ការលក់តាមអនឡាញ បានផ្លាស់ប្ដូរជីវិតលោក មឿន ចាន់ណា ក្រោយពិការភាព

ជាតិ

ការលក់តាមអនឡាញ បានផ្លាស់ប្ដូរជីវិតលោក មឿន ចាន់ណា ក្រោយពិការភាព

15, Dec 2020 , 8:59 am

រូបភាព

លោក ធឿន ចាន់ណា ប្រកបរបរលក់ស្បែកជើង កាបូប នាឡិកា តាមអនឡាញ

ដោយ: ប៉ូ សាគុន

ភ្នំពេញ៖ មានវ័យ២៦ឆ្នាំ លោក មឿន ចាន់ណា បានចាប់យកមុខរបរលក់ទំនិញតាមអនឡាញ ក្រោយពីជីវិតធ្លាក់ខ្លួនពិការ។ ត្រូវកាត់ដៃទាំងពីរ ត្រឹមក្រោមកែងដៃបន្តិច ព្រោះតែគ្រោះថ្នាក់ឆក់ខ្សែភ្លើង ក្នុងពេលបំពេញការងារជាជាងផ្សារដែក ពេលនេះជីវិតរបស់លោក ចាន់ណា បានផ្លាស់ប្ដូរជាថ្មី។

ក៏ធ្លាប់បាក់ទឹកចិត្ត មិនអាចទទួលយកបាននូវរឿងដែលបានកើតឡើង និងលែងចង់រស់បន្ត ព្រោះតែការបាត់បង់ដៃទាំងពីរកាលពី៤ឆ្នាំមុន លោក មឿន ចាន់ណា ពេលនេះបានជួបបទពិសោធជីវិតថ្មី ហើយអាចនឹងប្រសើរជាងកាលពីមិនទាន់ពិការផង។

ងើបចេញពីភាពបាក់ទឹកចិត្តកាលពីជាង២ឆ្នាំមុន បុរសដែលមានស្រុកកំណើតនៅខេត្តកំពង់ធំរូបនេះ ចាប់ផ្ដើមលក់ផលិតផល ស្បែកជើង នាឡិកា កាបូប និងខ្សែក្រវ៉ាត់ ជាដើម នៅតាមអនឡាញ។ ទទួលបានប្រាក់ក្បាលកាក់ពីក្រុមហ៊ុន លោក ចាន់ណា អាចរកចំណូលបានប្រមាណ២០ដុល្លារអាមេរិក ក្នុងមួយថ្ងៃ ខណៈពេលប្រទេសកម្ពុជាក៏ដូចជាពិភពលោក កំពុងជួបវិបត្តិកូវីដ-១៩នេះ។ ទោះជាយ៉ាងណា ថ្ងៃខ្លះ លោកក៏រកចំណូលមិនបានសោះដែរ។

ប៉ុន្តែបើនិយាយពីមួយឆ្នាំមុន គឺនៅឆ្នាំ២០១៩ យ៉ាងហោចណាស់ លោក ចាន់ណា អាចរកចំណូលបានចន្លោះពី៥០ដុល្លារអាមេរិក ទៅ១០០ដុល្លារអាមេរិកដែរនៅក្នុងមួយថ្ងៃ។

បានរៀនត្រឹមថ្នាក់ទី៨ លោក ចាន់ណា ដែលបច្ចុប្បន្នមានកូនប្រុសម្នាក់អាយុមួយខែកន្លះ ត្រូវបើកម៉ូតូដឹកទំនិញឱ្យភ្ញៀវដោយខ្លួនឯង។ ដ្បិតតែសេដ្ឋកិច្ចធ្លាក់ចុះដូចសព្វថ្ងៃនេះក៏ពិតមែន ប៉ុន្តែបុរសដែលធ្លាប់ធ្វើជាកម្មករប្រើកម្លាំងរូបនេះ អះអាងថា សម្រាប់លោកការប្រកបរបររកស៊ីដោយខ្លួនឯង វាប្រសើរជាងធ្វើការឱ្យគេ។

ជួលបន្ទប់នៅរាជធានីភ្នំពេញ ក្នុងតម្លៃ៥០ដុល្លារអាមេរិក លោក មឿន ចាន់ណា ដែលទទួលបានការណែនាំឱ្យបង្កើតមុខរបរលក់តាមអនឡាញដោយខ្លួនឯង ពីអង្គការមួយ បានពន្យល់បន្ថែមដូច្នេះ៖«ចន្លោះពេលព្យាយាលជំងឺ ខ្ញុំមិនអាចធ្វើអ្វីបាន ពេលនោះខ្ញុំបាក់ទឹកចិត្ត ខ្ញុំមិនអាចទទួលយកបាន ថ្ងៃណាក៏ខ្ញុំនៅតែគិតថាខ្លួនឯងនៅតែមានដៃ ចាប់កាន់អ្វីក៏បាន។ ខ្ញុំធ្លាប់គិតខ្លី ខ្ញុំធ្លាប់ឈប់ចង់រស់ទៀត។ ប៉ុន្តែក្រោយមកមួយឆ្នាំកន្លះ ខ្ញុំក៏ចាប់ផ្ដើមជីវិតថ្មី ខ្ញុំចាប់ផ្ដើមស្វែងរកការងារធ្វើ។ ដំបូងឡើយខ្ញុំលក់គ្រឿងសំអាង និងម្សៅ ប៉ុន្តែមានបងប្អូនប្រាប់ខ្ញុំថាប្រុសបែបនេះ លក់ម្សៅមិនសូវដាច់ទេ ព្រោះមិនបានតុបតែងខ្លួន។ ក្រោយមកខ្ញុំលក់កាបូប ស្បែកជើង និងនាឡិកាវិញ។ រកស៊ីដោយខ្លួនឯង អាចរកចំណូលបានស្រួលជាងធ្វើការឱ្យគេ ព្រោះមិនមានសម្ពាធ»។

ធ្លាប់ជាមនុស្សមានអវយវៈគ្រប់គ្រាន់ ប្រែទៅជាពិការ លោក មឿន ចាន់ណា លើកទឹកចិត្តដល់ជនមានពិការភាពគ្រប់រូប ទោះពិការពីកំណើត ឬពិការដោយគ្រោះចៃដន្យណាមួយក៏ដោយ ត្រូវតែតស៊ូក្នុងជីវិត មិនត្រូវបាក់ទឹកចិត្ត ត្រូវតែមានក្ដីសង្ឃឹម ដើម្បីសម្រេចឆន្ទៈរបស់ខ្លួន។

ពេលខ្លះអ្នកអាចបាត់បង់អ្វីមួយពីក្នុងជីវិតក៏ពិតមែន ប៉ុន្តែវាក៏អាចផ្ដល់អ្វីថ្មីមួយទៀតមកវិញ ដែលអាចធ្វើឱ្យជីវិតរបស់អ្នកល្អប្រសើរជាងមុន ក៏ថាបាន៕