COVID-19
អន្តរជាតិ
×![]()
ដោយ: ធៀន ភារិន្ទ
ចក្រភពអង់គ្លេស នៅថ្ងៃទី៨ ខែធ្នូ បានចាប់ផ្តើមកម្មវិធីចាក់វ៉ាក់សាំងប្រឆាំងកូវីដ-១៩ ទ្រង់ទ្រាយធំ នៅក្នុងប្រទេសរបស់ខ្លួន។ នេះ គឺជាការផ្លាស់ប្តូរបរិបទមួយនៅក្នុងប្រវត្តិសាស្ត្រ ស្របពេលស្ថានភាពកូវីដ-១៩ មិនទាន់ស្រាកស្រាន្តនៅឡើយ។ ស្ត្រីវ័យ៩០ឆ្នាំម្នាក់ ជាមនុស្សទីមួយទទួលបានវ៉ាក់សាំង។
តាំងពីព្រឹកមក ប្រជាជនអង់គ្លេសជាច្រើននាក់ ដែលភាគច្រើនគឺជាជនងាយរងគ្រោះ ដូចជាមនុស្សចាស់មានអាយុលើសពី ៨០ឆ្នាំ ក្រុមគ្រូពេទ្យថែទាំងអ្នកជំងឺកូវីដ-១៩ បុគ្គលិកសង្គមជាដើម បានឈរតម្រង់ឈរ ដើម្បីទទួលបានការចាក់វ៉ាក់សាំងជាលើកដំបូង។ ការចាក់វ៉ាក់សាំងនេះ ត្រូវចាក់រយៈពេលពីរលើក។ ថ្ងៃចាក់វ៉ាក់សាំងនេះ ត្រូវបានដាក់ឈ្មោះថា «V-Day»។
ការចាក់វ៉ាក់សាំងលើកទីពីរ នឹងធ្វើឡើងនៅរយៈពេល ២១ថ្ងៃក្រោយ។ វ៉ាក់សាំង ដែលអង់គ្លេសចាក់នេះ គឺជារបស់ក្រុមហ៊ុន Pfizer ដែលបានអនុញ្ញាតនៅសប្តាហ៍មុន។ ចំណែកក្រុមហ៊ុនវ៉ាក់សាំងអង់គ្លេស AstraZeneca កំពុងស្រាវជ្រាវរកពីចំណុចខ្វះខាតមួយចំនួនបន្ថែមទៀត បន្ទាប់ពីមានបញ្ហា។
ក្នុងការចាក់វ៉ាក់សាំងនេះ ស្ត្រីឈ្មោះ Margaret Keenan ជាអ្នកទទួលវ៉ាក់សាំងមុនគេ។ លោកយាយបានអះអាងថា៖ «ខ្ញុំមានអារម្មណ៍ថាពិសេសណាស់ ដោយបានក្លាយជាមនុស្សដំបូង ដែលទទួលបានការចាក់វ៉ាក់សាំងប្រឆាំងកូវិដ-១៩»។ បើតាមលោកស្រី នេះគឺជាអំណោយមុនខួបកំណើតដ៏អស្ចារ្យមួយ ដែលលោកស្រីប្រាថ្នា។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ការចាក់វ៉ាកសាំងនេះ ធ្វើឡើងស្របពេល អង់គ្លេសកំពុងរងការអុកឡុកពីកូវីដ-១៩ ជាថ្មី។ នៅថ្ងៃទី៧ ខែធ្នូ អង់គ្លេស មានករណីឆ្លងកូវីដ-១៩ ចំនួន ១៤៧១៨ករណី។ ករណីសរុបអង់គ្លេស មានចំនួន ១,៧លានករណី ខណៈអ្នកស្លាប់មានចំនួនជាង ៦ម៉ឺននាក់។
ការចាក់វ៉ាក់សាំងទ្រង់ទ្រាយធំនេះ ក៏ត្រូវបានគាំទ្រដោយប្រជាជាតិទាំងបួនរបស់ចក្រភពអង់គ្លេសដែរ។ ប្រជាជាតិទាំង ៤ នេះមានដូចជា អង់គ្លេស, ស្កុតឡែន, វ៉ែល និងអៀឡង់ខាងជើង ដែលប្រជាជាតិទាំងនេះ មានគោលនយោបាយសុខាភិបាលខុសៗគ្នា និងរៀបចំគោលនយោបាយរៀងៗខ្លួន។ ជាមួយគ្នានេះ ម្ចាស់ក្សត្រី Elizabeth ទីពីរ ដែលមានវ័យ ៩៤ឆ្នាំ ក៏ត្រូវបានរាយការណ៍ថា ក៏អាចស្ថិតនៅក្នុងយុទ្ធនាការចាក់វ៉ាក់សាំងនេះដែរ។
ក្រុមគ្រូពេទ្យបានជួបបញ្ហាមួយចំនួន ជុំវិញការស្តុកទុកវ៉ាក់សាំង។ សម្រាប់វ៉ាក់សាំងក្រុមហ៊ុន Pfizer វាត្រូវការកន្លែងទុក ដែលមានសីតុណ្ណភាពរហូតដល់៧០អង្សាក្រោមសូន្យ។ មានតែមន្ទីរពេទ្យ និងមជ្ឈមណ្ឌលថែទាំសុខភាពមួយចំនួនប៉ុណ្ណោះ ដែលអាចដោះស្រាយជាមួយសីតុណ្ណភាពដ៏ទាបនេះបាន។
កន្លងមក ការអនុញ្ញាតរបស់អង់គ្លេស បានរងការិះគន់ពីសំណាក់សហភាពអឺរ៉ុប ដោយសារតែអង់គ្លេស បានអនុម័តឲ្យប្រើប្រាស់វ៉ាក់សាំងលឿនពេក ដោយមិនបានត្រួតពិនិត្យឲ្យបានហ្មត់ចត់។ ជាការឆ្លើយតប អង់គ្លេសអះអាងថា ការត្រួតពិនិត្យរបស់ខ្លួន មានបទដ្ឋានអន្តរជាតិ៕
Tag:
អង់គ្លេស
កូវីដ-១៩
© រក្សាសិទ្ធិដោយ thmeythmey.com
