សង្គមអន្តរជាតិ
អន្តរជាតិ
ទីបំផុត លោក ពូទីន អបអរលោក បៃឌិន ផ្លូវការហើយ! លោក វ៉្លាឌីមៀ ពូទីន ចាប់ដៃលោក ចូ បៃឌិន កាលពីឆ្នាំ២០១១។ រូបភាព AFP
× ប្រធានាធិបតីរុស្ស៊ី វ្ល៉ាឌីមៀ ពូទីន បានអបអរលោក ចូ បៃឌិន ដែលជាប់ឆ្នោតជាប្រធានាធិបតីអាមេរិក។ នេះបើតាមសេចក្ដីប្រកាសរបស់វិមានក្រេមឡាំងនៅថ្ងៃទី១៥ ខែធ្នូ។ ការសាទររបស់លោក ពូទីន ធ្វើឡើងជាងមួយខែក្រោយការបោះឆ្នោតថ្ងៃទី៣ ខែវិច្ឆិកា ដែលលោក បៃឌិន ផ្ដួលប្រធានាធិបតីបច្ចុប្បន្ន ដូណាល់ ត្រាំ ។ លោក ពូទីន ប្រកាសត្រៀមធ្វើការជាមួយប្រធានាធិបតីអាមេរិកថ្មី។
មេដឹកនាំរុស្ស៊ី ពិតជារង់ចាំដល់ជ័យជម្នះរបស់លោក ចូ បៃឌិន ត្រូវបានបញ្ជាក់ ទើបផ្ញើសារអបអរមែន។ នៅថ្ងៃទី១៤ ខែធ្នូ លោក បៃឌិន ត្រូវបានប្រតិភូតំណាងបោះឆ្នោតឲ្យធ្វើជាប្រធានាធិបតីអាមេរិក ជាងមួយខែក្រោយលោកផ្ដួលលោក ដូណាល់ ត្រាំ រួចមក។
មិនបានប៉ុន្មានម៉ោងក្រោយមក វិមានប្រធានាធិបតីរុស្ស៊ី ក៏ចេញសេចក្ដីប្រកាសព័ត៌មានបញ្ជាក់ពីការអបអររបស់លោក វ្ល៉ាឌីមៀ ពូទីន ទៅកាន់លោក ចូ បៃឌិន ។ នេះបើតាមការផ្សាយរបស់ទីភ្នាក់ងារព័ត៌មាន AFP ។ ទន្ទឹមនឹងការអបអរ វិមានក្រេមឡាំងបន្តថា លោក ពូទីន ក៏ត្រៀមជាស្រេចដើម្បីកិច្ចសហការទ្វេភាគី និងត្រៀមទាក់ទងលោក បៃឌិន ផងដែរ។
«លោក ពូទីន ជូនប្រធានាធិបតីជាប់ឆ្នោតឲ្យទទួលជោគជ័យគ្រប់ភារកិច្ច និងបង្ហាញការប្ដេជ្ញាចិត្តថា រុស្ស៊ី និងអាមេរិក ដែលមានការទទួលខុសត្រូវរួមគ្នាលើសន្តិសុខ និងស្ថិរភាពសាកល ទោះជាមានការខ្វែងគំនិតគ្នា អាចដោះស្រាយបញ្ហាប្រឈមរបស់ពិភពលោក។» វិមានក្រេមឡាំងបញ្ជាក់បែបនេះ។
តាមពិតទៅ មេដឹកនាំជាច្រើន ពិសេសប្រទេសសម្ពន្ធមិត្តអាមេរិក បានសាទរលោក បៃឌិន ភ្លាមៗក្រោយប្រព័ន្ធផ្សព្វផ្សាយអាមេរិករាយការណ៍ពីជ័យជម្នះរបស់លោក។ ប្រធានាធិបតីចិន ស៊ី ជិនភីង រង់ចាំដល់ពេលលោក បៃឌិន ឈ្នះចំនួនប្រតិភូគ្រប់គ្រាន់ ទើបសាទរដែរ។ កន្លងទៅ វិមានក្រេមឡាំងក៏បញ្ជាក់ថា លោក ពូទីន នឹងរង់ចាំដល់លទ្ធផលផ្លូវការសិន ទើបសាទរ។
លោក បៃឌិន នឹងស្បថចូលកាន់តំណែងនៅថ្ងៃទី២០ ខែមករា។ ទំនាក់ទំនងជាមួយរុស្ស៊ី ទំនងជាស្ថិតក្នុងបញ្ជីអាទិភាពនៃគោលនយោបាយការបរទេសរបស់លោក បៃឌិន ផងដែរ៕
Tag:
អាមេរិក
រុស្ស៊ី
វ្ល៉ាឌីមៀ ពូទីន
ចូ បៃឌិន
© រក្សាសិទ្ធិដោយ thmeythmey.com