ជាតិ
រកឃើញផូស៊ីលដើមឈើប្រវែង១៧ម៉ែត្រ មានអាយុរាប់លានឆ្នាំ នៅដែនជម្រកសត្វព្រៃលំផាត់ ខេត្តរតនគិរី
រូបភាពពី ហ្វេសប៊ុក លោក លឹម វណ្ណច័ន្ទ
×![]()
ក្រុមអ្នកជំនាញនៃក្រសួងបរិស្ថាន បានរកឃើញ ផូស៊ីលដើមឈើប្រវែង១៧ម៉ែត្រ នៅចំណុចដែនជម្រកសត្វព្រៃលំផាត់ ស្រុកលំផាត់ ខេត្តរតនគិរី។ លោក លឹម វណ្ណច័ន្ទ ក្រុមការងារសិក្សាផូស៊ីល បានឱ្យដឹងថា បើតាមការសន្និដ្ឋានផូស៊ីលដើមឈើនេះ ស្ថិតក្នុងសម័យកាល Premian នៃស័កទី២ ដែលមានអាយុកាល១រយលានឆ្នាំ។ 
លោក លឹម វណ្ណច័ន្ទ ក្រុមការងារសិក្សាផូស៊ីលនៃនាយកដ្ឋានតំបន់បេតិភណ្ឌ អគ្គនាយកដ្ឋានសហគមន៍មូលដ្ឋាន នៃក្រសួងបរិស្ថាន បានប្រាប់សារព័ត៌មានThmeyThmey25 តាមទូរសព្ទថា កាលពីឆ្នាំ២០១៩ ក្រុមអ្នកជំនាញបានធ្វើកំណាយលើផូស៊ីលនេះម្ដងហើយ ហើយនៅដើមខែធ្នូឆ្នាំ២០២០នេះ ជាការធ្វើកំណាយលើកទីពីរ ដោយក្រុមអ្នកជំនាញបានប្រទះឃើញ ផូស៊ីលមានប្រវែង១៧ម៉ែត្រ មានឫស ស្លឹក និងសំបក។
«ឆ្នាំមុនយើងបានរកឃើញ ហើយយើងបានកាយលើកទី១ ឆ្នាំនេះយើងបន្តកាយកន្លែងដដែលលើកទី២ ដោយសារឆ្នាំមុនយើងធ្វើអត់ទាន់ចប់ អីចឹងយើងបន្តកំណាយម្ដងទៀត ដើម្បីសិក្សាពីដើមឈើហ្នឹង»។ នេះជាការអះអាងរបស់លោក លឹម វណ្ណច័ន្ទ ដែលបន្តថា នៅទីតាំងនេះ មានផូស៊ីលដើមឈើជាច្រើនដើម ប៉ុន្តែក្រុមជំនាញយកផូស៊ីលដើមឈើប្រវែង១៧ម៉ែត្រនេះ ជាកំណាយសាកល្បងដំបូងគេ។
គួរបញ្ជាក់ថា ក្រុមការងារសិក្សាផូស៊ីល នៃនាយកដ្ឋានតំបន់បេតិកភណ្ឌ បានចាប់ផ្ដើមប្រតិបត្តិការរបស់ខ្លួន រយៈពេល២ឆ្នាំមកហើយ ដោយកន្លងមកក្រុមមន្ត្រីជំនាញ បានរកឃើញផូស៊ីលខ្យង់ ផូស៊ីលត្រី និងសត្វផ្សេងៗទៀត៕
Tag:
ផូស៊ីល
ដើមឈើ
រតនគិរី
© រក្សាសិទ្ធិដោយ thmeythmey.com
