ក្រសួងវប្បធម៌ បន្តបិទសារមន្ទីរ រោងភាពយន្ត និងរោងសម្ដែងគ្រប់ប្រភេទ ខណៈស្ថានភាពកូវីដ-១៩ មិនថមថយ

ជាតិ

ក្រសួងវប្បធម៌ បន្តបិទសារមន្ទីរ រោងភាពយន្ត និងរោងសម្ដែងគ្រប់ប្រភេទ ខណៈស្ថានភាពកូវីដ-១៩ មិនថមថយ

11, Dec 2020 , 4:24 pm

រូបភាព

ដោយ: ប៉ូ សាគុន

ភ្នំពេញ៖ ក្រសួងវប្បធម៌ និងវិចិត្រសិល្បៈ បន្តបិទសារមន្ទីរ រោងភាពយន្ត និងរោងសម្ដែងសិល្បៈគ្រប់ប្រភេទនៅទូទាំងប្រទេស ជាបណ្ដោះអាសន្ន ។ ដើម្បីទប់ស្កាត់ជំងឺកូវីដ-១៩។ នេះបើតាមក្រសួងវប្បធម៌ នៅថ្ងៃទី១១ ធ្នូ។

មូលហេតុដែលក្រសួងមិនទាន់អាចអនុញ្ញាតឲ្យកន្លែងសម្ដែងទាំងនោះ បើកដំណើរឡើងវិញនេះ ដោយសារមើលឃើញពីផលប៉ះពាល់នៃជំងឺកូវីដ-១៩ នៃ«ព្រឹត្តិការណ៍សហគមន៍២៨ វិច្ឆិកា» នៅតែបន្តរីករាលដាលទៅក្នុងសហគមន៍ និងដើម្បីចូលរួមទប់ស្កាត់ការរីករាលដាលនេះ។ ក្រសួងវប្បធម៌ នឹងជូនដំណឹងជាថ្មី នៅពេលដែលស្ថានភាពធូរស្រាល។

អ្នកកើតកូវីដ-១៩ ពីព្រឹត្តិការណ៍សហគមន៍២៨វិច្ឆិកា ឡើងដល់៤០នាក់ ក្នុងនោះមានប្រុស២១នាក់ ស្រី១៩នាក់។ ការតេស្តលើកទី៣សម្រាប់អ្នកពាក់ព័ន្ធ ប្រព្រឹត្តទៅនៅថ្ងៃទី១២ ខែធ្នូ នៅក្រសួងមហាផ្ទៃ កីឡដ្ឋានជាតិអូឡាំពិក និងទីតាំងផ្សេងៗទៀតដែលបានកំណត់។

សរុបនៅកម្ពុជាទាំងមូល អ្នកកើតកូវីដ-១៩ មានចំនួន៣៥៧នាក់ ក្នុងនោះ៣០៧នាក់ បានជាសះស្បើយ។ អ្នកជំងឺដែលកំពុងសម្រាកព្យាបាល មាន៣៧នាក់នៅពេទ្យមិត្តភាពខ្មែរ សូវៀត និង១៣នាក់នៅមណ្ឌលសុខភាពចាក់អង្រែ៕