អន្តរជាតិ
នយោបាយអន្តរជាតិ
លោក ត្រាំ រិះគន់តុលាការកំពូលដែលទាត់ចោលបណ្ដឹងរដ្ឋ Texas លោក ដូណាល់ ត្រាំ ប្រធានាធិបតីជិតផុតអាណ្តិតអាមេរិក និងអង្គុយនៅក្បែរលោក គឺរដ្ឋមន្ត្រីយុត្តិធម៌អាមេរិក William Barr ។ រូបពី AFP
× ប្រធានាធិបតី ដូណាល់ ត្រាំ បានរិះគន់ធ្ងន់ៗលើតុលាការកំពូលអាមេរិក ក្រោយបដិសេធបណ្ដឹងរបស់រដ្ឋ Texas ដែលព្យាយាមផាត់ចោលជ័យជម្នះលោក ចូ បៃឌិន ក្នុងការបោះឆ្នោតថ្ងៃទី៣ ខែវិច្ឆិកា។ លើសពីរិះគន់តុលាការកំពូល លោក ត្រាំ ក៏ព្រមានបណ្ដេញរដ្ឋមន្ត្រីយុត្តិធម៌អាមេរិកពីតំណែងផងដែរ។
កាលពីថ្ងៃទី ១១ ខែធ្នូ តុលាការកំពូលអាមេរិក បានបដិសេធបណ្ដឹងរបស់រដ្ឋ Texas ដែលចង់កែលទ្ធផលឆ្នោតក្នុងរដ្ឋចំនួន៤ ដែលប្រធានាធិបតីជាប់ឆ្នោត បៃឌិន ឈ្នះ។ ការសម្រេចចិត្តនេះ ធ្វើឡើង៣ថ្ងៃមុនជំនួបរបស់ប្រតិភូបោះឆ្នោតអាមេរិក នឹងបោះឆ្នោតទទួលស្គាល់ជ័យជម្នះលោកបៃឌិនជាផ្លូវការ។
លោក ត្រាំ បានបដិសេធទទួលស្គាល់លទ្ធផលឆ្នោត ទោះបីជាចាញ់លោកបៃឌិន ដែលមានប្រតិភូបោះឆ្នោតរហូតដល់ ៣០៦ ទល់នឹងលោក ២៣២ ប៉ុណ្ណោះ ។ តាមរដ្ឋធម្មនុញ្ញអាមេរិក បេក្ខជនប្រធានាធិបតី ត្រូវការប្រតិភូបោះឆ្នោតយ៉ាងតិច ២៧០ ដើម្បីគ្រងសេតវិមានអាមេរិក។
មួយថ្ងៃក្រោយការចេញសេចក្តីសម្រេចទាត់ចោលបណ្ដឹងរដ្ឋ Texas លោក ត្រាំ បានសរសេរលើបណ្ដាញសង្គម Twitter ថា ទង្វើនេះគឺជាការខុសធ្លោយដ៏ធំធេងរបស់តុលាការកំពូល ហើយសង្កត់ធ្ងន់ថា ពលរដ្ឋអាមេរិក ត្រូវបានបោកប្រាស់។
ទាក់ទិននឹងការបដិសេធបណ្ដឹងនេះ តុលាការកំពូលអាមេរិក បានអះអាងថា រដ្ឋ Texas អត់មានមូលដ្ឋានច្បាប់គ្រប់គ្រាន់ដើម្បីលើកយកសំណុំរឿងនេះទៅជំនុំជម្រះក្នុងតុលាការឡើយ។ គួររបញ្ជាក់បន្តិចថា បណ្ដឹងរបស់រដ្ឋTexas អះអាងថា ការកែប្រែនីតិវិធីបោះឆ្នោតពីសំណាក់រដ្ឋទាំង៤ រួមមាន Georgia, Michigan, Pennsylvania និង Wisconsin ក្នុងកាលៈទេសៈជំងឺកូវីដ-១៩ ដោយពង្រីកការបោះឆ្នោតតាមរយៈប្រៃសណីយ៍ ជារឿងខុសច្បាប់។
បន្ថែមពីរិះគន់ធ្ងន់ៗលើតុលាការកំពូល លោកប្រធានាធិបតី ត្រាំ ក៏បានវាយប្រហារលើរដ្ឋមន្ត្រីយុត្តិធម៌អាមេរិក William Barr ផងដែរ ក្រោយកាសែតអាមេរិក Wall Street Journal បានចុះផ្សាយថាលោករដ្ឋមន្ត្រីបានដឹងមុនពីព័ត៌មានពាក់ព័ន្ធការស៊ើបអង្កេតករណីពន្ធរបស់កូនប្រុសលោកបៃឌិន គឺ Hunter តែសម្រេចនៅស្ងៀម។ ត្រង់ចំណុចនេះ លោក ត្រាំ បានព្រមានបណ្ដេញលោក Barr ពីតំណែង ហើយខកចិត្តជាខ្លាំងចំពោះលោក Barr ។
មែនទែនទៅ វាសនាលោករដ្ឋមន្ត្រី Barr ក្នុងពេលចុងក្រោយនៃរដ្ឋបាលលោកត្រាំ កាន់តែមានភាពស្រពេចស្រពិល ចាប់តាំងពីលោកបានបញ្ជាក់កាលពីសប្ដាហ៍មុនថា ការស៊ើបអង្កេតក្រសួងយុត្តិធម៌អាមេរិក រកមិនឃើញភស្តុតាងដំកំភួនណាមួយពាក់ព័ន្ធនឹងការលួចបន្លំទ្រង់ទ្រាយធំក្នុងការបោះឆ្នោតអាមេរិក។ នេះគឺផ្ទុយពីការអះអាងរបស់លោកត្រាំ ៕
Tag:
សហរដ្ឋអាមេរិក
ដូណាល់ ត្រាំ
© រក្សាសិទ្ធិដោយ thmeythmey.com