ជាតិ
×![]()
ភ្នំពេញ៖ អាកាសធាតុនៅកម្ពុជា នឹងចុះត្រជាក់រយៈពេល១សប្ដាហ៍ គឺចាប់ពីថ្ងៃទី១៦-២២ ខែធ្នូ ដោយសារជ្រលងសម្ពាធខ្ពស់ពីប្រទេសចិន នឹងរំកិលចុះក្រោម ជាមួយនិងខ្យល់មូសុងឦសានបង្កើនល្បឿនបក់មកលើប្រទេសកម្ពុជា។ នេះបើតាមសេចក្ដីជូនដំណឹងរបស់ក្រសួងធនធានទឹក និងឧតុនិយម។ សេចក្តីជូនដំណឹងរបស់ក្រសួងធនធានទឹកបញ្ជាក់ថា បណ្តាខេត្តជាប់ជួរភ្នំដងរែក និងខ្ពង់រាបឦសាន នឹងចុះត្រជាក់ដល់១៧អង្សា ខណៈនិងខេត្តនៅតំបន់វាលទំនាបកណ្តាល នឹងចុះត្រជាក់ដល់១៨អង្សា។ ចំណែកខេត្តជាប់សមុទ្រក៏ចុះត្រជាក់ដល់២០អង្សាដែរ។ ក្រៅពីអាកាសធាតុត្រជាក់ តំបន់ខ្លះ នៅមានភ្លៀងធ្លាក់ក្នុងកម្រិតខ្សោយ ទៅមធ្យមផងដែរ។ 
ក្រសួងធនធានទឹក និងឧតុនិយម នៅថ្ងៃទី១៥ធ្នូនេះ បានជូនដំណឹងថា ជ្រលងសម្ពាធខ្ពស់ពីប្រទេសចិន នឹងរំកិលចុះក្រោម ជាមួយនិងខ្យល់មូសុងឦសានបង្កើនល្បឿនបក់មកលើប្រទេសកម្ពុជា។ ស្ថានភាពនេះ នឹងធ្វើឲ្យអាកាសធាតុនៅកម្ពុជា នឹងចុះត្រជាក់រយៈពេល១សប្ដាហ៍ គឺចាប់ពីថ្ងៃទី១៦-២២ ខែធ្នូ។
តាមការព្យាកររបស់ក្រសួងធនធានទឹក បណ្ដាខេត្តនៅតំបន់វាលទំនាបកណ្ដាល មានសីតុណ្ហភាពអប្បបរមាពី២០-២៤អង្សារសេ និងអតិបរមា ពី២៨-៣០ អង្សារសេ។ រីឯ នៅថ្ងៃទី១៥-១៦ ខែធ្នូ នៅបណ្ដារាជធានីខេត្តមួយចំនួននៅប៉ែកខាងក្រោម នឹងមានភ្លៀងក្នុងកម្រិតខ្សោយទៅមធ្យម ។ ហើយនៅថ្ងៃទី ២១-២២ មានសីតុណ្ហភាព អប្បបរមា ពី២១-២២អង្សារសេ និងអតិបរមា ២៥-២៨ អង្សារសេ។
ចំណែកឯ នៅបណ្ដាខេត្តជាប់ជួរភ្នំដងរែក និងខ្ពង់រាបឦសាន មានសីតុណ្ហភាពអប្បបរមា ពី២០-២២អង្សារសេ អតិបរមាពី២៨-៣០អង្សារសេ។ នៅថ្ងៃទី ២០-២២ ខែធ្នូ មានសីតុណ្ហភាពអប្បបរមា ពី១៧-២០ អង្សារសេ និងអតិបរមា ពី២៥-២៨ អង្សារសេ។
តំបន់មាត់សមុទ្រ មានសីតុណ្ហភាពអប្បបរមាពី ២០-២២ អង្សារសេ និងអតិបរមា ពី២៨-៣០ អង្សារសេ។ រីឯ ថ្ងៃទី១៥-១៦ ខែធ្នូ នឹងមានភ្លៀងក្នុងកម្រិតខ្សោយទៅមធ្យម។ ថ្ងៃទី២០-២២ ខែធ្នូ មានសីតុណ្ហភាព អប្បបរមាពី២០-២២ អង្សារសេ និងអតិបរមា ពី២៦-២៩ អង្សារសេ។
ជាមួយគ្នានេះ ក្រសួងធនធានទឹក បានអំពាវនាវដល់សាធារណជន ពិសេសកងទ័ពរស់នៅ និងឈរជើងនៅតំបន់ជួរភ្នំដងរែក និងខ្ពង់រាបឦសាន ត្រូវយកចិត្តទុកដាក់ ថែរក្សាសុខភាពចំពោះធាតុអាកាសត្រជាក់៕
Tag:
អាកាសធាតុ
ត្រជាក់
ឧតុនិយម
ធនធានទឹក
© រក្សាសិទ្ធិដោយ thmeythmey.com
