ភ្នំពេញ៖ ព្រះមហាក្សត្រ បានសម្រេចបញ្ចប់មុខលោក ចាន់ យ៉េត ប្រធានគណបក្សនគរប្រជាធិបតេយ្យ (ពីមុនឈ្មោះថាគណបក្សសាធារណរដ្ឋប្រជាធិបតេយ្យ) ពីសមាជិកឧត្ដមក្រុមប្រឹក្សាពិគ្រោះ និងផ្ដល់យោបល់ កាលពីថ្ងៃទី៩ ធ្នូ តាមសំណើរបស់សម្ដេចនាយករដ្ឋមន្ត្រី ហ៊ុន សែន។
ការដកតំណែងនេះ ត្រូវបានគេមើលឃើញថា ទំនងមកពីលោក ចាន់ យ៉េត លូកដៃចូលរឿងទំនាស់ដីធ្លីមួយ នៅខេត្តបន្ទាយមានជ័យ។ សារព័ត៌មានថ្មីៗ បានទាក់ទងលោក ឈឹម ផលវរុណ អគ្គលេខាធិការដ្ឋានឧត្ដមក្រុមប្រឹក្សាពិគ្រោះ និងផ្ដល់យោបល់ ដើម្បីសាកសួរជុំវិញករណីនេះ ប៉ុន្តែលោកសុំមិនអត្ថាធិប្បាយ ដោយស្នើឲ្យសួរសំនួរទៅកាន់លោក ចាន់ យ៉េត ដែលជាសាមីខ្លួនផ្ទាល់វិញ។
សារព័ត៌មានថ្មីៗ ទាក់ទងលោក ចាន់ យ៉េត ប្រធានគណបក្សនគរប្រជាធិបតេយ្យ មិនទាន់បានឡើយ ដោយទូរសព្ទចូល ប៉ុន្តែមិនមានអ្នកទទួល។
តែយ៉ាងណាការបញ្ចប់មុខតំណែងលោក ចាន់ យ៉េត នេះ ធ្វើឡើងក្រោយពីលោក ប្រកាសដកខ្លួនចេញពីដំណើរការដោះស្រាយវិវាទដីធ្លីមួយ រវាងប្រជាពលរដ្ឋ២៣០គ្រួសារ និងក្រុមហ៊ុនឯកជនមួយ នៅតំបន់បឹងជង្រុក និង៦៧១ នៅឃុំទួលពង្រ ក្នុងស្រុកម៉ាឡៃ ខេត្តបន្ទាយមានជ័យ កាលពីថ្ងៃទី៧ ធ្នូ។
ប្រធានគណបក្សនគរប្រជាធិបតេយ្យលោក ចាន់ យ៉េត គឺជាមនុស្សទី៤ហើយ ដែលអស់តំណែងពីឧត្ដមក្រុមប្រឹក្សាពិគ្រោះយោបល់ ដោយសារបញ្ហាដីធ្លីនេះ។
កាលពីថ្ងៃទី៤ ខែឧសភា ឆ្នាំ២០២០ ព្រះមហាក្សត្រ ក៏បានបញ្ចប់តំណែងមេដឹកនាំគណបក្សខ្មែរក្រោក លោក សុខសុវណ្ណ វឌ្ឍនាសាប៊ុង ដោយសារចុះសិក្សា និងដោះស្រាយបញ្ហាវិវាទដីធ្លីមួយកន្លែង នៅស្រុកព្រៃនប់ ខេត្តព្រះសីហនុ ដោយមានបញ្ហាប្រទាំងប្រទើសជាមួយមន្ត្រីអាជ្ញាធរមូលដ្ឋាននៅទីនោះ។
ដោយឡែកអ្នកស្រី សុខ រ័ត្នសុវណ្ណបញ្ចៈសីលា អតីតប្រធានគណបក្សនគរប្រជាធិបតេយ្យ និង លោក ច័ន្ទ ភាព ជាអតីតអនុប្រធានគណបក្ស(ពីមុនឈ្មោះថាគណបក្សសាធារណរដ្ឋប្រជាធិបតេយ្យ) ក៏ត្រូវបានបញ្ចប់ពីសមាជិកនៃឧត្តមក្រុមប្រឹក្សាពិគ្រោះនិងផ្តល់យោបល់ដែរ ក្រោយមានរឿងអាស្រូវពាក់ព័ន្ធនឹងដីធ្លីនៅខេត្តព្រះវិហារ កាលពីអំឡុងខែឧសភា ឆ្នាំ២០១៩។ កាលនោះ លោក ឆាយ គឹមខឿន អគ្គស្នងការរងនិងជាអ្នកនាំពាក្យអគ្គស្នងការនគរបាលជាតិ បកស្រាយថា អ្នកទាំងពីរ ដើរបំផុសបំផុលប្រជាពលរដ្ឋ ឲ្យទៅកាន់កាប់និងរស់នៅលើដីមួយកន្លែង ដែលរដ្ឋប្រគល់ឲ្យក្រុមហ៊ុនឯកជន ដើម្បីអភិវឌ្ឍ។
ក្រោយកើតហេតុការណ៍ទាំងនេះ សម្តេចនាយករដ្ឋមន្ត្រី ហ៊ុន សែន ក៏បានដាក់ចេញបម្រាមមួយចំនួន ដល់លេខាធិការដ្ឋាននិងសមាជិក-សមាជិកានៃឧត្តមក្រុមប្រឹក្សាពិគ្រោះនិងផ្តល់យោបល់ កាលពីថ្ងៃទី១៥ ខែឧសភា ឆ្នាំ២០២០ ដោយហាមមិនឲ្យចុះដោះស្រាយរាល់ទំនាស់ ដែលសម្តេចបានដោះស្រាយ និង មានសេចក្តីជូនដំណឹងរបស់ទីស្តីការគណៈរដ្ឋមន្ត្រី (ស.ជ.ណ) រួចហើយ។
មិនតែប៉ុណ្ណោះ ការចុះដោះស្រាយរាល់ទំនាស់ដីធ្លី ដែលកំពុងដំណើរការតាមនីតិវិធីរបស់តុលាការ និង ទំនាស់ដីធ្លី ដែលបានដោះស្រាយដោយតុលាការ និងមានសាលក្រមឬសាលដីការួចហើយ ក៏សម្ដេច មិនអនុញ្ញាតឲ្យសមាជិកឧត្ដមក្រុមប្រឹក្សាពិគ្រោះ និងផ្ដល់យោបល់ មានសកម្មភាព ឬលូកដៃចូលកិច្ចការទាំងនេះដែរ។
ជាមួយគ្នានេះ រដ្ឋាភិបាល ណែនាំលេខាធិការដ្ឋាននៃឧត្តមក្រុមប្រឹក្សាពិគ្រោះនិងផ្តល់យោបល់ ឲ្យពិនិត្យគោលដៅនិងកម្មវត្ថុ ដែលសមាជិក-សមាជិកាអង្គភាពនេះ បម្រុងចុះទៅដោះស្រាយ ដោយមិនត្រូវចេញលិខិតបេសកកម្មជូនឡើយ បើស្ថិតក្នុងបម្រាមទាំងបីខាងលើ។ រដ្ឋាភិបាល សង្កត់ធ្ងន់ថា សមាជិក-សមាជិកាឧត្តមក្រុមប្រឹក្សាពិគ្រោះនិងផ្តក់យោបល់ ក៏មិនត្រូវបញ្ជូនសំណុំរឿងវិវាទដីធ្លីរវាងបុគ្គលនិងបុគ្គល ជូនទៅសម្តេចនាយករដ្ឋមន្ត្រី ដោះស្រាយដែរ៕