ជាតិ
សង្គមជាតិ
សម្តេច ស ខេង ហាមមន្ត្រីទៅធ្វើការក្នុងបរិវេណទីស្តីការក្រសួងមហាផ្ទៃជាបណ្តោះអាសន្ន
× ភ្នំពេញ៖ សម្តេច ស ខេង រដ្ឋមន្ត្រីក្រសួងមហាផ្ទៃ បានផ្អាកមន្ត្រីរបស់ខ្លួនមិនឱ្យមកចូលបំពេញការងារប្រចាំថ្ងៃជាបណ្តោះអាសន្ន នៅក្នុងបរិវេណទីស្តីការក្រសួងមហាផ្ទៃ ចាប់ពីថ្ងៃទី៧ធ្នូនេះតទៅ។ ការផ្អាកមន្ត្រីនៅក្នុងក្រសួងមហាផ្ទៃមិនឱ្យមកបំពេញការងារនៅក្នុងបរិវេណទីស្តីការនោះ គឺមានទាំងថ្នាក់ដឹក មន្ត្រីរាជការស៊ីវិល មន្ត្រីនគរបាលជាតិ មន្ត្រីពន្ធនាគារ នៅតាមអគ្គនាយកដ្ឋាន និងអង្គភាពនានា។
បើតាមលោក ខៀវ សុភ័គ អ្នកនាំពាក្យក្រសួងមហាផ្ទៃ ការផ្អាកមន្ត្រីមិនឱ្យមកបំពេញការងារជាបណ្តោះអាសន្ននេះ គឺធ្វើឡើងតែនៅក្នុងបរិវេណទីស្តីការក្រសួងប៉ុណ្ណោះ ដោយតម្រូវឱ្យមន្ត្រីពាក់ព័ន្ធទាំងនោះ ត្រូវបំពេញការងារប្រចាំថ្ងៃពីចម្ងាយ ឬពីផ្ទះ(ធ្វើការងារតាមប្រព័ន្ធអ៊ីនធឺណែត) ខណៈទីកន្លែងការងារផ្សេងៗនៃក្រសួងមហាផ្ទៃ អនុញ្ញាតឱ្យមន្ត្រីមកបំពេញការងារប្រចាំថ្ងៃដដែល។
ការផ្អាកមន្ត្រីមិនឱ្យមកបំពេញការងារនៅក្នុងបរិវេណទីស្តីក្រសួងមហាផ្ទៃជាបណ្តោះអាសន្ននេះ គឺដើម្បីឱ្យមន្ត្រីជំនាញរបស់ក្រសួងសុខាភិបាលមកបាញ់ថ្នាំសម្លាប់មេរោគកូវីដ-១៩។ នេះជាការលើកឡើងរបស់លោក ខៀវ សុភ័គ ដោយបន្តប្រាប់សារព័ត៌មានថ្មីៗថា មន្ត្រីទាំងអស់ដែលស្ថិតក្នុងអំឡុងពេលនៃការផ្អាកការចេញ-ចូលមកបំពេញការងារនៅទីស្តីការក្រសួងជាបណ្តោះអាសន្ននេះ គឺត្រូវធ្វើចត្តាឡីស័កក្នុងរយៈពេល១៤ថ្ងៃឱ្យបានត្រឹមត្រូវបំផុតតាមការណែនាំរបស់ក្រសួងសុខាភិបាល ដើម្បីទប់ស្កាត់ការចម្លងជំងឺកូវីដ-១៩ នៅក្នុងសហគមន៍។
យ៉ាងណាមិញ លោក ខៀវ សុភ័គ មិនទាន់អាចបញ្ជាក់បានឡើយ នូវពេលវេលាណាមួយច្បាស់លាស់ ក្នុងការអនុញ្ញាតឱ្យមន្ត្រីនានាមកបំពេញការងារជាធម្មតាឡើងវិញ នៅក្នុងបរិវេណទីស្តីការក្រសួងមហាផ្ទៃនេះ។
នាថ្ងៃទី៧ធ្នូនេះ នៅក្នុងបរិវេណក្រសួងមហាផ្ទៃ មានមនុស្សយ៉ាងច្រើនកកកុញទៅតម្រង់ជួរគ្នា ដើម្បីធ្វើតេស្តរកមេរោគកូវីដ-១៩ លើកទី២ ។ អ្វីដែលជាកង្វល់នោះ គឺក្រុមអ្នកតម្រង់ជួរ មិនបានរក្សាគម្លាតសុវត្ថិភាពត្រឹមត្រូវនោះឡើយ ដែលកំពុងបង្កក្តីបារម្ភយ៉ាងធំក្នុងការចម្លងមេរោគនេះយ៉ាងឆាប់រហ័ស ពីបុគ្គលម្នាក់ទៅម្នាក់។
គិតត្រឹមថ្ងៃទី៧ធ្នូនេះ អ្នកដែលឆ្លងជំងឺកូវីដ-១៩នៅនឹងព្រឹត្តិការណ៍សហគមន៍២៨វិច្ឆិកា បានកើនឡើងដល់៣២នាក់ ខណៈការធ្វើតេស្តមានចំនួន១១,៣០៥សំណាកហើយ។ ដោយឡែក សម្រាប់នៅកម្ពុជាទាំងមូល មានអ្នកឆ្លងកូវីដ-១៩ ឡើងដល់៣៤៨នាក់។ ក្នុងនោះមាន៣០៦នាក់ ជាសះស្បើយ និងអ្នកជំងឺមាន៤២នាក់ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត និងមណ្ឌលសុខភាពចាក់អង្រែ៕
Tag:
COVID-19
សម្តច ស ខេង
© រក្សាសិទ្ធិដោយ thmeythmey.com