អន្តរជាតិ
នយោបាយអន្តរជាតិ
លោក បៃឌិន ជ្រើសគូប្រជែងចាស់ Pete Buttigieg ឲ្យធ្វើជារដ្ឋមន្ត្រីដឹកជញ្ជូន លោក ចូ បៃឌិន និងលោក Pete Buttigieg អំឡុងការតស៊ូមតិក្នុងជួរបក្សប្រជាធិបតេយ្យ កាលពីខែកុម្ភៈ កន្លងទៅ ។ រូបភាព៖ AFP
× ប្រធានាធិបតីជាប់ឆ្នោត ចូ បៃឌិន បានប្រកាសតែងតាំងអតីតគូប្រជែងចាស់ លោក Pete Buttigieg ធ្វើជាបេក្ខភាពរដ្ឋមន្ត្រីក្រសួងដឹកជញ្ជូនអាមេរិក ។ ការតែងតាំងនេះ ធ្វើឲ្យលោក Buttigieg ក្លាយជាគូប្រជែងក្នុងជួរបក្សប្រជាធិបតេយ្យសម្រាប់បេក្ខភាពប្រធានាធិបតីរបស់លោក បៃឌិន ដំបូងគេ ដែលទទួលបានតំណែងក្នុងគណៈរដ្ឋមន្ត្រីថ្មី។
ក្នុងសេចក្តីថ្លែងការណ៍ នៅថ្ងៃទី១៥ ខែធ្នូ លោក ចូ បៃឌិន បានប្រកាសថា លោកតែងតាំងលោក Pete Buttigieg សម្រាប់តំណែងជារដ្ឋមន្ត្រីដឹកជញ្ជូន ក៏ព្រោះតែលោកពោរពេញដោយសមត្ថភាពដើម្បីដោះស្រាយបញ្ហាប្រឈមដែលប្រទាក់ក្រឡាគ្នាខ្លាំងក្នុងវិស័យហេដ្ឋារចនាសម្ព័ន្ធ ការងារ អាកាសធាតុ និងសមធម៌។
ការតែងតាំងលោក Buttigieg ដែលមានវ័យ ៣៨ឆ្នាំ ជួយលើកស្ទួយប្រជាប្រិយភាពមួយកម្រិតទៀតក្នុងឆាកនយោបាយរបស់អតីតអភិបាលក្រុង South Bend នៃរដ្ឋ Indiana នេះ។ Buttigeg បានបង្ហាញឥទ្ធិពលគួរឲ្យភ្ញាក់ផ្អើល កាលធ្វើបេក្ខជនប្រធានាធិបតីរបស់បក្សប្រជាធិបតេយ្យ។ ប្រសិនបើអនុម័តដោយព្រឹទ្ធសភាអាមេរិក លោកក៏នឹងក្លាយជារដ្ឋមន្ត្រីដែលជាអ្នកស្រលាញ់ភេទដូចគ្នា ដោយបើកចំហទីមួយផងដែរក្នុងប្រវត្តិសាស្ត្រអាមេរិក។
នៅក្រសួងដឹកជញ្ជូនអាមេរិក កិច្ចការស្នូលលោក Buttigieg គឺទទួលខុសត្រូវលើផែនការជាច្រើនរបស់លោក បៃឌិន ដែលមានគោលដៅជំរុញការចំណាយក្នុងវិស័យហេដ្ឋារចនាសម្ព័ន្ធ រួមមាន ការបង្កើតស្ថានីយ៍សាកថ្មសម្រាប់រថយន្តអគ្គិសនី ៥៥ម៉ឺនទីតាំង និងបង្កើនការចំណាយលើផ្លូវដែកល្បឿនលឿន និងគម្រោងបៃតងផ្សេងទៀត ក៏ដូចជាបញ្ចុះបញ្ចូលសភាអាមេរិកឲ្យស្វែងរកវិធីសម្រាប់ការចំណាយថ្មីជាដើម។
ជាមួយតំណែងនេះ លោក Buttigieg ក៏នឹងជួបប្រទះបញ្ហាប្រឈមមួយចំនួនក្នុងវិស័យអាកាសចរណ៍ ជាអាទិ៍ ផែនការរបស់សភាក្នុងការចូលរួមវិនិច្ឆយរបៀបដែលរដ្ឋបាលអាកាសចរណ៍សហព័ន្ធអាមេរិកទទួលស្គាល់ជាផ្លូវការយន្តហោះថ្មី។ ផែនការរឹតបន្តឹងនេះ ធ្វើឡើងក្រោយហេតុការណ៍ធ្លាក់យន្តហោះ Boeing 737 Max ២គ្រឿង ដែលបង្ខំឲ្យបញ្ឈរជើងយន្តហោះធុននេះ២០ខែ។
លោក Buttigieg ជាគូប្រជែងដ៏ខ្លាំងក្លាមួយ មួយអំឡុងការប្រជែងដណ្ដើមកៅអីបេក្ខភាពប្រធានាធិបតីក្នុងជួរបក្សប្រជាធិបតេយ្យ ដោយលោកបានឈ្នះការបោះឆ្នោតរបស់អ្នកគាំទ្រក្នុងរដ្ឋ Iowa ហើយលោកក៏មានប្រជាប្រិយភាពខ្លាំងលើបណ្ដាញសង្គម។ យ៉ាងណាមិញ ក្រោយលោក បៃឌិន ក្លាយជាបេក្ខជននាំមុខក្នុងជួរបក្សប្រជាធិបតេយ្យ លោក Buttigieg ភ្លាមៗនោះ បានបោះបង់ចោលការប្រណាំងប្រជែងនេះ ហើយប្រកាសគាំទ្រលោក បៃឌិន ជាសាធារណៈ។
សូមបញ្ជាក់ថា លោក Buttigieg ជាអតីតកងទ័ពជើងទឹកអាមេរិក ដែលធ្លាប់ចូលធ្វើសង្គ្រាមក្នុងប្រទេសអាហ្វហ្កានីស្ថាន ក្នុងឆ្នាំ២០១៤ ហើយលោកក៏ត្រូវបានពិចារណាឲ្យដឹកនាំក្រសួងកិច្ចការអតីតយុទ្ធជនអាមេរិកផងដែរ ប៉ុន្តែតំណែងនេះ បានធ្លាក់ទៅដល់ដៃអតីតទីប្រឹក្សាសេតវិមានអាមេរិកអាណត្តិប្រធានាធិបតី អូបាម៉ា លោក Denis McDonough វិញ។ ដោយម្យ៉ាងការតែងតាំងលោក Buttigieg ក៏ស្របគ្នានឹងការតាំងចិត្តលោក បៃឌិន ដើម្បីមានគណៈរដ្ឋមន្ត្រីចម្រុះផងដែរ ៕
Tag:
សហរដ្ឋអាមេរិក
ចូ បៃឌិន
Pete Buttigieg
© រក្សាសិទ្ធិដោយ thmeythmey.com