ប្រធានាធិបតី ដូណាល់ ត្រាំ និងរដ្ឋអាមេរិក ១៧ ទៀត នៅថ្ងៃទី ៩ ខែធ្នូ បានគាំទ្រការប្ដឹងតវ៉ាពីសំណាក់រដ្ឋ Texas ដោយព្យាយាមកែប្រែលទ្ធផលបរាជ័យរបស់លោក ត្រាំ ។ ក្នុងពាក្យបណ្ដឹងនេះ រដ្ឋ Texas ដែលគ្រប់គ្រងរដ្ឋបក្សសាធារណរដ្ឋ ស្នើសុំតុលាការកំពូលអាមេរិកផាត់ចោលលទ្ធផលឆ្នោតក្នុងរដ្ឋ៤ដែលលោក ចូ បៃឌិន ឈ្នះ។ លោក ត្រាំ ខ្លួនឯង ក៏ដាក់ពាក្យសុំធ្វើដើមបណ្ដឹងក្នុងសំណុំរឿងនេះដែរ។
ពាក្យបណ្ដឹងរបស់រដ្ឋ Texas លើកឡើងថា ការកែប្រែនីតិវិធីបោះឆ្នោតពីសំណាក់រដ្ឋទាំង៤ រួមមាន Georgia, Michigan, Pennsylvania និង Wisconsin ក្នុងកាលៈទេសៈជំងឺកូវីដ-១៩ ដោយពង្រីកការបោះឆ្នោតតាមរយៈប្រៃសណីយ៍ ជារឿងខុសច្បាប់។ ដោយឈរលើមូលដ្ឋាននេះ រដ្ឋ Texas បានស្នើសុំឲ្យតុលាការកំពូលរាំងខ្ទប់ភ្លាមៗរដ្ឋទាំង៤នេះ កុំឲ្យប្រើប្រាស់លទ្ធផលការបោះឆ្នោតពួកគេទៅតែងតាំងប្រតិភូបោះឆ្នោត ដែលនឹងគាំទ្រលោក ចូ បៃឌិន នោះ
ខណៈរដ្ឋទាំង៤ដែលរងពាក្យបណ្ដឹងពីបក្សសាធារណដ្ឋ មានប្រតិភូតំណាងបូកបញ្ចូលគ្នាដល់ ៦២ រដ្ឋ Texas ក៏បានស្នើសុំតុលាការកំពូលអាមេរិកលើកពេលបោះឆ្នោតរបស់ប្រតិភូបោះឆ្នោត ដែលគ្រោងរៀបចំឡើងនាថ្ងៃទី ១៤ ខែធ្នូផងដែរ។ លោក ចូ បៃឌិន បានឈ្នះប្រតិភូបោះឆ្នោតរហូតដល់ ៣០៦ ទល់នឹងលោក ដូណា់ ត្រាំ មានតែ២៣២។ តាមរដ្ឋធម្មនុញ្ញអាមេរិក បេក្ខជនប្រធានាធិបតី ត្រូវការយ៉ាងតិច ២៧០ ប្រតិភូបោះឆ្នោតដើម្បីគ្រងសេតវិមានអាមេរិក។
លោក ត្រាំ ដែលបានចាញ់ប្រធានាធិបតីជាប់ឆ្នោត ចូ បៃឌិន ក្នុងការបោះឆ្នោតថ្ងៃទី៣ ខែវិច្ឆិកា បានដាក់ពាក្យបណ្ដឹងទៅកាន់តុលាការកំពូលអាមេរិក ដោយស្នើសុំចៅក្រមទាំង៩នាក់របស់តុលាការនេះបើកផ្លូវឲ្យលោកធ្វើអន្តរាគមន៍ និងក្លាយជាដើមបណ្ដឹងក្នុងពាក្យបណ្ដឹងដែលដាក់ដោយរដ្ឋ Texas ប្រឆាំងនឹងរដ្ឋទាំង៤ខាងលើដែរ។
រដ្ឋ Texas ជារដ្ឋកាន់កាប់ដោយបក្សសាធារណរដ្ឋ ចំណែករដ្ឋទាំង៤នេះ ជារដ្ឋដែលបក្សប្រជាធិបតេយ្យលោក បៃឌិន ឈ្នះ។ ខណៈចាញ់ឆ្នាំ២០២០ ទល់លោក បៃឌិន លោក ត្រាំ ដែលជាបេក្ខជនបក្សសាធារណរដ្ឋ បានឈ្នះឆ្នោតក្នុងរដ្ឋទាំង៤នេះ កាលពី៤ឆ្នាំមុន។
ប្រសិនបើចៅក្រមទាំង៩នាក់នេះ អនុញ្ញាតឲ្យលោក ត្រាំ ធ្វើជាដើមបណ្ដឹងដែរ ករណីនេះនឹងបង្កើតទៅជាសេណារីយ៉ូដ៏កម្រមួយ ដែលប្រធានាធិបតីជិតផិតអាណត្តិស្នើសុំតុលាការកំពូលធ្វើមោឃភាពសន្លឹកឆ្នោតពលរដ្ឋអាមេរិករាប់លាន់នាក់ដែលបោះក្នុងរដ្ឋទាំង៤ ។ តាមរយៈបណ្ដាញ Twitter លោក ត្រាំ សរសេរដូច្នេះថា៖« នេះជារឿងដ៏ធំមួយ ។ ប្រទេសយើងត្រូវការជ័យជម្នះ»។
ក្នុងសេចក្តីថ្លែងការណ៍ដាច់ដោយឡែកមួយ ក្រុមមេធាវីតំណាងរដ្ឋទាំង១៧ ដែលដឹកនាំដោយអគ្គរដ្ឋអាជ្ញាមកពីសាធារណរដ្ឋប្រចាំរដ្ឋ Missouri លោក Eric Schmitt ក៏បានទទូចឲ្យចៅក្រុមទាំង៩របស់តុលាការកំពូលបើកសវនាការរឿងក្តីដែលប្ដឹងដោយរដ្ឋ Texas ផងដែរ។
បន្ថែមពីរដ្ឋ Missouri រដ្ឋទាំង១៦ទៀតដែលគាំទ្រ Texas គឹមានដូចជា រដ្ឋ Alabama, Arkansas, Florida, Indiana, Kansas, Louisiana, Mississippi, Montana, Nebraska, North Dakota, Oklahoma, South Carolina, South Dakota, Tennessee, Utah និង West Virginia។ ភាគច្រើននៃអ្នកដាក់ពាក្យបណ្ដឹងតំណាងរដ្ឋទាំងនេះ ជាមន្ត្រីបក្សសាធារណរដ្ឋ លើកលែកតែ៣រដ្ឋប៉ុណ្ណោះ ដែលមានអភិបាលរដ្ឋបក្សសាធារណរដ្ឋជាអ្នកតំណាង។
យ៉ាងណាមិញ មន្ត្រីមកពីរដ្ឋ Georgia , Michigan, Pennsylvania និង Wisconsin បានហៅពាក្យបណ្ដឹងនេះថាជាការវាយប្រហារឥតកោតក្រែងប្រឆាំងលទ្ធិប្រជាធិបតេយ្យ ខណៈពួកគេដាក់ពាក្យបណ្ដឹងផ្ទាល់ទៅកាន់តុលាការកំពូល ដោយរំលងនីតិវិធីនៅតុលាការជាន់ទាប។
ពាក្យបណ្ដឹងនេះ អាចជាហានិភ័យសម្រាប់បក្សប្រជាធិបតេយ្យរបស់លោក បៃឌិន ដ្បិតចៅក្រមទាំង៩របស់តុលាការកំពូល គឺមាននិន្នាការអភិរក្សនិយមរហូតដល់៦សំឡេងឯណោះ ហើយក្នុងចៅក្រុមទាំង៩នាក់ គឺមាន៣នាក់ត្រូវបានតែងតាំងផ្ទាល់ដៃដោយលោកត្រាំផងដែរ។ ម្យ៉ាងវិញទៀត នៅមុនពេលបោះឆ្នោត លោក ត្រាំ ក៏ធ្លាប់រំពឹងដែរថា លទ្ធផលឆ្នោត អាចត្រូវសម្រេចដោយតុលាការកំពូលនៅទីបំផុត៕