ជាតិ
អ្នកស្រី ឆាយ ស៊ីវលីន៖ វិស័យទេសចរណ៍កាន់តែពិបាកងើបឡើង ដោយសារព្រឹត្តិការណ៍សហគមន៍២៨វិច្ឆិកា
× ភ្នំពេញ៖ វិស័យទេសចរណ៍កម្ពុជា ទើបងើបឡើងវិញបានបន្តិចប៉ុណ្ណោះ ក្រោយមានការឈប់សម្រាករយៈពេលវែង ប៉ុន្តែក្រោយព្រឹត្តិការណ៍សហគមន៍ ២៨ វិច្ឆិកា វិស័យនេះ នឹងអាចទទួលរងផលប៉ះពាល់កាន់តែធ្ងន់ធ្ងរជាងមុន ហើយក៏ពិបាកងើបឡើងវិញដែរ។ នេះជាការអះអាងរបស់អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា។
ការរីករាលដាលនៃជំងឺកូវីដ-១៩ ចូលសហគមន៍ បានក្លាយជាបញ្ហាប្រឈមមួយសម្រាប់វិស័យទេសចរណ៍ក្នុងប្រទេសកម្ពុជា។ ចាប់តាំងពីថ្ងៃមានការឆ្លងចូលសហគមន៍មក តំបន់ទេសចរណ៍មួយចំនួន បានបាត់ភ្ញៀវទេសចរជាច្រើន ឬស្ទើរទាំងស្រុងតែម្តង។ សម្រាប់បញ្ហានេះ អ្នកស្រី ឆាយ ស៊ីវលីន យល់ឃើញថា វិស័យទេសចរណ៍កម្ពុជា នឹងជួបបញ្ហាធ្ងន់ធ្ងរ ដែលអាចពិបាកងើបឡើងវិញ។
ប្រធានសមាគមទីភ្នាក់ងារទេសចរណ៍រូបនេះ បានលើកឡើងដូច្នេះថា៖ « ពេលបាត់ទេសចរបរទេស ធ្វើឲ្យប៉ះពាល់ មួយខែបន្តិចៗ កាន់តែខ្លាំងទៅៗ ប៉ុន្តែបន្ទាប់ពីមានការជំរុញទេសចរណ៍ ក្នុងស្រុក អាចជួយដល់វិស័យទេសចរណ៍បានខ្លះ។ ដោយឡែកកាលថ្ងៃ២៨ វិច្ឆិកា កន្លងមកមានការរីករាលដាលចូលសហគមន៍ ក៏បានធ្វើឲ្យវិស័យទេសចរណ៍យើងមានការធ្លាក់ចុះទៅវិញ។ យើងមើលឃើញថា ការដួលលើកនេះ ពិបាកនឹងងើប។ លើកមុនយើងសំអាងលើភ្ញៀវទេសចរក្នុងស្រុក ឥឡូវទេសចរក្នុងស្រុកអត់ទៀត ដោយសារវាជាការរីករាលដាលដល់សហគមន៍ ចឹងយើងប៉ះពាល់យ៉ាងខ្លាំង » ។
ការឆ្លងជំងឺកូវីដ-១៩ ចូលសហគមន៍នេះ អាចធ្វើឲ្យវិស័យទេសចរណ៍កម្ពុជា មានផលប៉ះពាល់ច្រើនដូចជា ការបិទទ្វាអាជីវកម្មទេសចរណ៍ ការបាត់ធនធានមនុស្សក្នុងវិស័យទេសចរណ៍ ជួបហានិភ័យកង្វះការងារធ្វើ របស់បុគ្គលិកដែលបម្រើការក្នុងអាជីវកម្មទេសចរណ៍ដែលបានបិទទ្វា និងអាចជួបបញ្ហាបំណុល។ នេះជាការបន្ថែមរបស់លោកស្រី ឆាយ ស៊ីវលីន ។
លោកស្រីបានបន្តទៀតថា ការរីករាលដាលនៃជំងឺកូវីដ-១៩ ក្នុងសហគមន៍នេះ ក៏បានរាំងស្ទះក្នុង ការអនុវត្តវិធានការណ៍ Travel Bubble របស់ក្រសួងទេសចរណ៍ ដែលអនុញ្ញាតិឲ្យភ្ញៀវទេសចរមកពីកន្លែងមានសុវត្ថិភាព អាចដើរកម្សាន្តក្នុងប្រទេសកម្ពុជាបាន។ លោកស្រីបញ្ជាក់ដូច្នេះថា៖ « ការអនុវត្ត Travel Bubble នេះលុះត្រាមានការព្រមព្រៀងរវាង ប្រទេសដែលយើងចង់អនុវត្តវិធានការនេះ។ បើសិនយើងមានការរីករាលដាលកើនឡើងរហូតអ៊ីចឹង គេក៏អត់ហ៊ានធ្វើកុងត្រាក្នុងការបញ្ជូនភ្ញៀវមកយើងដែរ ហើយយើងទៅគេវិញក៏គេមិនហ៊ានទទួលដែល »។
អ្នកស្រី_ឆាយ_ស៊ីវលីន_ប្រធានសមាគមទីភ្នាក់ងាទេសចរណ៍កម្ពុជា
អ្នកស្រី ឆាយ ស៊ីវលីន បានលើកឡើងផងដែរថា ក្នុងការដោះស្រាយបញ្ហានេះ មិនអាចរង់ចាំរហូតដល់មានវ៉ាក់សាំងនោះទេ តែអ្វីដែលយើងធ្វើបាន គឺរួមគ្នាទប់ស្កាត់ការ ឆ្លងជំងឺកូវីដ-១៩ បន្តទៀត ដើម្បីឲ្យភ្ញៀវទេសចរក្នុងស្រុក អាចដើរកម្សាន្តឡើងវិញ។
សូមជម្រាបថា គិតមកដល់ថ្ងៃទី១០ ខែធ្នូ ឆ្នាំ២០២០នេះ ចំនួនអ្នកឆ្លងជំងឺកូវីដ-១៩ នៅកម្ពុជាកើនដល់ ៣៥៦ករណី ដោយក្នុងនោះមានពាក់ព័ន្ធព្រឹត្តិការណ៍សហគមន៍២៨វិច្ឆិកា ចំនួន៣៩នាក់។ ចំនួនអ្នកជាសះស្បើយមានចំនួន៣០៧ ករណី និងអ្នកដែលកំពុងសម្រាកព្យាបាលមាន ៣៦នាក់នាក់ នៅមន្ទីរពេទ្យមិត្តភាពខ្មែរ សូវៀត និង១៣នាក់នៅមណ្ឌលសុខភាពចាក់អង្រែ៕
Tag:
ឆាយ សៀវលីន
ទេសចរណ៍
កូវីដ-១៩
ThmeyThmey25
© រក្សាសិទ្ធិដោយ thmeythmey.com