សង្គមអន្តរជាតិ
អន្តរជាតិ
និស្សិតកូរ៉េខាងត្បូងម្នាក់ យកម៉ាស់គេប្រើរួច ទៅកែច្នៃធ្វើកៅអីអង្គុយ និស្សិត Kim Ha-neul អាយុ២៣ឆ្នាំ អង្គុយលើកៅអីដែលខ្លួនកែច្នៃចេញពីម៉ាស់គេប្រើរួច កាលពីថ្ងៃទី ៧ ខែធ្នូ ។ រូបពី Reuters
× គង់តែគេបោះចោលដដែល ហេតុអ្វីមិនយកទៅកែច្នៃធ្វើរបស់ប្រើ? នេះជាសំនួរដែលនិស្សិតកូរ៉េខាងត្បូងម្នាក់លើកឡើង មុនពេលនឹកឃើញគំនិតយកម៉ាស់គេបោះចោលច្រើនសន្ធឹកក្នុងសម័យកូវីដ-១៩ ទៅធ្វើជាកៅអីអង្គុយ។
ធុញទ្រាន់នឹងសំរាមរប៉ាត់រប៉ាយ ហើយគ្រោះថ្នាក់បង្កឡើងដោយម៉ាស់គេប្រើរួច និស្សិតផ្នែករចនាគ្រឿងសង្ហារិមកូរ៉េខាងត្បូងម្នាក់ បានបង្កើតដំណោះស្រាយល្អសម្រាប់បរិស្ថានមួយ តាមរយៈការយកពួកវាទៅច្នៃធ្វើកៅអីអង្គុយ។
«ប្លាស្ទិក គឺអាចកែច្នៃឡើងវិញបាន ដូច្នេះហេតុអ្វីយើងមិនកែច្នៃម៉ាស់ឡើងវិញ ដែលពួកវាក៏ផលិតឡើងដោយប្លាស្ទិកដែរនោះ»។ និស្សិត Kim Ha-neul អាយុ២៣ឆ្នាំ ប្រាប់ទីភ្នាក់ងារព័ត៌មាន Reuters បែបនេះ មុននឹងអះអាងថា ម៉ាស់ភាគច្រើនផលិតឡើងដោយសារធាតុបា្លស្ទិកម្យ៉ាងឈ្មោះថា Polyprophylene ។
សម្រាប់ផលិតចេញកៅអីអង្គុយមួយ និស្សិត Kim ត្រូវការម៉ាស់១៥០០សន្លឹក។ ដើម្បីផ្គត់ផ្គង់ផលិតកម្មនេះ និស្សិត Kim ក្នុងខែមិថុនា បានដាក់ប្រអប់ប្រមែប្រមូលម៉ាស់មួយនៅសាលារៀនខ្លួន សកលវិទ្យាល័យសិល្បៈ និងរចនា Kaywon ក្នុងទីក្រុង Uiwang ភាគខាងត្បូងនៃរដ្ឋធានីសេអ៊ូល ។ ហើយមកដល់ពេលនេះ និស្សិតរូបនេះ ប្រមូលបានម៉ាស់គេប្រើរួច ១ម៉ឺនសន្លឹក ហើយក៏ទទួលបានម៉ាស់ខ្វះគុណភាពជាង១តោនទៀតពីរោងចក្រផងដែរ។
ម៉ាស់គេប្រើរួច អាចជាសម្បុកនៃវីរុស ដូច្នេះនិស្សិត Kim បានរក្សាពួកវាយ៉ាងហោច៤ថ្ងៃក្នុងស្ដុកខ្លួន ដើម្បីកាត់បន្ថយហានិភ័យឆ្លងរាលដាលជំងឺកូវីដ-១៩។ ក្រោយដល់ថ្ងៃកំណត់ និស្សិត Kim ដោះខ្សែនិងជ័រខ្លះចេញ ហើយដុតរំលាយវានៅសីតុណ្ហភាព៣០០អង្សាសេ។
លទ្ធផលចេញមក គឺរូបគេទទួលបានកៅអីអង្គុយជើង៣ កម្ពស់ ៤៥សង់ទីម៉ែត្រ ដែលកែច្នៃឡើងវិញពីម៉ាស់គេប្រើរួចពណ៌ ស ផ្កាឈូក ខៀវ និងខ្មៅ ហើយនិស្សិត Kim ក៏បានដាក់បង្ហាញពួកវាសកលវិទ្យាល័យខ្លួនផងដែរ។
តទៅមុខទៀត និស្សិត Kim សង្ឃឹមផលិតគ្រឿងសង្ហារិមផ្សេងទៀតពីម៉ាស់គេប្រើរួចនេះ ដូចជា តុ ឬអំពូលភ្លើងជាដើម ហើយរូបគេ ក៏ទទូចឲ្យរដ្ឋាភិបាលនិងក្រុមហ៊ុនឯកជនកែច្នៃម៉ាស់គេប្រៃរួចឡើងវិញផងដែរ ។ យោងតាមទិន្នន័យរដ្ឋាភិបាល ក្នុងខែកញ្ញាតែមួយ កូរ៉េខាងត្បូង ផលិតម៉ាស់ជាង១ពាន់លានសន្លឹកសម្រាប់ការប្រើប្រាស់ក្នុងស្រុក៕
Tag:
កូរ៉េខាងត្បូង
ម៉ាស់
កូវីដ-១៩
© រក្សាសិទ្ធិដោយ thmeythmey.com