COVID-19
សង្គមអន្តរជាតិ
អន្តរជាតិ
ប្អូនស្រីលោក គីម រិះគន់ប្រមុខការទូតកូរ៉េខាងត្បូងដែលសង្ស័យមានករណីកូវីដ-១៩ នៅកូរ៉េខាងជើង ប្រមុខការទូតកូរ៉េខាងត្បូង លោកស្រី Kang Kyung-wha។ រូបភាព៖ AFP
× លោកស្រី គីម យ៉ូចុង ប្អូនស្រីមេដឹកនាំកូរ៉េខាងជើង គីម ជុងអ៊ុន បានរិះគន់ប្រមុខការទូតកូរ៉េខាងត្បូង លោកស្រី Kang Kyung-wha ជុំវិញការសង្ស័យថាមានករណីឆ្លងកូវីដ-១៩ នៅកូរ៉េខាងជើង។ នេះបើតាមការផ្សាយបស់ទីភ្នាក់ងារព័ត៌មានរដ្ឋកូរ៉េខាងជើង KCNA នៅថ្ងៃទី ៩ ខែវិច្ឆិកា។ លោកស្រី គីំ ថែមទាំងព្រមានថា បើមិនបញ្ឈប់ការសង្ស័យបែបនេះទេ វាអាចនឹងបង្កឲ្យមានផលអាក្រក់ដល់ទំនាក់ទំនងទ្វេភាគីថែមទៀត។
កាលពីសប្ដាហ៍មុន រដ្ឋមន្ត្រីការបរទេសកូរ៉េខាងត្បូង លោកស្រី Kang Kyung-wha បានលើកឡើងក្នុងកិច្ចប្រជុំមួយថា វាពិបាកជឿណាស់ដែលកូរ៉េខាងជើង មិនមានករណីឆ្លងកូវីដ-១៩ នៅក្នុងប្រទេស ស្របពេលប្រទេសមួយនេះ បានបង្កើនការខិតខំយ៉ាងខ្លាំង ដើម្បីទប់ស្កាត់ការរាតត្បាតនៃកូរ៉ូណាវីរុស។ ការលើកឡើងបែបនេះ ធ្វើឲ្យកូរ៉េខាងជើងក្ដៅស្លឹកត្រចៀកខ្លាំង។
លោកស្រី គីម យ៉ូចុង ប្អូនស្រីបង្កើតលោក គីម ជុងអ៊ុន ប្រមុខដឹកកូរ៉េខាងជើង ចាត់ទុកសម្ដីលោកស្រី កាង ជាបំណងចង់បង្កើនភាពល្អក់កករដាក់គ្នា។ ក្នុងសេចក្តីថ្លែងការណ៍មួយ ដែលផ្សាយដោយទីភ្នាក់ងារព័ត៌មាន KCNA លោកស្រី គីម ដែលជាមន្ត្រីជាន់ខ្ពស់ក្នុងបក្សពលករកូរ៉េ បានលើកឡើងយ៉ាងដូច្នេះថា៖ «យើងអាចមើលឃើញពីការលើកឡើងដោយគ្មានការពិចារណា របស់លោកស្រី Kang Kyung-wha ដែលមិនគិតពីផលវិបាក»។
បើតាមស្ត្រីដ៏មានឥទ្ធិពលរូបនេះ ការលើកឡើងរបស់ប្រមុខការទូតកូរ៉េខាងត្បូងថែមទាំងអាចបង្កកទំនាក់ទំនងកូរ៉េទាំងពីរថែមទៀត។ លោកស្រី គីម បានបញ្ជាក់ច្បាស់ៗថា កូរ៉េខាងជើង នឹងមិនភ្លេចពាក្យសម្តីទាំងនោះឡើយ ហើយប្រមុខការទូតកូរ៉េខាងត្បូង ប្រហែលជាត្រូវទទួលខុសត្រូវលើបញ្ហាផងដែរ។
កន្លងមក មិនត្រឹមតែរដ្ឋមន្ត្រីការបរទេសកូរ៉េខាងត្បូងប៉ុណ្ណោះទេ ដែលសង្ស័យថា កូរ៉េខាងជើងមានករណីឆ្លងកូវីដ-១៩ នៅក្នុងប្រទេស សូម្បីតែទីភ្នាក់ងារចារកិច្ចជាតិកូរ៉េខាងត្បូង (NIS) ក៏បានអះអាងផងដែរថា គេមិនអាចច្រានច្រោលបានទេករណីឆ្លងកូរ៉ូណាវីរុសនៅកូរ៉េខាងជើង ព្រោះប្រទេសនេះ មានការផ្តោះប្តូរពាណិជ្ជកម្មជាមួយចិនផងដែរ មុនកូរ៉ូណាវីរុសផ្ទុះខ្លាំងនៅក្នុងក្រុងវូហាន។
គិតមកត្រឹមពេលនេះ កូរ៉េខាងជើង ជាប្រទេសមួយ ដែលមិនទាន់ប្រកាសថាមានករណីឆ្លងកូរ៉ូណាវីរុសនៅឡើយទេ។ នៅសប្តាហ៍មុន ទីភ្នាក់ងារព័ត៌មាន KCNA បានចុះផ្សាយថា កូរ៉េខាងជើង បានដាក់ចេញវិធានការអាសន្នកម្រិតខ្ពស់បំផុតដើម្បីទប់ស្កាត់កូវីដ-១៩៕
Tag:
កូរ៉េខាងជើង
កូរ៉េខាងត្បូង
កូវីដ-១៩
© រក្សាសិទ្ធិដោយ thmeythmey.com