កីឡាជាតិ
ជាតិ
ក្រោយទទួលបានកិច្ចសន្យាថ្មី Mizuno មានមហិច្ឆិតាចង់ឈ្នះពានជាលើកទីបីជាមួយបឹងកេត ខ្សែបម្រើជនជាតិជប៉ុន_Mizuno_Hikaru_បន្តកិច្ចសន្យាជាមួយក្លិបបឹងកេត
× ក្លិបបាល់ទាត់បឹងបានសម្រេចបន្តកិច្ចសន្យាជាមួយខ្សែបម្រើជនជាតិ Mizuno Hikaru នៅរដូវកាលឆ្នាំ២០២១ ក្រោយរួមរស់ជាមួយគ្នា៤រដូវកាលកន្លងមកនេះ។ ស្ថិតក្នុងវ័យ២៩ឆ្នាំ Mizuno រីករាយក្នុងការលេងឲ្យក្លិបបឹងកេត ហើយរូបគេរំពឹងថា ខ្លួននឹងអាចលើកពានលីគកំពូលជាលើកទី៣ជាមួយក្លិបនេះ។
កីឡាករ Mizuno Hikaru ត្រូវជួយក្លិបបាល់ទាត់បឹងកេតប្រជែងដណ្តើមជើងឯកក្នុងព្រឹត្តិការណ៍ AFC Cup និងពានរង្វាន់ក្របខណ្ឌមិត្តហ្វូនខេមបូឌានលីគនៅរដូវកាលឆ្នាំ២០២១-២០២២។ បន្ទាប់ពីខ្សែបម្រើវ័យ២៩ឆ្នាំរូបនេះ ត្រូវបានក្លិបបឹងកេតសម្រេចបន្តកិច្ចសន្យាថ្មី កាលពីថ្ងៃទី៧ ខែធ្នូ ឆ្នាំ២០២០។
នេះជារដូវកាលទី៥របស់កីឡាករមានកម្ពស់១.៧៧ម៉ែត្ររូបនេះ សម្រាប់ការរួមរស់ជាមួយបឹងកេត។ ក្នុងរយៈពេល៤ឆ្នាំរួមរស់ជាមួយបឹងកេត Mizuno បានជួយឲ្យក្លិបនេះឈ្នះជើងឯកលីគកំពូលពីរលើកនៅឆ្នាំ២០១៧ និងឆ្នាំ២០២០ និងឈ្នះជើងឯកពានសម្តេច ហ៊ុន សែន មួយលើកនៅឆ្នាំ២០១៩។
កីឡាករជនជាតិជប៉ុនរូបនេះ បានចាត់ទុកឆ្នាំ២០២០ ជាឆ្នាំដ៏ជោគជ័យបំផុតសម្រាប់ខ្លួន ដ្បិតរូបគេបានរួមចំណែកជួយឲ្យបឹងកេតលើកពានលីគកំពូល ជាមួយការរក្សាកំណត់ត្រាមិនស្គាល់ចាញ់។ ទន្ទឹមនឹងបង្ហាញអារម្មណ៍រីករាយជាមួយកិច្ចសន្យាថ្មី រូបគេរំពឹងថា ខ្លួននឹងអាចលើកពានលីគកំពូលជាមួយបឹងកេតជាលើកទី៣នៅរដូវកាលក្រោយ។
«គោលដៅបន្តទៀតរបស់ខ្ញុំនៅឆ្នាំ២០២១ គឺនៅតែជាជើងឯក តែអ្វីដែលពិសេសនោះ គឺខ្ញុំនឹងព្យាយាមឈ្នះការប្រកួតក្នុងពានរង្វាន់ AFC Cup ព្រោះខ្ញុំបានលេង២ដងហើយ ប៉ុន្តែមិនទទួលបានលទ្ធផលល្អសម្រាប់យើង អញ្ចឹងយើងនឹងព្យាយាមឱ្យបានលទ្ធផលល្អជាងនោះ»។ នេះជាការបង្ហាញក្តីរំពឹងរបស់កីឡាករ Mizuno Hikaru។
កីឡាកររូបនេះ បានមកប្រកបអាជីពបាល់ទាត់លើទឹកដីកម្ពុជានៅឆ្នាំ២០១៦ ដោយចាប់ផ្តើមជាមួយក្លិបបាល់ទាត់ព្រះខ័នរាជស្វាយរៀង។ បន្ទាប់មករូបគេក៏បានផ្ទេរមកកាន់ក្លិបបឹងកេតនៅឆ្នាំ២០១៧ រដូវមកបច្ចុប្បន្ន។ ក្នុងអំឡុងពេលរួមរស់ជាមួយបឹងកេតរូបគេបង្ហាញខ្លួនបានចំនួន៣៧លើក និងរកបានពីរគ្រាប់។
មុនមកប្រទេសកម្ពុជា ខ្សែបម្រើរូបនេះធ្លាប់លេងឲ្យក្លិបក្របខណ្ឌកំពូលរបស់សិង្ហបុរី Albirex Niigata Singapore និងក្លិបក្របខណ្ឌលីគលំដាប់ទីពីររបស់ជប៉ុន Ryukyu FC។ រូបគេបានចូលប្រឡូកក្នុងវិស័យកីឡាបាល់ទាត់ដំបូងជាមួយក្លិបមួយនៅសាកលវិទ្យាល័យ Meiji University៕
Tag:
បាល់ទាត់
បឹងកេត
Mizuno Hikaru
© រក្សាសិទ្ធិដោយ thmeythmey.com