នាយករដ្ឋមន្ត្រីកូរ៉េខាងត្បូង លោក Chung Sye-kyun នៅថ្ងៃទី១៥ ខែធ្នូ បានស្នើឲ្យប្រជាជនគោរពវិធានរក្សាគម្លាតសុវត្ថិភាពឲ្យបានត្រឹមត្រូវ បើពួកគេមិនចង់ឲ្យរដ្ឋាភិបាលរឹតត្បិតកាន់តែខ្លាំងជាងមុខ។ ការលើកឡើងរបស់លោកនាយករដ្ឋមន្ត្រីកូរ៉េខាងត្បូងបែបនេះ ធ្វើឡើងស្របពេលករណីឆ្លងកូវីដ-១៩ កំពុងតែរាតត្បាតខ្លាំងនៅក្នុងប្រទេស ជាពិសេសទីក្រុងសេអ៊ូល។
កូរ៉េខាងត្បូង ចាប់ពីដើមខែធ្នូមក រាយការណ៍ពីការកើនឡើងករណីឆ្លងកូរ៉ូណាវីរុសជាពិសេសនៅក្នុងទីក្រុងសេអ៊ូល និងតំបន់ជុំវិញ។ ករណីឆ្លងនៅថ្ងៃទី១៥ ខែធ្នូ មានចំនួន ៨៨០ករណី និងអ្នកស្លាប់មានចំនួន ១៣នាក់។ តួលេខសរុប កូរ៉េខាងត្បូង មានកូវីដ-១៩ ចំនួន ៤៤៣៦៤ករណី និងអ្នកស្លាប់មានចំនួន ៦០០នាក់។ នេះបើតាមទីភ្នាក់ងារទប់ស្កាត់ និងគ្រប់គ្រងជំងឺឆ្លង។
នៅក្នុងកិច្ចប្រជុំរដ្ឋាភិបាលស្តីពីការដោះស្រាយកូវីដ-១៩ ដែលផ្សាយតាមកញ្ចក់ទូរទស្សន៍ លោក Chung Sye-kyun នាយករដ្ឋមន្ត្រីកូរ៉េខាងត្បូង បានលើកឡើងថា នៅពេលប្រជាជនមួយចំនួនមិនបានគោរពវិធានរក្សាគម្លាត ឬវិធានទប់ស្កាត់ការរាតត្បាតកូវីដ-១៩ ប្រជាជនខ្លះ បានបន្ថែមបន្ទុកថែមទៀត តាមរយៈការឆ្លងវីរុស ដោយគ្មានការប្រុងប្រយ័ត្ន និងគ្មានការទទួលខុសត្រូវ។
«សូមគិតពីទម្ងន់ និងផលប៉ះពាល់នៃវិធានរក្សាគម្លាតកម្រិត៣»។ ប្រមុខរដ្ឋាភិបាលកូរ៉េខាងត្បូង បានលើកឡើងបែបនេះ ដោយសំដៅកម្រិតនៃការអនុវត្តវិធានការកាន់តែតឹងតែងក្នុងការទប់ស្កាត់ការរាលដាលជំងឺកូវីដ-១៩ ។ លោកបន្ថែមថា រដ្ឋាភិបាល កំពុងពិនិត្យលើការអនុវត្តរបស់ប្រជាជនលើវិធានរក្សាគម្លាតក្នុងពេលបច្ចុប្បន្ន។
ពេលនេះ កូរ៉េខាងត្បូង កំពុងអនុវត្តវិធានរក្សាគម្លាត ២,៥ នៅក្នុងទីក្រុងសេអ៊ូល ដែលជាកន្លែងឆ្លងកូវីដ-១៩ ខ្លាំង ដោយអនុញ្ញាតឲ្យប្រជាជនជួបជុំគ្នាក្រោម ៥០នាក់ ការលេងកីឡាដោយគ្មានអ្នកគាំទ្រ ភោជនីយដ្ឋាន និងកន្លែងលក់កាហ្វេ អាចបើកសម្រាប់អ្នកយកទៅបរិភោគខាងក្រៅប៉ុណ្ណោះ។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
យ៉ាងណាក៏ដោយ រដ្ឋាភិបាលទីក្រុងសេអ៊ូល កំពុងស្ទាក់ស្ទើរ ក្នុងការដំឡើងវិធានរក្សាគម្លាតសុវត្ថិភាពទៅកម្រិត៣ ដោយសារតែវាអាចប៉ះពាល់ដល់សេដ្ឋកិច្ចខ្លាំងនៅក្នុងទីក្រុងសេអ៊ូល ព្រោះវាស្ទើរនឹងស្មើទៅនឹងការបិទទីក្រុងទៅហើយ។ លោកនាយករដ្ឋមន្ត្រី បានចាត់ទុកវិធានដំណាក់កាលទី៣ នេះថា ជារឿងគ្រោះថ្នាក់ដ៏ខ្លាំង។
បើសិនបើវិធានរក្សាគម្លាតសុវត្ថិភាពដំណាក់កាល៣ ត្រូវអនុវត្តមែននោះ រាល់ការជួបប្រជុំ អាចធ្វើឡើងត្រឹមមនុស្ស ១០នាក់ប៉ុណ្ណោះ ហើយអាជីវកម្មមិនចាំបាច់មួយចំនួនត្រូវបិទ ចំណែកកីឡាវិញក៏មិនអនុញ្ញាតឲ្យមានអ្នកគាំទ្រដែរ។ ទន្ទឹមនេះ ប្រជាជននៅក្នុងទីក្រុងសេអ៊ូល ត្រូវស្នាក់នៅផ្ទះបណ្តោះអាសន្ន ចំណែកការងារមិនចាំបាច់មួយចំនួន ត្រូវធ្វើពីផ្ទះ។
ក្រៅពីការកើនឡើងករណីឆ្លងកូវីដ-១៩ នៅក្នុងទីក្រុងសេអ៊ូល តំបន់ផ្សេងទៀតនៅកូរ៉េខាងត្បូងក៏មានករណីឆ្លងកើនឡើងផងដែរ ក្នុងនោះមានដូចជាទីក្រុងប៊ូសាន, ទីក្រុង Daegu, ខេត្ត South Gyeongsang, ខេត្ត South Chungcheong និងតំបន់ផ្សេងទៀត។
ក្នុងការផ្ទុះកូវីដ-១៩ លើកនេះ អាជ្ញាធរសុខាភិបាលកូរ៉េខាងត្បូង បានរិះគន់យ៉ាងខ្លាំងលើប្រជាជនកូរ៉េខាងត្បូង និងអាជីវកម្មមួយចំនួន ដែលមិនគោរពវិធានទប់ស្កាត់របស់រដ្ឋាភិបាល។ ព្រះវិហារសាសនាមួយចំនួន នៅតែមានការជួបជុំមនុស្សដោយផ្ទាល់ ហើយអាជីវកម្មខ្លះ នៅតែបន្តបើករហូតដល់លើសម៉ោង៩ បើទោះបីជារដ្ឋាភិបាលបានហាមឃាត់ក៏ដោយ។
ក្នុងកិច្ចប្រជុំខាងលើនេះ លោកនាយករដ្ឋមន្ត្រីកូរ៉េខាងត្បូង ក៏បានបញ្ជាក់ផងដែរ កូរ៉េខាងត្បូង នឹងទទួលបានវ៉ាក់សាំង នៅក្នុងត្រីមាសទីមួយ នៃឆ្នាំ២០២១ ៕