ជាតិ
សេដ្ឋកិច្ច
កម្ចីសម្បទានដែលចិនផ្តល់ឲ្យកម្ពុជាលើការអភិវឌ្ឍហេដ្ឋារចនាសម្ព័ន្ធមានជិត៣ពាន់លានដុល្លារហើយ
ការដ្ឋានសាងសង់ផ្លូវល្បឿនលឿនភ្នំពេញ-ក្រុងព្រះសីហនុ។ រូបថត៖ ក្រសួងសាធារណការ និងដឹកជញ្ជូន
×![]()
ភ្នំពេញ៖ ចិន បានផ្ដល់កម្ចីសម្បទានជិត ៣ពាន់លានដុល្លារ សម្រាប់ការអភិវឌ្ឍហេដ្ឋារចនាសម្ព័ន្ធនានានៅកម្ពុជា។ នេះជាការលើកឡើងរបស់លោក ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន កាលពីថ្ងៃទី៣ ខែធ្នូ ឆ្នាំ២០២០។
លោក ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន ក្នុងថ្លែងសុន្ទរកថាក្នុងវេទិកាវិនិយោគហេដ្ឋារចនាសម្ព័ន្ធនិងសំណង់អន្តរជាតិ(IIICF) លើកទី១១ កាលពីថ្ងៃទី៣ធ្នូ ឆ្នាំ២០២០ នៅទីក្រុងម៉ាកាវនៃប្រទេសចិន តាមរយៈប្រព័ន្ធអនឡាញ។
ក្នុងឱកាសចូលរួមវេទិកាវិនិយោគហេដ្ឋារចនាសម្ព័ន្ធ និងសំណង់អន្តរជាតិ (IIICF) លើកទី១១ កាលពីថ្ងៃទី២-៣ធ្នូ ឆ្នាំ២០២០ នៅទីក្រុងម៉ាកាវ តាមរយៈប្រព័ន្ធអនឡាញ លោក ស៊ុន ចាន់ថុល បានអះអាងថា មានក្រុមហ៊ុនរបស់ចិនជាច្រើនបានចូលរួមសាងសង់ផ្លូវ របស់កម្ពុជាដែលប្រវែងសរុប៣,០០០គីឡូម៉ែត្រ និងស្ពានសំខាន់ៗចំនួន៨គម្រោង ក្នុងនោះ មានការសាងសង់ផ្លូវល្បឿនលឿនពីភ្នំពេញ-ក្រុងព្រះសីហនុ មានតម្លៃជិត២ពាន់លានដុល្លារ ដោយក្រុមហ៊ុនសាជីវកម្មផ្លូវថ្នល់ និងស្ពានដែលមានមូលដ្ឋាននៅប្រទេសចិន។
ក្រៅពីនេះ ហេដ្ឋារចនាសម្ព័ន្ធផ្លូវដែកដែលតភ្ជាប់ពីរាជធានីភ្នំពេញទៅកំពង់ផែក្រុងព្រះសីហនុ និងពីរាជធានីភ្នំពេញទៅព្រំដែនប្រទេសថៃ ក៏ត្រូវបានស្ដារឡើងវិញដោយក្រុមហ៊ុនចិន ផងដែរ។ នេះបើតាមលោកស៊ុន ចាន់ថុល ទាក់ទងនឹងការប្រើកម្ចីសម្បទានចិនជិត ៣ពាន់លានដុល្លារ។
រដ្ឋមន្ត្រីសាធារណការ និងដឹកជញ្ជូនរូបនេះ មានប្រសាសន៍ដូច្នេះ៖«មូលនិធិដែលបានពីដៃគូអភិវឌ្ឍទាំងសាធារណៈនិងឯកជននៃប្រទេសចិន អាចឱ្យយើងធ្វើឱ្យប្រសើរឡើងនូវបណ្ដាញផ្លូវថ្នល់របស់យើងដែលតភ្ជាប់ទីក្រុងភ្នំពេញទៅបណ្ដាខេត្ត ហើយវាក៏តភ្ជាប់ទៅខេត្ត-ក្រុង ដើម្បីសម្រួលដល់ពាណិជ្ជកម្ម ការវិនិយោគក្នុងស្រុក និងក្រៅស្រុកផងដែរ»៕
Tag:
ហេដ្ឋារចនាសម្ព័ន្ធ
កម្ចី
លោក ស៊ុន ចាន់ថុល
© រក្សាសិទ្ធិដោយ thmeythmey.com
