រដ្ឋាភិបាលក្រុងវ៉ាស៊ីនតោន នៅថ្ងៃទី៧ ខែធ្នូ បានប្រកាសដាក់ទណ្ឌកម្មលើមន្ត្រីជាន់ខ្ពស់សភាប្រជាជនចិន ចំនួន១៤នាក់ ទាក់ទិននឹងការបង្ក្រាបក្រុមអ្នកគាំទ្រលទ្ធិប្រជាធិបតេយ្យនៅក្នុងទីក្រុងហុងកុង និងសមាជិកសភាហុងកុង។ ទណ្ឌកម្មនេះ ត្រូវបានរដ្ឋាភិបាលក្រុងប៉េកាំងព្រមានទុកមុន។
ក្រសួងការបរទេស និងក្រសួងហិរញ្ញវត្ថុអាមេរិក បានប្រកាសពីការបង្កកទ្រព្យសម្បត្តិអនុប្រធានគណៈអចិន្ត្រៃយ៍នៃសភាប្រជាជនចិនចំនួន ១៤នាក់ ដែលមាននៅក្នុងទឹកដីអាមេរិក និងហាមអ្នកទាំង ១៤រូបនោះ រួមទាំងសមាជិកគ្រួសាររបស់ពួកគេមិនឲ្យធ្វើដំណើរមកអាមេរិក។
មន្ត្រីជាន់ខ្ពស់សភាចិនចំនួន ១៤រូបនេះ ជាអ្នកដឹកមុខក្នុងការតាក់តែងច្បាប់សន្តិសុខជាតិហុងកុង។ នៅពេលថ្មីៗនេះ អ្នកទាំងនោះ ក៏ចូលរួមក្នុងការអនុម័តសេចក្តីសម្រេចគុណសម្បត្តិរបស់សមាជិកសភាហុងកុង ដែលផ្តល់អំណាចឲ្យរដ្ឋាភិបាលហុងកុង ដកសិទ្ធិសមាជិកសភាទាំងឡាយណា ដែលគាំទ្រឯករាជ្យភាពរបស់ហុងកុង។
«សកម្មភាពយើងថ្ងៃនេះ បង្ហាញថាអាមេរិកនឹងបន្តសហការជាមួយសម្ព័ន្ធមិត្ត និងដៃគូរបស់យើង ដើម្បីចាប់បង្ខំឲ្យក្រុងប៉េកាំងទទួលខុសត្រូវលើការបំផ្លាញស្វ័យភាពក្រុងហុងកុង»។ លោក ម៉ៃ ប៉ុមប៉េអូ រដ្ឋមន្ត្រីការបរទេសអាមេរិក បានលើកឡើងបែបនេះ ដោយបន្ថែមថា ចិន បានវាយប្រហារលើលទ្ធិប្រជាធិបតេយ្យនៅហុងកុងឥតស្រាកស្រាន្ត។
យ៉ាងណាមិញ អាមេរិក ហាក់មិនហ៊ានដាក់ទណ្ឌកម្មលោក លី ចាន់ស៊ូ ប្រធានសភាចិននៅឡើយទេ។ លោក លី ត្រូវបានចាត់ទុកជាដៃស្ដាំប្រធានាធិបតី ស៊ី ជិនភីង ។
ទន្ទឹមគ្នានេះ ប្រមុខការទូតអាមេរិក នៅតែបន្តលើកឡើងដដែលៗថា ចិន មិនគោរពតាមសេចក្តីថ្លែងការណ៍រួមចិន-អង់គ្លេស ឆ្នាំ១៩៨៤ ដែលមានចែងពីលក្ខខណ្ឌ ដែលចិនបានសន្យា ក្នុងរយៈពេល ៥០ឆ្នាំ បន្ទាប់ពីអង់គ្លេសប្រគល់ឲ្យឡើយ។ ក្នុងការសន្យានោះ ចិនបានអះអាងថា ខ្លួននឹងមិនកែប្រែគោលការណ៍មូលដ្ឋានណាមួយឡើយរហូតដល់ឆ្នាំ ២០៤៧។
មុនការប្រកាសរបស់ក្រសួងការបរទេស និងក្រសួងហិរញ្ញវត្ថុនេះ ចិនបានព្រមានទុកហើយ។ អ្នកនាំពាក្យក្រសួងការបរទេសចិន លោកស្រី Hua Chunying បានអះអាងថា ចិនជំទាស់ និងរិះគន់យ៉ាងខ្លាំងលើទង្វើរបស់អាមេរិក ដែលជ្រៀតជ្រែកចូលមកក្នុងកិច្ចការចិនម្តងហើយម្តងទៀត ព្រមទាំងដាក់ទណ្ឌកម្មលើមន្ត្រីរបស់ចិន។
បើតាមលោកស្រី Hua ការដកតំណែងពីសមាជិកសភាហុងកុងចំនួន ៤រូប គឺផ្អែកលើច្បាប់មូលដ្ឋានរបស់ហុងកុង និងបទបញ្ញត្តិដែលពាក់ព័ន្ធនឹងច្បាប់សន្តិសុខជាតិហុងកុង។
កន្លងមក អាមេរិក ក៏ធ្លាប់ដាក់ទណ្ឌកម្មលើមន្ត្រីចិនដែលកាន់កិច្ចការនៅហុងកុងផងដែរ។ នៅក្នុងខែវិច្ឆិកា កន្លងទៅអាមេរិក បានបង្កកទ្រព្យសម្បត្តិរបស់មន្ត្រីចិនធ្វើការនៅហុងកុងចំនួន ៤រូប ហើយកាលពីខែសីហា អាមេរិក បានដាក់ទណ្ឌកម្មលើប្រធានប្រតិបត្តិហុងកុង លោកស្រីការី ឡាំ និងមន្ត្រីពាក់ព័ន្ធផ្សេងទៀត៕