កូរ៉េខាងត្បូង ពង្រាយយោធានៅសេអ៊ូលដើម្បីជួយទប់ទល់ការកើនឡើងករណីឆ្លងកូវីដ-១៩

COVID-19

អន្តរជាតិ

កូរ៉េខាងត្បូង ពង្រាយយោធានៅសេអ៊ូលដើម្បីជួយទប់ទល់ការកើនឡើងករណីឆ្លងកូវីដ-១៩

11, Dec 2020 , 3:44 pm

រូបភាព

ដោយ: ធៀន ភារិន្ទ

កូរ៉េខាងត្បូង នឹងពង្រោយបុគ្គលិកយោធា នៅក្នុងទីក្រុងសេអ៊ូល និងតំបន់ជុំវិញដើម្បីជួយសម្រួលបុគ្គលិកសុខាភិបាល ក្នុងទប់ស្កាត់ការកើនឡើនករណីឆ្លងនៃកូវីដ-១៩ ។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap នៅថ្ងៃទី១១ ខែធ្នូ។ ការឈានដល់ការពង្រោយយោធានៅក្នុងទីក្រុងបែបនេះ ធ្វើឡើងស្របពេលករណីឆ្លងកូវីដ-១៩ កំពុងហក់ឡើង និងខ្វះកន្លែងព្យាបាលអ្នកជំងឺនៅក្នុងទីក្រុង។

មួយរយៈចុងក្រោយនេះ កូរ៉េខាងខាងត្បូង បានកើនឡើងករណីឆ្លងកូវីដ-១៩ ជាថ្មី ជាពិសេសនៅក្នុងទីក្រុងសេអ៊ូល និងតំបន់ជុំវិញដូចជាខេត្តGyeonggi និងទីក្រុងកំពង់ផែ Incheon ។ ករណីឆ្លងនៅថ្ងៃទី១១ ខែធ្នូ មានចំនួន ៦៧៣ករណី ខណៈអ្នកស្លាប់មានចំនួន ៨នាក់។ ការកើនឡើងករណីឆ្លងបែបនេះ បានធ្វើឲ្យអាជ្ញាធរកូរ៉េខាងត្បូង ត្រូវបង្កើនកន្លែងព្យាបាលអ្នកជំងឺកូវីដ-១៩ បន្ថែមទៀត ដោយច្នៃកុងទីណឺ សម្រាប់ដាក់ព្យាបាលអ្នកជំងឺនៅក្នុងទីក្រុងសេអ៊ូល។ ចំណែកអ្នកជំងឺ ដែលមានស្ថានភាពធ្ងន់ធ្ងរ បានកើនដល់ជិត១៧០នាក់ផងដែរ។

ដើម្បីជួយសម្រួលការទប់ស្កាត់កូវីដ-១៩ ជាមួយបុគ្គលិកសុខាភិបាល លោក Chung Sye-kyun នាយករដ្ឋមន្ត្រីកូរ៉េខាងត្បូង បានអះអាងថា លោកបានបញ្ជាឲ្យពង្រាយកងកម្លាំងយោធា ប៉ូលិស មន្ត្រីរដ្ឋាភិបាលចំនួន ៨០០នាក់ នៅក្នុងទីក្រុងសេអ៊ូល ដើម្បីតាមដាន ក៏ដូចជាទប់ស្កាត់ការឆ្លងកូរ៉ូណាវីរុស។

តាមការចុះផ្សាយរបស់ទីភ្នាក់ងារព័ត៌មានYonhap លោកនាយករដ្ឋមន្ត្រីបានបន្តថា បុគ្គលិកសុខាភិបាល បានខិតខំយ៉ាងខ្លាំង ដើម្បីស្វែងរកអ្នកឆ្លងកូវីដ-១៩។ ដើម្បីយកឈ្នះលើជំងឺរាតត្បាតនេះ ការបញ្ជូនកម្លាំងយោធា គឺសំខាន់បំផុតក្នុងការការពារករណីឆ្លង។

ដោយសារតែករណីឆ្លងបែបនេះ រដ្ឋាភិបាលកូរ៉េខាងត្បូង បានអនុវត្តការរក្សាគម្លាតសុវត្ថិភាពទៅកម្រិត២,៥ នៅក្នុងតំបន់មួយចំនួន និងប្រាប់ឲ្យប្រជាជនរបស់ខ្លួនប្រុងប្រយ័ត្នពីករណីឆ្លង។ បន្ថែមពីលើនេះ រដ្ឋាភិបាល ក៏ត្រៀមបង្កើតកន្លែងធ្វើតេស្តរកកូវីដ-១៩ ចំនួន ១៥០កន្លែងនៅក្នុងទីក្រុងផងដែរ។

សូមបញ្ជាក់ថា ករណីឆ្លងកូវីដ-១៩ សរុបរបស់កូរ៉េខាងត្បូង មានចំនួន ៤០៧៨៦ករណី និងអ្នកស្លាប់មានចំនួន ៥៧២នាក់។ ចំណែកអ្នកជាសះស្បើយមានចំនួន ៣១១៥៧នាក់៕