ភ្នំពេញ៖ ២ឆ្នាំហើយ ការសិក្សាស្ដីពីការកំណត់ប្រាក់ឈ្នួលគោលដល់កម្មករសំណង់នេះ មិនទាន់ឃើញមានលទ្ធផលផ្លូវការនៅឡើយ។ មេសហជីពសេដ្ឋកិច្ចក្រៅប្រព័ន្ធ ស្នើឲ្យរដ្ឋាភិបាលពន្លឿនការកំណត់ប្រាក់ឈ្នួលគោលដល់កម្មករសំណង់ ។ ក្រសួងការងារ និងបណ្ដុះបណ្ដាលវិជ្ជាជីវៈ នៅតែអះអាងថា ខ្លួនកំពុងសិក្សាជាមួយស្ថាប័នពាក់ព័ន្ធ ដើម្បីពង្រីកវិសាលភាពប្រាក់ឈ្នួលអប្បបរមា។
អគ្គលេខាធិការនៃសហព័ន្ធសហជីពកម្មករសំណង់ និងព្រៃឈើកម្ពុជាលោក យ៉ាន់ ធី បានបញ្ជាក់ថា សំណើរបស់ខ្លួននេះ ក្នុងគោលបំណងឲ្យកម្មករទទួលបានប្រាក់ឈ្នួលគោលច្បាស់លាស់ ដោយគ្មានការកេងប្រវ័ញ្ច ។ ជាពិសេសទទួលបានប្រាក់ឈ្នួលស្មើភាពគ្នា រវាងកម្មករបរទេស និងពលរដ្ឋខ្មែរ។
ថ្លែងក្នុងវេទិកាសិទ្ធិមនុស្ស ក្រោយប្រធានបទ សិទ្ធមនុស្សក្នុងវិស័យសំណង់ កាលពីថ្ងៃទី១៣ ធ្នូ លោក យ៉ាន់ ធី បានលើកឡើងថា៖ «ស្នើឲ្យរដ្ឋាភិបាលគិតគូ ការកំណត់ប្រាក់ឈ្នួលគោលក្នុងវិស័យសំណង់ ដោយយោងតាមប្រសាសន៍របស់នាយករដ្ឋមន្រី្តបាននិយាយកាលពីថ្ងៃទី១២ ខែធ្នូ ឆ្នាំ២០១៨ នៅកំពង់ស្ពឺពេលជួបកម្មករ គឺនិយាយឲ្យរដ្ឋមន្រី្តក្រសួងការងារហ្នឹង ពិនិត្យពិចារណាក្នុងការកំណត់ប្រាក់ឈ្នួលគោល ក្នុងវិស័យសំណង់និងវិស័យដទៃផ្សេងទៀត។ អ៊ីចឹងមកដល់ពេលនេះ២ឆ្នាំហើយ ស្នើឲ្យពិនិត្យហ្នឹងកុំទុកយូរពេក ហើយគួរតែគិតគូទៅក្នុងវិស័យសំណង់នេះ»។
ជាមួយគ្នានេះលោក យ៉ាន់ ធី ក៏ស្នើឲ្យរដ្ឋាភិបាលនិងក្រសួងពាក់ព័ន្ធ គិតគូរពីការតាក់តែងច្បាប់ ស្ដីអំពីសុខភាព សុវត្ថិភាព ដើម្បីការពារដល់កម្មករសំណង់ និងពង្រីកវិសាលភាពនៃវិស័យគាំពារសង្គម ដល់កម្មករក្នុងវិស័យសំណង់។ សម្រាប់លោក យ៉ាន់ធី រដ្ឋាភិបាលគួរពិនិត្យឡើងវិញ ដោយចេញសេចក្ដីប្រកាសឬច្បាប់ សម្រាប់ត្រួតពិនិត្យក្រុមហ៊ុនម៉ៅការសំណង់ កុំឲ្យមានការម៉ៅការតៗគ្នាច្រើន ក្នុងគម្រោងសាងសង់ ។ លោកអះអាងថា ក្រុមហ៊ុនម៉ៅការសំណង់ច្រើនក្នុងទីតាំងឬគម្រោងខ្លះ គឺមានភាពស្មុកស្មាញ ពិបាករកអ្នកទទួលខុសត្រូវ នៅពេលមានហេតុការណ៍ណាមួយកើតឡើង ឬប៉ះពាល់ដល់កម្មករ។
កន្លងមកសម្ដេច ហ៊ុន សែន នាយករដ្ឋមន្រី្ត បានបញ្ជាឲ្យរដ្ឋមន្រី្តក្រសួងការងារ និងបណ្ដុះបណ្ដាលវិជ្ជាជីវៈ ធ្វើការសិក្សាលើកករណីលើប្រាក់ឈ្នួលគោលរបស់កម្មករសំណង់នេះ កាលពីឆ្នាំ២០១៨។
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ បានប្រាប់សារព័ត៌មានថ្មីៗ តាមប្រព័ន្ធTelegram នៅថ្ងៃទី១៤ ធ្នូថា ក្រសួងកំពុងសិក្សាជាមួយស្ថាប័នពាក់ព័ន្ធ ដើម្បីពង្រីកវិសាលភាពប្រាក់ឈ្នួលអប្បបរមាក្នុងវិស័យសំណង់។ លោក អះអាងយ៉ាងដូច្នេះថា៖ «យើងកំពុងសិក្សាជាមួយដៃគូ និងស្ថាប័នពាក់ព័ន្ធលើការពង្រីកវិសាលភាពប្រាក់ឈ្នួលអប្បបរមាទៅផ្នែកសំណង់»។
ក្នុងកិច្ចសម្ភាសន៍ជាមួយសារព័ត៌មានថ្មីៗតាមទូរស័ព្ទនៅនេះដែរថា លោក សូ ឆ្លូញ អនុប្រធាននៃសហព័ន្ធសហជីពកម្មករសំណង់ និងព្រៃឈើកម្ពុជាថ្លែងថា ការសិក្សារបស់ក្រសួងប្រើប្រាស់ពេលវេលាយូរ ហើយមិនទាន់ឃើញមានលទ្ធផល។ តែយ៉ាងណាសហជីពលោក រីករាយនឹងចូលរួមសហការជាមួយក្រសួង ដើម្បីប្រយោជន៍រួមរបស់កម្មករ។
«កន្លងមកកាលពី២០១៩ ខាងខ្ញុំបានជួបរដ្ឋមន្រី្តក្រសួងការងារ សាកសួរជុំវិញការសិក្សានេះដែរ លោកប្រាប់ថាកំពុងសិក្សា ហើយយើងមិនដឹងទេថា ដំណើរការដល់ណាហើយ អ៊ីចឹងបានឆ្នាំនេះ យើងស្នើឲ្យរដ្ឋនិងក្រសួងពន្លឿន ព្រោះការកំណត់ប្រាក់ឈ្នួលគោលនេះ ផ្ដល់ផលប្រយោជន៍ដល់កម្មករច្រើនណាស់ គឺគ្មានការគេងប្រវ័ញ្ចប្រាក់ឈ្នួល ហើយបុរសស្រី្ត ជនបរទេស និងពលរដ្ឋខ្មែរ នឹងទទួលបានប្រាក់ស្មើគ្នា ខណៈដែលបំពេញការងារដូចគ្នា»។ នេះបើតាមការលើកឡើងរបស់លោក សូ ឆ្នូញ។
សូមជម្រាបថា ឆមាសទី១ក្នុងឆ្នាំ២០២០នេះ គម្រោងសាងសង់នៅកម្ពុជា មានជាង៣៧០០គម្រោង និងមានទំហំទឹកប្រាក់ជិត៦ពាន់លានដុល្លារ៕