COVID-19
អន្តរជាតិ
កូវីដ-១៩៖ លោកឌូទើតេ ថា គ្មានរណាម្នាក់មានសុវត្ថិភាពនោះទេ បើគ្រប់គ្នាមិនត្រូវបានធានាសុវត្ថិភាពនោះ
រូបភាព Xinhua
×![]()
ប្រមុខដឹកនាំហ្វីលីពីន លោក រ៉ូឌ្រីហ្គោ ឌូទើតេ បានទទូច និងស្នើឲ្យសហគមន៍អន្តរជាតិធានាឲ្យបានភាពស្មើគ្នា និងសមធម៌រវាងបណ្តាប្រទេសរបស់ពិភពលោកក្នុងការទទួលបានវ៉ាក់សាំងការពារវីរុស Covid-19។ សម្រាប់ប្រមុខដឹកនាំហ្វីលីពីន ប្រសិនបើពិភពលោក មិនអាចធានាបានការទទួលបានការការពារនេះទេ នឹងបង្កើតជាអយុត្តិធម៌សកល ហើយពិភពលោក ក៏គ្មានសុវត្ថិភាពដូចគ្នាផងដែរ។
ចំពោះមុខមេដឹកនាំពិភពលោក លោកប្រធានាធិបតី រ៉ូឌ្រីហ្គោ ឌូទើតេ បានលើកឡើងថាប្រសិនប្រទេសកំពុងអភិវឌ្ឍន៍ ឬប្រទេសក្រីក្រ មិនត្រូវបានផ្តល់ឱកាស និងទុកដោយឡែកសម្រាប់ព្រឹត្តការណ៍ក្រោយនៃវិបត្តិរាតត្បាត Covid-19 នោះនឹងបង្កឲ្យមានភាពអយុត្តិធម៌ ដែលបញ្ហានេះ លោក បានស្នើឲ្យមានការធានាឲ្យបាននូវការទទួលវ៉ាក់សាំង Covid-19 ជាសកល។
តាមការចុះផ្សាយរបស់សារព័ត៌មាន Rappler ក្នុងសុន្ទរកថាដដែលដែលជាវេទិការបស់មហាសន្និបាតអង្គភាពអង្គការសហប្រជាជាតិ លោកប្រធានាធិបតី អះអាងថា នៅពេលប្រទេសក្រីក្រដែលរងភាពខ្លោចផ្សារដោយការមិនអាចមានលទ្ធភាពក្នុងការទទួលបានវ៉ាក់សាំង វានឹងបំផ្លាញគុណតម្លៃរបស់អង្គការសហប្រជាជាតិ ដែលត្រូវបានបង្កើតក្នុងគោលដៅបម្រើផលប្រយោជន៍មនុស្សជាតិទូទៅនោះ។
ប្រមុខដឹកនាំហ្វីលីពីន បានទទូចឲ្យសហគមន៍អន្តរជាតិមិនគួរឲ្យហេតុការណ៍នេះកើតឡើងនោះទេ។ លោក សង្កត់ធ្ងន់ មិនមាននរណាម្នាក់អាចមានសុវត្ថិភាពនោះទេ ប្រសិនមនុស្សទាំងអស់ មិនទទួលបានការការពារគ្រប់គ្នាផងនោះ។ លោក ប្រកាសថាហ្វីលីពីន នឹងជួយប្រទេសដទៃផ្សេងទៀតក្នុងការគ្រប់គ្រងវិបត្តិរាតត្បាតរបស់ពួកគេ ដោយគ្មានលក្ខខណ្ឌឡើយ។
ក្នុងនាមជាប្រទេសកំពុងអភិវឌ្ឍន៍ផងដែរនោះ លោក ប្រកាសគាំទ្រ Covax ដែលជាគំនិតផ្តួចផ្តើមមួយសម្រាប់ជួយជ្រោមជ្រែងធនធានប្រទេសកំពុងអភិវឌ្ឍន៍ និងសង្គ្រោះការផ្គត់ផ្គង់វ៉ាក់សាំងពីប្រទេសមានការអភិវឌ្ឍន៍។ ហ្វីលីពីន ក៏ជាប្រទេសមួយរបស់ពិភពលោក និងតំបន់ ដែលរងការគំរាមកំហែងខ្លាំងពី Covid-19។ យ៉ាងហោចណាស់ មានប្រជាជនហ្វីលីពីន បានឆ្លង Covid-19 ជាង៤៣ ម៉ឺនករណី និងបានបាត់បង់ជីវិតជាង ៨ពាន់ ករណីផងដែរ ៕
Tag:
ហ្វីលីពីន
Covid19
© រក្សាសិទ្ធិដោយ thmeythmey.com
