COVID-19
អន្តរជាតិ
កិច្ចប្រជុំពិសេសមហាសន្និបាតអង្គការសហប្រជាជាតិនៅថ្ងៃទី៣ ខែធ្នូ។ រូបភាព Xinhua
×![]()
មហាសន្និបាតអង្គការសហប្រជាជាតិ (UNGA) នៅថ្ងៃទី៧ ខែធ្នូ បានអនុម័តយកថ្ងៃទី២៧ ខែធ្នូជាទិវាអន្តរជាតិត្រៀមបង្ការជំងឺរាតត្បាត (International Day of Epidemic Preparedness)។ ការប្រកាសទិវានេះធ្វើឡើង ក្នុងគោលបំណងធានាពីការរៀនសូត្រពីជំងឺឆ្លងកន្លងមក និងត្រៀមខ្លួនសម្រាប់បង្ការវិបត្តិសុខាភិបាលនាពេលអនាគត។
ការប្រកាសពីទិវាអន្តរជាតិនៃការត្រៀមបង្ការជំងឺឆ្លង ធ្វើឡើង១ឆ្នាំក្រោយជំងឺកូវីដ-១៩ត្រូវបានរកឃើញកាលពីចុងឆ្នាំ២០១៩ នៅទីក្រុងវូហានប្រទេសចិន ដែលបន្ទាប់មកត្រូវបានអង្គការសុខភាពពិភពលោកប្រកាសជំងឺរាតត្បាតសាកលនៅខែមីនា ឆ្នាំ២០២០។ មកទល់ពេលនេះ ជំងឺរាតត្បាតសាកលកូវីត-១៩ មានករណីឆ្លងចំនួន៦៧,៥លានករណី និងស្លាប់ចំនួន១,៥លាននាក់។
នៅក្នុងការបោះឆ្នោតអនុម័តសេចក្តីសម្រេចចិត្តរបស់ខ្លួន រដ្ឋសមាជិកទាំង១៩៣បានបោះឆ្នោតយល់ព្រមជាកុងសង់ស៊ីសក្នុងការបង្កើតទិវាខាលើ។ ក្នុងសេចក្តីថ្លែងការណ៍របស់ខ្លួន អង្គមហាសន្និបាតចាត់ទុកទិវាខាងលើ ជាការលើកឡើងពីសារសំខាន់នៃការបង្ការ និងត្រៀមខ្លួនសម្រាប់ភាពជាដៃគូក្នុងការប្រឆាំងនឹងជំងឺរាតត្បាត។ អង្កការសហប្រជាជាតិ ក៏សង្កត់ធ្ងន់ផងដែរពីកិច្ចសហប្រតិបត្តិការអន្តរជាតិ និងគំនិតពហុភាគីនិយមក្នុងការទប់ស្កាត់ដោះស្រាយបញ្ហាសាកល ដូចជំងឺរាតត្បាតជាដើម។
វៀតណាម ជាអ្នកស្នើអគ្គមហាសន្និបាត ក្នុងការប្រកាសយកថ្ងៃទី២៧ ធ្នូជាទិវាអន្តរជាតិត្រៀមបង្ការជំងឺរាតត្បាត។ លោក Dang Dinh Quy ឯកអគ្គរដ្ឋទូតវៀតណាមប្រចាំអង្គការសហប្រជាជាតិបានលើកឡើងថា ជំងឺកូវីដ-១៩មិនមែនជាជំងឺរាតត្បាតដំបូង ហើយក៏មិនមែនជាជំងឺរាតត្បាតចុងក្រោយដែរ។ នេះយោងតាមទីភ្នាក់ងារព័ត៌មាន Reuters។
ក្នុងសេចក្តីថ្លែងការណ៍របស់ខ្លួន ឯកអគ្គរដ្ឋទូតវៀតណាមអះអាងថា ជំងឺរាតត្បាតនេះកើតឡើងដោយភ្ញាក់ផ្អើល ប៉ុន្តែវាក៏ជាការដាស់តឿនផងដែរ ដើម្បីធ្វើឲ្យប្រសើរឡើងនូវការត្រៀមបង្ការ។ ក្នុងសេចក្តីថ្លែងការណ៍របស់ខ្លួន បេសកជនវៀតណាម បន្តថា ការដែលមានទិវាអន្តរជាតិត្រៀមបង្ការជំងឺរាតត្បាត គឺជាវិធីមួយផងដែរក្នុងការសម្រេចគោលបំណងខាងលើ។
លោក Richard Gowan នាយកអង្គការ Crisis Group អះអាងថា ការណ៍ដែល UN ប្រកាសទិវាខាងលើនេះ ជាជំហាននិមិត្តរូបមួយ ដើម្បីឲ្យស្ថាប័នមួយនេះបន្តមានតួនាទីក្នុងឆាកអន្តរជាតិ និងជាពិសេសសម្រាប់ប្រទេសតូចៗដែលបារម្ភពីការមិនបានចូលរួមក្នុងសេចក្តីសម្រេចចិត្តស្តីពីវ៉ាក់សាំង ឬការស្តារសេដ្ឋកិច្ចប្រទេសឡើងវិញក្រោយជំងឺបញ្ចប់ទៅ។
ការអនុម័តសេចក្តីសម្រេចស្តីពីទិវាខាងលើនេះ ធ្វើឡើងក្រោយប្រទេសជាច្រើនទាមទារក្នុងការធានាឲ្យមានការចែកចាយវ៉ាក់សាំងប្រកបដោយសមធម៌ អំឡុងកិច្ចប្រជុំនៅអង្គការសហប្រជាជាតិស្តីពីជំងឺរាតត្បាតកូវីត-១៩ កាលពីថ្ងៃទី៣ និងទី៤ ខែធ្នូ។ ក្នុងកិច្ចប្រជុំខាងនោះ លោក ឆាល មីឈែល ប្រធានក្រុមប្រឹក្សាអឺរ៉ុប លើកឡើង ថា សន្ធិសញ្ញាស្តីពីជំងឺរាតត្បាតសាកលមួយ នឹងជួយក្នុងការសម្របសម្រួលការស្រាវជ្រាវ ការចែករំលែកព័ត៌មាន និងការទទួលបានការថែទាំសុខភាពដោយសមធម៌៕
Tag:
កូវីត-១៩
UN
© រក្សាសិទ្ធិដោយ thmeythmey.com
