រដ្ឋអាជ្ញានៃតុលាការព្រហ្មទណ្ឌអន្តរជាតិ (ICC) នៅថ្ងៃទី៩ ធ្នូ បានសម្រេចទម្លាក់ចោលការស៊ើបអង្កេតបឋមចំពោះករណីសង្ស័យការប្រព្រឹត្តឧក្រិដ្ឋកម្មសង្គ្រាមដោយទាហានអង់គ្លេស នៅអ៊ីរ៉ាក់។ ការទម្លាក់ចោលការស៊ើបអង្កេតនេះ បានន័យថា ICC នឹងមិនបើកការស៊ើបអង្កេតពេញលេញឡើយ ហើយទុកឲ្យអង់គ្លេសជាអ្នកកាត់ក្ដីក្នុងសំណុំរឿងបែបនេះក្នុងតុលាការខ្លួនទៀត។
ក្រោយការស៊ើបអង្កេតបឋមអស់រយៈពេលជាង៦ឆ្នាំ ការិយាល័យរដ្ឋអាជ្ញាតុលាការព្រហ្មទណ្ឌអន្តរជាតិ បានទម្លាក់ចោលការស៊ើបអង្កេតទៅលើសកម្មភាពទាហានអង់គ្លេសនៅអ៊ីរ៉ាក់ ជាពិសេសការប្រព្រឹត្តទៅលើអ្នកទោសដែលឃុំខ្លួនដោយទាហានអង់គ្លេស។ ក្នុងរបាយការណ៍ស៊ើបអង្កេតបឋម ការិយាល័យរដ្ឋអាជ្ញាអះអាងថា មានមូលដ្ឋានសមហេតុផលក្នុងជឿថា ទាហានអង់គ្លេសបានប្រព្រឹត្តឧក្រិដ្ឋកម្មសង្គ្រាមសម្លាប់ជនជាតិអ៊ីរ៉ាក់ដែលត្រូវបានឃុំខ្លួន៧នាក់ និងករណីមួយចំនួនទៀត។
អង់គ្លេសវិញ ក៏បើកការស៊ើបអង្កេតលើបណ្ដឹងជាច្រើនទាក់ទងទង្វើរបស់កងទ័ពខ្លួននៅអ៊ីរ៉ាក់ដែរ។ កាលពីខែមិថុនា អាជ្ញាធរស៊ើបអង្កេតដែលស្ថិតក្រោមក្រសួងការពារជាតិអង់គ្លេសអះអាងថា ខ្លួនបានពិនិត្យមើលបណ្តឹងចោទប្រកាន់រាប់ពាន់ជុំវិញការសង្ស័យការប្រព្រឹត្តឧក្រិដ្ឋកម្មសង្គ្រាមដោយទាហានអង់គ្លេសនៅអ៊ីរ៉ាក់ពីឆ្នាំ២០០៣ ដល់ឆ្នាំ២០០៩។ អាជ្ញាធរខាងលើនេះ បញ្ជាក់ថា ក្នុងបណ្តឹងចំនួនរាប់ពាន់ មានតែមួយប៉ុណ្ណោះដែលនឹងត្រូវពិនិត្យបន្ត។
ទោះជាអាចមានឧក្រិដ្ឋកម្មសង្គ្រាមយ៉ាងណាក្តី លោកស្រី Fatou Bensouda អគ្គរដ្ឋអាជ្ញានៃតុលាការអះអាងថា ការិយាល័យរបស់លោកស្រីរកមិនឃើញភស្តុតាងអ្វីដែលបង្ហាញថា អង់គ្លេសការពារអ្នកដែលប្រព្រឹត្តបទល្មើសនោះពីការកាត់ក្តីនៅចំពោះមុខតុលាការក្នុងស្រុកឡើយ។ លោកស្រី Bensouda ទទួលស្គាល់ថា អង់គ្លេសប្រឹងប្រែងក្នុងការស៊ើបអង្កេតករណីល្មើសទាំងអស់នេះ។
ទោះជាយ៉ាងណា អគ្គរដ្ឋអាជ្ញារូបនេះ ក៏រិះគន់អង់គ្លេសផង ព្រោះគ្មានករណីល្មើសច្បាប់ណាមួយត្រូវបានបញ្ជូនទៅកាត់ទោសក្រោយការស៊ើបអង្កេតនៅឡើយ។ នេះបើតាមទីភ្នាក់ងារព័ត៌មាន AFP ។
បន្ថែមពីលើនេះ ការិយាល័យរដ្ឋអាជ្ញា ICC ក៏បារម្ភពីការសម្រេចចិត្តនានាអំឡុងពេលអង់គ្លេសធ្វើការស៊ើបអង្កេត។
ទាក់ទងរឿងនេះ លោកស្រីអគ្គរដ្ឋអាជ្ញាលើកឡើងថា ICC មិនមែនជាស្ថាប័នដែលសម្រេចលើនីតិវិធីស៊ើបរបស់ប្រទេសនីមួយៗល្មើសទៅនឹងច្បាប់សិទ្ធិមនុស្ស ឬច្បាប់ក្នុងស្រុកឡើយ តែ ICC អនុវត្តសមត្ថកិច្ចរបស់ខ្លួនតែនៅក្នុងករណីព្រហ្មទណ្ឌអន្តជាតិតែប៉ុណ្ណោះ។
តុលាការព្រហ្មទណ្ឌអន្តរជាតិ បើកការស៊ើបអង្កេត និងឈានទៅកាត់ទោស ទៅលើតែករណីណាដែលរដ្ឋជាសមាជិករបស់ខ្លួនប្រព្រឹត្តបទឧក្រិដ្ឋ ហើយរដ្ឋនោះគ្មានសមត្ថភាព ឬគ្មានឆន្ទៈក្នុងការស៊ើបអង្កេត ឬកាត់ក្តីតែប៉ុណ្ណោះ។ តុលាការនេះ ត្រូវបានសហគមន៍អន្តរជាតិចាត់ទុកជាជម្រើសចុងក្រោយ។
ការសម្រេចទម្លាក់ចោលការស៊ើបអង្កេតរបស់ICCនេះ រងការរិះគន់ពីអង្គការឃ្លាំមើលសិទ្ធិមនុស្ស(HRW)។ HRW អះអាងថា រដ្ឋាភិបាលអង់គ្លេសពុំសូវជាយកចិត្តទុកដាក់ក្នុងការស៊ើបអង្កេតលើ និងកាត់ទោសអំពើដែលប្រព្រឹត្តដោយទាហានអង់គ្លេសប៉ុន្មានឡើយ។ លោកClive Baldwin មន្ត្រីច្បាប់ HRW អះអាងថាការធ្វើបែបនេះ នឹងនាំឲ្យគេមើលឃើញថាតុលាការមានភាពលម្អៀង បើប្រៀបធៀបទៅនឹងការស៊ើបអង្កេតទៅលើទាហានអាមេរិកនៅអាហ្វហ្កានីស្ថាន៕