COVID-19
អន្តរជាតិ
ពលរដ្ឋកូរ៉េខាងត្បូងផ្សារ Tongin ក្នុងទីក្រុងសេអ៊ូល។ រូបភាព Xinhua
×![]()
ដោយ: ធៀន ភារិន្ទ
រដ្ឋាភិបាលកូរ៉េខាងត្បូង បានបញ្ជាឲ្យសាលារៀនទាំងអស់នៅក្នុងទីក្រុងសេអ៊ូល និងតំបន់ជុំវិញសារជាថ្មី ចាប់ពីថ្ងៃទី១៥ ខែធ្នូ រហូតដល់ដំណាច់ឆ្នាំ២០២០។ បទបញ្ជាឲ្យបិទសាលានេះ ធ្វើឡើងក្នុងពីរលកឆ្លងកូវីដ-១៩ លើកទី៣ កំពុងតែផ្ទុះខ្លាំងនៅក្នុងទីក្រុងសេអ៊ូល និងតំបន់ជុំវិញទីក្រុងមួយនេះ។
រលកឆ្លងលើកទី៣ នៃកូវីដ-១៩ បានវាយប្រហារយ៉ាងខ្លាំងមកលើកូរ៉េខាងត្បូង ជាពិសេសនៅក្នុងទីក្រុងសេអ៊ូល និងតំបន់ជុំវិញទីក្រុង។ ធ្លាប់ជាប្រទេសត្រូវបានសរសើរជាប្រទេសទប់ស្កាត់ជំងឺឆ្លងបានល្អ នៅថ្ងៃទី១៤ ខែធ្នូ កូរ៉េខាងត្បូង រាយការណ៍ពីករណីឆ្លង ៧១៨ករណី ដែលចំនួននេះ បានធ្លាក់ចុះបន្តិចបើធៀបនឹងថ្ងៃទី១៣ ខែធ្នូ ដែលមានករណីឆ្លងជាង ១ពាន់ករណី។
ដើម្បីទប់ស្កាត់ការរាលដាលខ្លាំង រដ្ឋាភិបាលកូរ៉េខាងត្បូង បានបញ្ជាឲ្យបិទសាលារៀនក្នុងរដ្ឋធានីសេអ៊ូល និងតំបន់ជុំវិញរហូតដល់ដំណាច់ឆ្នាំ២០២០ ដោយសិស្សត្រូវប្តូរទៅរៀនតាមប្រព័ន្ធអនឡាញវិញ។ ការបិទសាលានេះ ជាចំណាត់ការមួយរបស់រដ្ឋាភិបាលកូរ៉េខាងត្បូង ដែលត្រៀមអនុវត្តការរក្សាគម្លាតសុវត្ថិភាពដំណាក់កាលទី៣ ដែលស្ទើរតែជាការបិទប្រទេសតែម្ដង។
ពេលនេះ កូរ៉េខាងត្បូង អនុវត្តវិធានការរក្សាគម្លាតសុវត្ថិភាពត្រឹមតែដំណាក់កាល២,៥ប៉ុណ្ណោះ ប៉ុន្តែវិធានការនេះ មិនអាចទប់ស្កាត់ករណីឆ្លងបានល្អឡើយ។
«រដ្ឋាភិបាល នឹងមិនស្ទាក់ស្ទើរឡើយលើការដំឡើងវិធានរក្សាគម្លាតសុវត្ថិភាពទៅដំណាក់កាល៣ បើសិនបើក្នុងករណីចាំបាច់»។ លោកនាយករដ្ឋមន្ត្រីកូរ៉េខាងត្បូង Chung Sye-kyun បានលើកឡើងបែបនេះ ស្របពេលរដ្ឋាភិបាល បានលើកយកបញ្ហាដំឡើងវិធានរក្សាគម្លាតនេះ ទៅជជែកជាមួយក្រសួងពាក់ព័ន្ធ រដ្ឋាភិបាលថ្នាក់តំបន់ និងអ្នកជំនាញ។
វិធានរក្សាគម្លាតសុវត្ថិភាពរបស់កូរ៉េខាងត្បូង មានចំនួន ៥ដំណាក់កាល។ យ៉ាងណាក៏ដោយ វិធាននៅក្នុងដំណាក់ទី៣ គឺមិនទាន់តឹងរ៉ឹងដូចការបិទប្រទេសនៅអាមេរិក ឬនៅអឺរ៉ុបឡើយ។ នៅក្នុងវិធានរក្សាគម្លាសុវត្ថិភាពកម្រិត ៣ រាល់កីឡាទាំងអស់ នឹងត្រូវផ្អាក ចំណែកការជួបជុំ អាចមានមនុស្សត្រឹមតែ ១០នាក់ប៉ុណ្ណោះ។ ដោយឡែកវិធានក្នុងដំណាក់កាល ២,៥ វិញ ការជួបជុំ អាចមានមនុស្សតិចជាង ៥០នាក់ ចំណែកកីឡា អាចលេងបាន ដោយគ្មានអ្នកគាំទ្រ។
មុននឹងសម្រេចឲ្យអនុវត្តវិធានរក្សាគម្លាតកម្រិតបី រដ្ឋាភិបាលត្រូវតែគិតគូរឲ្យបានម៉ត់ចត់ ព្រោះវាអាចធ្វើឲ្យប៉ះពាល់ដល់សេដ្ឋកិច្ច។ បើតាមការលើកឡើងរបស់លោកនាយករដ្ឋមន្ត្រី វិធាននេះ អាចប្រើបានក្នុងជម្រើសចុងក្រោយប៉ុណ្ណោះ។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
ទីភ្នាក់ងារទប់ស្កាត់ និងគ្រប់គ្រងជំងឺឆ្លងកូរ៉េខាងត្បូង (KDCA) បានបញ្ជាក់ថា រដ្ឋាភិបាល មានគម្រោងចុះកិច្ចព្រមព្រៀងជាមួយក្រុមហ៊ុនផលិតវ៉ាក់សាំង យ៉ាងហោចណាស់ចំនួនពីរ។ ក្រុមហ៊ុនថ្នាំពេទ្យ AstraZeneca នឹងដឹកជញ្ជូនវ៉ាក់សាំងខ្លួនចាប់ពីខែមីនា។ ជាមួយគ្នាដែរ កូរ៉េខាងត្បូង ក៏បានចរចាជាមួយក្រុមហ៊ុនផ្សេងទៀត ដើម្បីទិញវ៉ាក់សាំងផងដែរ៕
Tag:
កូរ៉េខាងត្បូង
កូវីដ-១៩
© រក្សាសិទ្ធិដោយ thmeythmey.com
