នាយករដ្ឋមន្ត្រី ថា មិនបានអង្គាសប្រាក់ សម្រាប់ទ្រទ្រង់ជាតិឡើយ

COVID-19

ជាតិ

នាយករដ្ឋមន្ត្រី ថា មិនបានអង្គាសប្រាក់ សម្រាប់ទ្រទ្រង់ជាតិឡើយ

15, Dec 2020 , 9:29 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ រដ្ឋាភិបាល មិនបានរ៉ៃអង្គាសប្រាក់ ទិញវ៉ាក់សាំងកូវីដ-១៩ ដើម្បីជាលេសយកប្រាក់សម្រាប់ប្រើប្រាស់ទ្រទ្រង់រដ្ឋឡើយ។ នេះជាបញ្ជាក់របស់សម្ដេច ហ៊ុន សែន ដែលឆ្លើយតបអ្នករិះគន់លើការទិញវ៉ាក់សាំងកូវីដ-១៩ ថា រដ្ឋអង្គាសប្រាក់ ដើម្បីបើកប្រាក់ឲ្យមន្ត្រីរាជការ។

សម្ដេច ហ៊ុន សែន ចាត់ទុកការរិះគន់នេះ ជាការមើលស្រាលលើរដ្ឋាភិបាល ក្នុងការគ្រប់គ្រងប្រទេស ក្នុងបរិបទកូវីដ-១៩ រាតត្បាត។ ឆ្លើយតបអ្នករិះគន់លើការទិញវ៉ាក់សាំងកូវីដ-១៩ សម្ដេច ហ៊ុន សែន បានបញ្ជាក់ថា ថវិកាជាង៤០ ដែលជាវិភាគទានរបស់សប្បុរសនេះ គឺមិនអាចយកទៅផ្គត់ផ្គង់ និងទ្រទ្រង់រដ្ឋបានឡើយ ខណៈរដ្ឋាភិបាលចំណាយថវិកា២០០លានដុល្លារក្នុងមួយខែ សម្រាប់បើកប្រាក់ខែឲ្យមន្ត្រីរាជការ។

មិនតែប៉ុណ្ណោះសម្ដេច ហ៊ុន សែន អះអាងថា សម្ដេចមិនបានរ៉ៃអង្គាសប្រាក់ពីពលរដ្ឋ សម្រាប់ទិញវ៉ាក់សាំងឡើយ ប៉ុន្តែពលរដ្ឋទេ ដែលមានសមានចិត្តចូលរួមថវិកាជាមួយរដ្ឋាភិបាល។ «អ្នកឯងរិះគន់ខ្ញុំ ដូចប្រមាថអង្គព្រះមហាក្សត្រ ប្រមាថព្រះសង្ឃ និងប្រជាពលរដ្ឋ…»។ នេះជាការបញ្ជាក់របស់សម្ដេច ហ៊ុន សែន ។

ថ្លែងក្នុងសន្និសីទកាសែត តាមរយៈការផ្សាយផ្ទាល់ពីទូរទស្សន៍ជាតិកម្ពុជា នៅព្រឹកថ្ងៃទី១៥ ធ្នូនេះ សម្ដេច ហ៊ុន សែន បានរំឭកថា សម្ដេចបានបញ្ជាឲ្យរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ត្រៀមថវិកាទិញវ៉ាក់សាំងកូវីដ-១៩ ចំនួន១លានដូស សម្រាប់យកមកព្យាបាលពលរដ្ឋ៥០ម៉ឺននាក់ នៅជំហានដំបូង ដោយមិនបានរ៉ៃប្រាក់ពីពលរដ្ឋឡើយ។ ប៉ុន្តែក្រោយការប្រកាសនេះ ស្រាប់តែសប្បុរសជន ជាពិសេសឧកញ៉ា បានចូលថវិកាជាបន្តបន្ទាប់ រហូតដល់មានចលនាជាតិចូលវិភាគទានទិញវ៉ាក់សាំង ពីអង្គព្រះមហាក្សត្រ មន្ត្រីរាជការ ព្រះសង្ឃ និងពលរដ្ឋទូទាំងប្រទេសនេះ។

ដោយសារឃើញចលនាជាតិបែបនេះ ទើបសម្ដេច សម្រេចប្រកាសគណនីធនាគាររបស់មន្ត្រីនៅទីស្តីគណៈរដ្ឋមន្ត្រីឲ្យសាធារណជន អាចចូលរួមតាមសទ្ធា សម្រាប់ទិញវ៉ាក់សាំងកូវីដ-១៩។ បើតាមប្រមុខរដ្ឋាភិបាល សប្បុរសជន បានចូលរួមវិភាគទាន៤៨លានដុល្លារហើយ សម្រាប់ទិញវ៉ាក់សាំងនេះ។

ក្រៅប្រកាសទិញវ៉ាក់សាំង១លានដូសនេះ កម្ពុជា ក៏នឹងទទួលបានវ៉ាក់សាំង២០ភាគរយ ឬសម្រាប់៣.២លាននាក់នៃចំនួនប្រជាជនសរុប ពីកម្មវិធី COVAX ។ ក្នុងនាមជាសមាជិក COVAX កម្ពុជានឹងត្រូវចេញថវិកាបដិភាគ៥ភាគរយ សម្រាប់វ៉ាក់សាំង៦.៤លានដូស ដើម្បីយកមកប្រើប្រាស់លើប្រជាជន ៣.២លាននាក់។ ប៉ុន្តែកម្មវិធី COVAX នេះ អាចមានលទ្ធភាពផ្តល់វ៉ាក់សាំង៣ភាគរយឲ្យកម្ពុជា សម្រាប់ដំណាក់កាលដំបូងប៉ុណ្ណោះ។ នេះបើតាមសម្ដេច ហ៊ុន សែន។

អត្ថបទទាក់ទង

សម្តេច ហ៊ុន សែន៖ កម្ពុជាទិញវ៉ាក់សាំងដែលអង្គការសុខភាពពិភពលោកទទួលស្គាល់ប៉ុណ្ណោះ

សម្តេចបានបញ្ជាក់ថា ពលរដ្ឋដែលមានអាយុចាប់ពី១៥ឆ្នាំឡើងទៅ១៣លាននាក់ នឹងទទួលបានវ៉ាក់សាំង (២៦លានដូស)។ បច្ចុប្បន្ន សម្តេចមិនទាន់ដឹងពីតម្លៃវ៉ាក់សាំងនោះឡើយ តែបច្ចុប្បន្ន កម្ពុជាមាន៥៣៨លានដុល្លារអាមេរិកក្នុងដៃ រួមទាំង៤៨លានដុល្លារអាមេរិកបន្ថែមទៀតពីចលនាសប្បុរសជន។

COVAX ជាគំនិតផ្តួចផ្តើមមួយរវាងបណ្តារដ្ឋាភិបាលប្រទេសអ្នកមាន អង្គការអន្តរជាតិ និងក្រុមហ៊ុនឱសថ ដើម្បីចែកចាយវ៉ាក់សាំងដោយស្មើភាពសម្រាប់ប្រទេសក្រីក្រ និងកំពុងអភិវឌ្ឍន៍ ដែលក្នុងនោះមានកម្ពុជាផងដែរ៕