ជារៀងរាល់ថ្ងៃស្រ្ដីរូបនេះប្រាប់ថា អាចផលិតស្ករត្នោតពី១០ទៅ១៥គីឡូក្រាម គឺអាចរម្ងាស់ទឹកត្នោតបាន២ទៅ៣ខ្ទះ ដែលក្នុងមួយខ្ទះៗប្រើទឹកត្នោតអស់២៥ទៅ៤០លីត្រ ផលិតជាស្ករបាន៥គីឡូក្រាម និងត្រូវប្រើពេលរម្ងាស់រហូត៣ម៉ោង។ ក្នុងស្កររាវមួយគីឡូក្រាម អ្នកស្រី សាវ៉ាត លក់បានក្នុងតម្លៃ ៨ពាន់រៀល ដែលជាស្ករល្អ និងឆ្ងាញ់។ ក្រៅពីស្កររាវ អ្នកស្រីក៏មានធ្វើស្ករផែន និងស្ករហ៊ុយ (ស្ករលាយកាហ្វេ) ផងដែរ។


មានវ័យ៤៦ឆ្នាំ អ្នកស្រី វណ្ណ សាវ៉ាត បានចាប់របរផលិតស្ករត្នោត ចាប់តាំងពីអ្នកស្រីមានវ័យខ្ទង់២០ឆ្នាំ។ របរនេះ ដ្បិតថាមានភាពនឿយហត់មិនចាញ់ធ្វើស្រែចម្ការប៉ុន្មាននោះទេ តែវាបានជួយឱ្យអ្នកស្រីមានពេលគ្រប់គ្រាន់ដើម្បីមើលកូនប្រុសស្រី៣នាក់នៅផ្ទះ រៀបចំម្ហូបអាហារជូនពួកគាត់ពេលត្រឡប់មកពីរៀនវិញ។ មិនតែប៉ុណ្ណោះ របរនេះជួយសេដ្ឋកិច្ចគ្រួសារអ្នកស្រី សាវ៉ាត មួយផ្នែកធំ។ របរមួយនេះ អាចចិញ្ចឹមគ្រួសារអ្នកស្រី សាវ៉ាត បានងាយស្រួល ហើយអ្នកស្រី ក៏មិនចង់ធ្វើការងារអ្វីផ្សេងដែរ៕