ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ ប៉ាន់ស្មានថា ផលស្រូវវស្សាឆ្នាំ២០២០នេះ អាចមានជាង៨.៥លានតោន ។ ចំនួននេះកើនលើសឆ្នាំមុន ដែលមានជាង៨.២លានតោន ដែលស្មើនឹងជាង៣០ម៉ឺនតោន។ ក្រៅពីប៉ាន់ស្មានបរិមាណផលស្រូវរដូវវស្សា លោក វេង សាខុន រដ្ឋមន្ត្រីក្រសួងកសិកម្ម ក៏បានឲ្យដឹងដែរថា ការងារស្តារដំណាំស្រូវឡើងវិញ ក៏សម្រេចបានជាង ៨៩ភាគរយហើយដែរ គិតត្រឹមថ្ងៃទី១០ ធ្នូ។
ខណៈដែលប្រជាកសិករមួយចំនួនធំ កំពុងមមាញឹក នឹងការប្រមូលផលស្រូវវស្សារបស់ខ្លួន នៅថ្ងៃទី១១ ធ្នូនេះ លោកវេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបញ្ចេញតួលេខប៉ាន់ស្មានអំពីទិន្នផលស្រូវវស្សា សម្រាប់ឆ្នាំ២០២០នេះ។
លោក វេង សាខុន បានសរសេរនៅលើបណ្តាញហ្វេសប៊ុករបស់ខ្លួនថា បរិមាណផលស្រូវរដូវវស្សា អាចទទួលបានប្រមាណ ៨ ៥៩៦ ៨៧៧ តោន។ លោក សរសេរបញ្ជាក់លម្អិតដូច្នេះ៖«បន្ទាប់ពីបានពិភាក្សា និងផ្ទៀងផ្ទាត់ទិន្នន័យ ជាមួយមន្ទីរកសិកម្ម រុក្ខាប្រមាញ់ និងនេសាទ រាជធានី/ ខេត្ត នៅជំហានទី១មក ការប៉ាន់ស្មានជាបឋម នៃបរិមាណផលស្រូវរដូវវស្សាឆ្នាំ២០២០ នេះ នឹងអាចទទួលបានជាមធ្យមចំនួន ៣ ១២២គីឡូក្រោម ក្នុងមួយហិកតា ឬប្រមាណប្រមាណ ៨ ៥៩៦ ៨៧៧ តោន»។
ទិន្នផលនេះ កើនលើសបរិមាណស្រូវរដូវវស្សា កាលពីឆ្នាំ២០១៩ ជាង៣០ម៉ឺនតោ។ នេះបើតាមលោករដ្ឋមន្ត្រីក្រសួងកសិកម្ម។
ក្រៅពីបង្ហាញការព្យាករបរិមាណផលស្រូវរដូវវស្សា លោករដ្ឋមន្ត្រីវេង សាខុ ក៏បានឲ្យដឹងដែរថា គិតត្រឹមថ្ងៃទី១០ ធ្នូ ការងារស្តារដំណាំស្រូវដែលខូចខាតដោយទឹកជំនន់នោះ សម្រេចបានជាង៨៩ភាគរយហើយ នៅក្នុងរាជធានី-ខេត្ត ទាំង១៩ ដែលរងគ្រោះ។
ដ្បិតតែការងារស្តារដំណាំស្រូវមិនទាន់បញ្ចប់ជាស្ថាពរ ប៉ុន្តែកន្លងមក លោក ឡាយ វិសិដ្ឋ ប្រធានមន្ទីរកសិកម្មខេត្តពោធិ៍សាត់ និងលោក ប៉ាង វណ្ណាសេដ្ឋ ប្រធានមន្ទីរកសិកម្មខេត្តបន្ទាយមានជ័យ ធ្លាប់បានពន្យល់ប្រាប់សារព័ត៌មានThmeyThmey25 ថាស្រូវដែលបានជន់លិចហាក់មានការលូតលាស់ល្អ ក្រោយទឹកស្រកទៅវិញ។ មន្ត្រីទាំង២រូប សន្និដ្ឋានដូចគ្នាថា ទិន្នផលស្រូវក៏ប្រហាក់ប្រហែល កើនជាងឆ្នាំមុនបន្តិចដែរ ដូច្នេះ លោកមិនបារម្ភពីការធ្លាក់ចុះទិន្នផលស្រូវនោះទេ។
បើតាមលោក វេង សាខុន ទឹកជំនន់បានធ្វើឲ្យប៉ះផ្ទៃដីដំណាំស្រូវប្រមាណ ៣០ម៉ឺនហិកតា ក្នុងនោះមានតែផ្ទៃដីដាំស្រូវប្រមាណ១២ម៉ឺនហិកតា បានខូចទាំងស្រុង ខណៈស្រូវជិត១៨ម៉ឺនហិកតាត្រូវបានសង្គ្រោះ , និងប្រមាណ ៥ម៉ឺនហិកតា នៅអាចស្តារឡើងវិញបាន។
សូមរំឭកថា ដើម្បីស្តារដំណាំស្រូវ និងដំណាំរួមផ្សំ ដែលរងផលប៉ះពាល់ក្រសួងកសិកម្ម បានចែកពូជស្រូវចំនួន ៦,៤៣៤តោន និងពូជបន្លែជិត ៥៦ម៉ឺនកញ្ចប់ ទៅដល់កសិករ។ ក្រៅពីដំណាំកសិកម្ម គ្រោះទឹកជំនន់កន្លងមក ក៏បានបណ្តាលឲ្យមនុស្ស៤៤នាក់ បាត់បង់ជីវិតផងដែរ៕