COVID-19
អន្តរជាតិ
វៀតណាម នឹងសាកល្បងវ៉ាក់សាំងកូវីដ-១៩ ក្នុងស្រុកលើមនុស្សនៅថ្ងៃទី១០ ធ្នូ
អ្នកស្រាវជ្រាវវ៉ាក់សាំង យកសំណាកពីសត្វកណ្តុរ ដើម្បីស្រាវជ្រាវលើវ៉ាក់សាំងប្រឆាំងកូវីដ-១៩។ រូបភាព៖ Vabiotech
×![]()
ដោយ: ធៀន ភារិន្ទ
ក្រុមហ៊ុនឱសថវៀតណាម Nanogen នឹងសាកល្បងវ៉ាក់សាំងប្រឆាំងកូវីដ-១៩ នៅដំណាក់កាលមួយ នៅថ្ងៃទី១០ ខែធ្នូ ខាងមុខ។ នេះបើតាមការចុះផ្សាយរបស់កាសែត Vietnam Express នៅថ្ងៃទី៦ ខែធ្នូ។ 
វៀតណាម មានវ៉ាក់សាំងប្រឆាំងកូវីដ-១៩ ចំនួន ៤ ដែលអភិវឌ្ឍក្នុងស្រុកផ្ទាល់ដូចជាវ៉ាក់សាំងរបស់ក្រុមហ៊ុន Nanogen, ក្រុមហ៊ុន Vabiotech, ក្រុមហ៊ុន Polyvac និងវ៉ាក់សាំងរបស់វិទ្យាស្ថានវ៉ាក់សាំង និងវេជ្ជសាស្ត្រ (IVAC)។ ក្នុងចំណោមបេក្ខភាពវ៉ាក់សាំងទាំង ៤នេះ មានតែវ៉ាក់សាំងរបស់ក្រុមហ៊ុន Nanogen ប៉ុណ្ណោះ ដែលឈានដល់ដំណាក់កាលសាកល្បងលើមនុស្ស។
តាមការបញ្ជាក់របស់រដ្ឋមន្ត្រីសុខាភិបាលវៀតណាម លោក Nguyen Thanh Long ក្រុមហ៊ុនថ្នាំពេទ្យ Nanogen នឹងសហការជាមួយ បណ្ឌិត្យសភាវេជ្ជសាស្ត្រយោធាវៀតណាម ដើម្បីចាប់ផ្តើមរើសអ្នកស្ម័គ្រចិត្តក្នុងការសាកល្បងវ៉ាក់សាំងនេះ។ បន្ទាប់ពីរើសរួច អ្នកទាំងនោះ នឹងត្រូវចាក់វ៉ាក់សាំងជាលើកដំបូង នៅពេលខ្លីខាងមុខតែម្ដង។ ក្នុងការសាកល្បងលើមនុស្សលើកដំបូងនេះ វៀតណាម នឹងរើសមនុស្សប្រមាណ ២០នាក់ប៉ុណ្ណោះ ដែលមានអាយុចាប់ពី ១៨ឆ្នាំ រហូតដល់ ៤០ឆ្នាំ។
«យើងត្រូវតែសកម្ម និងរកឲ្យឃើញវ៉ាក់សាំងកូវីដ-១៩ ឲ្យបានឆាប់បំផុត»។ លោករដ្ឋមន្ត្រីសុខាភិបាលវៀតណាម បានលើកឡើងបែបនេះ ដោយបន្ថែមថា ក្រសួងសុខាភិបាល នឹងពន្លឿននីតិវិធីនេះ តាមរយៈការសម្រួលលក្ខខណៈមួយចំនួនសម្រាប់ស្ថាប័នផលិតវ៉ាក់សាំងដូចជាការកាត់បន្ថយនីតិវិធីរដ្ឋបាល ការពន្លឿនការចុះបញ្ជី និងការផ្តល់អាជ្ញាប័ណ្ណលើវ៉ាក់សាំងជាដើម។
បេក្ខភាពវ៉ាក់សាំងផ្សេងទៀតរបស់វៀតណាម ដូចជា វ៉ាក់សាំងរបស់វិទ្យាស្ថានIVAC និងវ៉ាក់សាំងរបស់ក្រុមហ៊ុន Vabiotech បានបញ្ចប់នីតិវិធីលើការស្រាវជ្រាវ និងពិសោធន៍លើសត្វរួចហើយ និងកំពុងស្ថិតនៅក្នុងការវាយតម្លៃលើសុវត្ថិភាព និងភាពស៊ាំ។ លើសពីនេះ ក្រសួងសុខាភិបាលវៀតណាម ក៏បានស្នើឲ្យក្រុមហ៊ុនផលិតថ្នាំវៀតណាម Polyvac សហការជាមួយរុស្ស៊ី និងចិន លើវ៉ាក់សាំងផងដែរ។
គិតមកត្រឹមថ្ងៃទី៦ ខែធ្នូ វៀតណាម មានករណីឆ្លងកូវីដ-១៩ សរុបចំនួន ១៣៦៥ករណី ខណៈអ្នកស្លាប់មានចំនួន ៣៥នាក់ និងអ្នកជាសះស្បើយមានចំនួន ១២២០នាក់។ ករណីផ្ទុះនៅក្នុងទីក្រុងហូជីមិញ ដែលកើតចេញពីអ្នកបម្រើការលើយន្តហោះម្នាក់ក្នុងពេលថ្មីៗនេះ ត្រូវបានអាជ្ញាធរ អះអាងថា ស្ថិតនៅក្រោមការគ្រប់គ្រងបានហើយ។ ការគ្រប់គ្រងបាននេះ កើតចេញពីវិធានការដ៏តឹងរ៉ឺងរបស់រដ្ឋាភិបាលដូចជា ការផ្អាកការហោះហើរចូលមកក្នុងស្រុកបណ្តោះអាសន្ន និងការព្រមានពីការបញ្ឈប់ក្រុមហ៊ុនអាកាសចរណ៍ជាដើម៕
Tag:
វៀតណាម
កូវីដ-១៩
© រក្សាសិទ្ធិដោយ thmeythmey.com
