ប្រមាណ​ជិត​១​លាន​៥​សែន​នាក់ និង​ស្លាប់​ជិត​៤​ម៉ឺន​នាក់​៕
 
 
 

Tag:
 អាមេរិក​
  កូ​វីដ​-១៩
© រក្សាសិទ្ធិដោយ thmeythmey.com