ក្រុមហ៊ុនអាមេរិក និងចិន បន្តគ្របដណ្តប់ទីផ្សាលក់អាវុធក្នុងឆ្នាំ២០១៩។ នេះបើតាមរបាយការណ៍ប្រចាំឆ្នាំរបស់វិទ្យាស្ថានស៊ុយអែត។ ជាលើកដំបូង ក្រុមហ៊ុនអាវុធមកពីមជ្ឈិមបូព៌ាបង្ហាញខ្លួន ក្នុងចំណោមក្រុមហ៊ុនកំពូលៗចំនួន២៥ ។ ការនាំចេញអាវុធក្នុងឆ្នាំ២០១៩ មានចំនួន៣៦១ពាន់លានដុល្លារ ដែលជាការកើនឡើងចំនួន៨,៥ភាគរយធៀបឆ្នាំកន្លងទៅ។
ការលក់អាវុធដោយក្រុមហ៊ុនអាមេរិក តំណាងឲ្យ៦១ភាគរយនៃការលក់អាវុធក្នុងពិភពលោកដោយក្រុមហ៊ុនកំពូលៗចំនួន២៥ ចំណែកការនាំចេញរបស់ក្រុមហ៊ុនចិន មានចំនួន១៥,៧ភាគរយ។ នេះយោងតាមរបាយការណ៍របស់វិទ្យាស្ថានអន្តរជាតិស្កុកខុលស្តីពីការស្រាវជ្រាវសន្តិភាព (SIPRI) ចេញផ្សាយថ្ងៃទី៧ ខែធ្នូ។
ទំហំនៃការលក់អាវុធដោយក្រុមហ៊ុនកំពូលៗទាំង២៥ កើនឡើងចំនួន៨,៥ភាគរយ ជាមួយទំហំសរុប៣៦១ពាន់លានដុល្លារ។ តួលេខនេះ គឺច្រើនជាង៥០ដងនៃថវិកាចំណាយលើកងរក្សាសន្តិភាពអង្គការសហប្រជាជាតិ។
«ចិន និងអាមេរិក ជាប្រទេសពីរធំបំផុតលើពិភពលោកក្នុងវិស័យជួញដូរអាវុធ»។ នេះជាការលើកឡើងរបស់លោកស្រី Lucie Beraud-Sudreau នាយកម្មវិធីចំណាយផ្នែកអាវុធ និងយោធារបស់ SIPRI ដោយបន្ថែមថា ក្រុមហ៊ុនអាមេរិកចំនួន៦ និងចិនចំនួន៣ ស្ថិតក្នុងចំណោមក្រុមហ៊ុនកំពូលៗទាំង១០។
ក្រុមហ៊ុនអាមេរិកដូចជា Lockheed Martin, Boeing, Northrop Grumman, Raytheon និង General Dynamics បន្តស្ថិតក្នុងលំដាប់កំពូលទាំង៥ រីឯក្រុមហ៊ុន AVIC, CETC និង Norinco របស់ចិនស្ថិតក្នុងលំដាប់ទី៦ ៨ និង៩។ ក្រុមហ៊ុនបច្ចេកវិទ្យា L3Harris របស់អាមេរិកស្ថិតក្នុងលំដាប់ទី១០ ខណៈលំដាប់ទី៧ បានទៅលើក្រុមហ៊ុន BAE System របស់អង់គ្លេស។
តាមពិតទៅ អាមេរិក គ្រប់គ្រងទីផ្សាលក់អាវុធជាច្រើនឆ្នាំមកហើយ ប៉ុន្តែការនាំចេញរបស់ក្រុមហ៊ុនចិន ក៏មានកំណើន៥ភាគរយផងដែរ។ កំណើនរបស់ចិន កើតទន្ទឹមគ្នាទៅនឹងការអនុវត្តផែនការទំនើបកម្ម និងកំណែទម្រង់កងទ័ពរំដោះប្រជាជនចិនតាំងតែពីឆ្នាំ២០១៥មក។
លំដាប់ថ្នាក់របស់ក្រុមហ៊ុនអឺរ៉ុប រប៉ាត់រប៉ាយxjlH ប៉ុន្តែបើបញ្ចូលក្រុមហ៊ុនអឺរ៉ុបចូលគ្នា គេនឹងទទួលបានក្រុមហ៊ុនមួយដែលមានទំហំស្មើក្រុមហ៊ុនអាមេរិក និងចិន។ ជាក់ស្តែង ក្រុមហ៊ុន Airbus របស់អឺរ៉ុបស្ថិតក្នុងលំដាប់ថ្នាក់ទី១៣ ទីឯ Thales របស់បារាំងស្ថិតក្នុងលំដាប់ថ្នាក់ទី១៤។ របាយការណ៍ SIPRI កត់សម្គាល់ថា ក្រុមហ៊ុន Dassault របស់បារាំងហក់ពីលំដាប់ថ្នាក់ទី៣៨ មកទី១៧ ដោយសារការនាំចេញយន្តហោះចម្បាំង Rafale។ លោកស្រី Beraud-Sudreau លើកឡើងថា ក្រុមហ៊ុនអឺរ៉ុបមានលក្ខណៈអន្តរជាតិច្រើនជាងក្រុមហ៊ុនប្រទេសផ្សេងៗ។
សម្រាប់ឆ្នាំ២០១៩ ក្រុមហ៊ុន EDGE របស់អេមីរ៉ាតអារ៉ាប់រួមឈរនៅលំដាប់ថ្នាក់ទី២២ ដែលជាលើកទីមួយក្រុមហ៊ុនមកពីមជ្ឈិមបូព៌ាមានមុខក្នុងក្រុមហ៊ុនកំពូលៗទាំង២៥។ ក្រុមហ៊ុន EDGE ជាការច្របាច់បញ្ចូលគ្នារបស់ក្រុមហ៊ុនក្នុងស្រុករបស់អេមីរ៉ាតអារ៉ាប់រួមចំនួន២៥។ លោក Pieter Wezeman អ្នកស្រាវជ្រាវរបស់ SIPRI អះអាង វត្តមានរបស់ EDGE បង្ហាញថា កញ្ចប់ថវិកាយោធាខ្ពស់ រួមជាមួយនឹងបំណងមានឯករាជ្យភាពពីបរទេសលើការផ្គត់ផ្គង់អាវុធ ជាហេតុនាំមានការកើនឡើងចំនួនក្រុមហ៊ុនផលិតអាវុធនៅមជ្ឈិមបូព៌ា៕