ខ្យល់ និង​រលក​ធំៗ ក្រសួង​ណែនាំ​ពលរដ្ឋ និង​ម្ចាស់​អាជីវកម្ម​លើ​សមុទ្រ បង្កើន​ការប្រុងប្រយ័ត្ន
ជាតិ
ខ្យល់ និង​រលក​ធំៗ ក្រសួង​ណែនាំ​ពលរដ្ឋ និង​ម្ចាស់​អាជីវកម្ម​លើ​សមុទ្រ បង្កើន​ការប្រុងប្រយ័ត្ន
10, Dec 2020 , 8:29 pm        
រូបភាព
​ដោយ​៖ ប៉ូ សុភា​

​ក្រសួង​សាធារណការ និង​ដឹកជញ្ជូន ប្រាប់​ម្ចាស់​អា​ជីក​ម្ម និង​ប្រជា​នេសាទ ប្រុងប្រយ័ត្ន​ខ្ពស់ ចំពោះ​គ្រោះធម្មជាតិ ដែល​បង្កឱ្យមាន​ខ្យល់​បោកបក់​ខ្លាំង និង​រលក​ធំៗ ដែល​អាច​បណ្ដាលឱ្យមាន​គ្រោះថ្នាក់​ដល់​អាយុជីវិត​។



​ក្រសួង​សាធារណការ ប្រាប់​ឱ្យ​ម្ចាស់​ក្រុមហ៊ុន​ដឹកជញ្ជូន​តាម​នាវា អ្នកបើកបរ​នាវា និង​ប្រជា​នេសាទ​ទាំងអស់ យកចិត្តទុកដាក់​ខ្ពស់ លើ​ស្ថានភាព​អាកាសធាតុ​តំបន់ឆ្នេរ​កម្ពុជា​បច្ចុប្បន្ន ដែល​កំពុងមាន​ខ្យល់​បកបោក​ខ្លាំង បង្កើតជា​រលក​សមុទ្រ​ខ្ពស់ៗ​។​
 
​ដើម្បី​ទប់ស្កាត់​បញ្ហា​គ្រោះថ្នាក់​នេះ ក្រសួង ក៏បាន​អំពាវនាវ​ជាថ្មី​ដល់​ប្រជាពលរដ្ឋ និង​ម្ចាស់​អាជីវកម្ម​ដែល​ប្រកប​របរ​លើ​ដែនទឹក​ទាំងអស់ ត្រូវ​ត្រៀមខ្លួន​ប្រុងប្រយ័ត្ន​ខ្ពស់ ដោយ​បំពាក់​នូវ​ឧបករណ៍​ការពារ​សុវត្ថិភាព ដល់​អ្នកធ្វើដំណើរ ដូចជា ដាក់​អាវ​ពោង ពោង​សង្គ្រោះ ខ្សែពួរ​ជាដើម​។​
 
​ក្រសួង​សាធារណការ បានបញ្ជាក់​ក្នុង​លិខិត​ជូនដំណឹង ថ្ងៃទី​៩ ធ្នូ ថា​៖  «​ត្រូវ​តាមដាន​លើ​បញ្ហា​ប្រែប្រួល​អាកាសធាតុ​នេះ ឱ្យបាន​គ្រប់គ្រាន់ ដោយ​មិនត្រូវ​ចេញ​ទៅណា​ឆ្ងាយ​ពី​ច្រាំង​នៅពេល​មាន​រលក​ធំៗ ឬ​អាកាសធាតុ​មិនល្អ​ឡើយ ដើម្បី​ចៀសវាង​នូវ​គ្រោះថ្នាក់​ផ្សេងៗ ដែល​អាច​កើតមានឡើង​ថា​ហេតុ ព្រមទាំង​ចូលរួម​អនុវត្ត​ទៅតាម​ការផ្សព្វផ្សាយ ឬ​ការណែនាំ​របស់​សមត្ថកិច្ច​ស្តីពី​បញ្ហា​អាកាសធាតុ​នេះ​»​។  
 
​កន្លងមក​មាន​ម្ចាស់​ទូក​មួយចំនួន​តូច ពុំបាន​ចូលរួម​អនុវត្តតាម​ការណែនាំរ​បស់​សមត្ថកិច្ច​ស្តីពី​បញ្ហា​អាកាសធាតុ​ឡើយ ។ នេះ​ជាការ​មើលឃើញ​របស់​ក្រសួង ដែល​សង្ឃឹមថា ប្រជា​នេសាទ និង​ភាគី​ម្ចាស់​អាជីវកម្ម​បម្រើសេវា​នៅលើ​ផ្ទៃ​ទឹក នឹងចូលរួម​អនុវត្ត​ឱ្យមាន​ប្រសិទ្ធភាព តាម​ការណែនាំ​ខាងលើ​៕

Tag:
 ប្រជា​នេសាទ​
  ម្ចាស់​អាជីវកម្ម​
  គ្រោះថ្នាក់​
  អាកាសធាតុ​
  ជាយថាហេតុ​
© រក្សាសិទ្ធិដោយ thmeythmey.com