រដ្ឋមន្ត្រីសុខាភិបាល ហាមពលរដ្ឋពិសាស្រា «ស» ឬស្រាថ្នាំ ដែលគ្មានប្រភពច្បាស់លាស់

ជាតិ

សង្គមជាតិ

សុខភាព

រដ្ឋមន្ត្រីសុខាភិបាល ហាមពលរដ្ឋពិសាស្រា «ស» ឬស្រាថ្នាំ ដែលគ្មានប្រភពច្បាស់លាស់

10, Dec 2020 , 9:59 pm

រូបភាព

ដោយ៖ ប៉ូ សុភា

ក្រសួងសុខាភិបាល ហាមពលរដ្ឋពិសាស្រា «ស» ឬស្រាថ្នាំ ដែលគ្មានប្រភពច្បាស់លាស់ ដើម្បីបញ្ចៀសគ្រោះថ្នាក់ដល់សុខភាព និងជីវិត។ ចំណែកចំណីអាហារវិញ ពលរដ្ឋក៏ត្រូវបរិភោគអាហារឆ្អិន និងប្រើប្រាស់ទឹកស្អាតផងដែរ។

ក្រសួងសុខាភិបាល សង្កេតឃើញថា ករណីពុលស្រាស ឬស្រាថ្នាំកន្លងមក ដោយសារស្រាទាំងនោះ មានសារជាតិមេតាណុលកម្រិតខ្ពស់ លើពីកម្រិតធម្មតា ទើបបណ្ដាឱ្យពលរដ្ឋពិសារទៅ មានអាការក្អួតចង្អោរ ស្រវាំង ឬងងឹតភ្នែក សន្លប់ ប្រកាច់ ពិបាកដកដង្ហើម និងអាចវិវត្តទៅជាស្លាប់ជាដើម។ ដោយសារមើលឃើញបញ្ហានេះ ទើបក្រសួងសុខាភិបាលហាមពលរដ្ឋពិសាស្រា «ស» ឬស្រាថ្នាំ ដែលគ្មានប្រភពច្បាស់លាស់។

រដ្ឋមន្ត្រីក្រសួងសុខាភិបាលលោក ម៉ម ប៊ុនហេង បានចេញសេចក្តីជូនព័ត៌មាន កាលពីថ្ងៃទី៩ ធ្នូ ដូច្នេះថា៖«សូមបងប្អូនប្រជាពលរដ្ឋ បញ្ឃប់ជាបន្ទាន់នូវការពិសារស្រាសឬស្រាថ្នាំ ដែលទិញពីប្រភពមិនច្បាស់លាស់ ដែលផលិតគ្មានការត្រួតពិនិត្រត្រឹមត្រូវ និងផលិតនៅក្នុងមូលដ្ឋានសហគន៍ មិនត្រឹមត្រូវតាមក្បួនខ្នាតបច្ចេកទេស។ សូមបងប្អូនដាច់ខាចកុំយកសារធាតុមេតាណុល ទៅលាយធ្វើជាស្រាសដែល បណ្ដាលឱ្យ មានការពុល និងស្លាប់បាន»។

កន្លងមកពលរដ្ឋ នៅក្នុងមួយចំនួន បានពុលស្រាស ដោយអ្នកខ្លះចូលសម្រាកនៅមន្ទីរពេទ្យ និងបាត់បង់ជីវិតជាដើម។ ពលរដ្ឋដែលពុលស្រាទាំងនោះ ភាគច្រើន រស់នៅខេត្តក្រចេះ បន្ទាយមានជ័យ មណ្ឌលគិរី និងកំពង់ឆ្នាំងជាដើម។

បើនិយាយពីខេត្តកំពង់ឆ្នាំងវិញ នៅត្រឹមរយៈពេលជាង១ខែនេះ មានអ្នកពុលស្រា «ស» ស្លាប់១៥នាក់ និងសម្រាកនៅក្នុងមន្ទីរពេទ្យជាង១៣០នាក់ហើយ ។នេះបើតាមលោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង ប្រាប់សារព័ត៌មានថ្មីៗកន្លងមក។

អត្ថបទទាក់ទង

អាជ្ញាធរ រកឃើញពលរដ្ឋ៧ទៀត ស្លាប់តាំងពីមុនថ្ងៃ២៨វិច្ឆិកា ដែលសង្ស័យពុលស្រាសដែរ

ក្រៅពីករណីពុលស្រា«ស» ការទទួលទានចំណីអាហាររបស់ប្រជាពលរដ្ឋ នៅតាមទីជនបទ ក៏ជារឿងមួយ គួរឱ្យព្រួយបារម្ភដែរ។ រដ្ឋមន្ត្រីក្រសួងសុខាភិបាល ក៏ប្រាប់ឱ្យពលរដ្ឋបរិភោគស្អាត និងផឹកទឹកស្អាតផងដែរ។

«សូមប្រើប្រាស់ទឹកស្អាត និងម្ហូបអាហារដែលស្អាត និងឆ្អិនជានិច្ច។ ត្រូវលាងដៃជាមួយសាប៊ូ មុនពេលនិងអំឡុងពេលរៀបចំម្អូបអាហារ មុនបរិភោគ និងក្រោយបន្ទោរបង់។ លាងសំអាតបន្លែផ្លែឈើឱ្យបានស្អាតមុនបរិភោគ។ សំអាតសម្ភារប្រើសម្រាប់ចម្អិនម្ហូបអាហារ ឱ្យបានត្រឹមត្រូវ។ ចម្អិនអាហារឱ្យបានឆ្អិនល្អ ជាពិសេស សាច់ សត្វស្លាប ស៊ុត និងអាហារសមុទ្រ»។ នេះជាការអំពាវនាវរបស់លោក ម៉ម ប៊ុនហេង។

បន្ថែមពីនេះ រដ្ឋមន្ត្រីក្រសួងសុខាភិបាល ក៏ប្រាប់ពលរដ្ឋពីរបៀបទុកដាក់ម្ហូបអាហារឱ្យបានត្រឹមត្រូវ ដើម្បីបញ្ចៀសផលប៉ះពាល់ដល់សុខភាពទៀតផង។ បើតាមលោក ម៉ម ប៊ុនហេង ពលរដ្ឋត្រូវទុកដាក់ចំណីអាហារឆៅ និងឆ្អិនដាច់ដោយឡែកពីគ្នា ហើយរក្សាទុកអាហារ ក្នុងកំដៅធម្មតាលើសពី២ម៉ោង ដោយមិនត្រូវរក្សាទុកអាហារច្រើនថ្ងៃទេ ទោះជាស្ថិតក្នុងកម្រិតសីតុណ្ហភាពសុវត្ថិភាពក៏ដោយ។

រដ្ឋមន្ត្រីសុខាភិបាល ក៏ហាមពលរដ្ឋកុំឱ្យប្រើប្រាស់ចំណីអាហារហួសកាលកំណត់ប្រើប្រាស់។ ជាពិសេសត្រូវប្រើប្រាស់ទឹក និងវត្តុធាតុដើមដែលមានសុវត្ថិភាព។ មិនតែប៉ុណ្ណោះពលរដ្ឋត្រូវទុកដាក់ថ្នាំសម្លាប់សត្វល្អិតឱ្យឆ្ងាយពីកន្លែងដែលជាប្រភពទឹក ប្រើប្រាស់ និងពីដៃក្មេង ហើយសូមកុំយកធុង ឬកំប៉ុង ដែលដាក់ថ្នាំសម្លាប់សត្វល្អិត ឬដាក់សារធាតុគីមីផ្សេងៗទៅលាងក្នុងប្រភពទឹកប្រើប្រាស់ ឬលាងបង្ហូរចូលទៅក្នុងស្រះ ឬកន្លែងដែលជាប្រភពយកទឹកមកប្រើឱ្យសោះ។ នេះបើតាមរដ្ឋមន្ត្រីសុខាភិបាល៕