កីឡាអន្តរជាតិ
អន្តរជាតិ
សមាជិកព្រឹទ្ធសភាអាហ្សង់ទីនស្នើដាក់រូប Maradona លើក្រដាសប្រាក់ជាតិ
× សមាជិកព្រឹទ្ធសភាអាហ្សង់ទីនចង់ដាក់រូបលោក Diego Maradona ក្នុងក្រដាសប្រាក់ជាតិរបស់ខ្លួន ដើម្បីរម្លឹកដល់វីរភាពកីឡាករបាល់ទាត់រូបនេះ។ គម្រោងនេះ បានដាក់ស្នើទៅសភានៅថ្ងៃទី៧ ខែធ្នូ ដើម្បីឲ្យវីរបុរសបាល់ទាត់អាហ្សង់ទីនស្ថិតក្នុងក្រដាសប្រាក់ ១០០០ ប៉េសូ។
អ្នកស្រី Norma Durango សមាជិកព្រឹទ្ធសភាអាហ្សង់ទីន បាននិយាយថា ក្រដាសប្រាក់១០០០ ប៉េសូ ដែលមានតម្លៃប្រហែល ១២,២៧ ដុល្លារអាមេរិក នឹងត្រូវដាក់រូបមុខរបស់ Maradona។ រូបភាពដែលត្រូវយកមកប្រើប្រាស់ គឺអំឡុងពេល Maradona ល្បីល្បាញបំផុតក្នុងអាជីពកីឡាបាល់ទាត់។ នេះបើតាមការផ្សាយរបស់ទីភ្នាក់ងារព័ត៌មាន Reuters។
ភាពល្បីល្បាញ និងការទទួលបានការចាប់អារម្មណ៍ខ្លាំងបំផុត កើតឡើងនៅពេល Maradona រកបានពីរគ្រាប់ម្នាក់ឯង ក្នុងការប្រកួតវគ្គ៨ក្រុមចុងក្រោយ World Cup ឆ្នាំ១៩៨៦ ទល់នឹងអង់គ្លេស និងជួយអាហ្សង់ទីនលើកពានពិភពលោកនៅឆ្នាំនោះ។
យ៉ាងណាក៏ដោយ Maradona ក៏ត្រូវបានចារឈ្មោះមិនល្អក្នុងប្រវត្តិសាស្ត្របាល់ទាត់ផងដែរក្នុងព្រឹតិ្តការណ៍នោះ ក្រោយយកដៃទះបាល់បញ្ចូលទីក្រុមសម្រាប់គ្រាប់ដំបូង ដែលអាហ្សង់ទីនយកឈ្នះ ២-១ ហើយក៏ជាប់ឈ្មោះជា «ដៃព្រះ» (Hand of God) រហូតដល់ទទួលមរណភាពនៅថ្ងៃទី២៥ ខែវិច្ឆិកាដោយសារគាំងបេះដូង នៅអាយុ៦០ឆ្នាំ។
ការដាក់រូប Maradona ក្នុងក្រដាសប្រាក់នេះ មិនត្រឹមតែដើម្បីរម្លឹកដល់និមត្តរូបរបស់អាហ្សង់ទីននោះទេ ប៉ុន្តែអ្នកស្រី Durango ថែមទាំងគិតឃើញដល់សេដ្ឋកិច្ចប្រទេសទៀតផង។ សមាជិកព្រឹទ្ធសភារូបនេះលើកឡើងថា នៅពេលភ្ញៀវទេសចរបរទេសទៅកាន់អាហ្សង់ទីន ពួកគេនឹងយកក្រដាស់ប្រាក់ដែលមានរូបកីឡាករដ៏ល្បីល្បាញរបស់ពិភពលោកទៅជាមួយមិនខាន។ យ៉ាងណាក៏ដោយ គម្រោងស្នើសុំនេះ នឹងត្រូវសម្រេចនៅឆ្នាំក្រោយ ដោយសមាជិកសភាអាហ្សង់ទីន៕
Tag:
Diego Maradona
Norma Durango
© រក្សាសិទ្ធិដោយ thmeythmey.com