ជាតិ
ឧបករណ៍វាស់ស្ទង់ Echosounder អាចប្រាប់ពីពេលវេលា នៃការធ្វើចរាចររបស់ត្រី ដែលចាកចេញពីបឹងទន្លេសាប ត្រឡប់ចូលទៅក្នុងទៅក្នុងទន្លេមេគង្គវិញ
រូបភាពពីលើអាកាសបង្ហាញពីទិដ្ឋភាព នៃឧករណ៍នេសាទត្រីឧស្សាហកម្ម «ដាយត្រី» តាមបណ្តោយដងទន្លេសាប នៅក្នុងឃុំកោះចិន ស្រុកពញាឮ ខេត្តកណ្តាល
×![]()
កាលពីថ្ងៃទី ២៥ ខែវិច្ឆិកា ឆ្នាំ ២០២០ កន្លងទៅនេះ គម្រោងអច្ឆរិយភាពនៃទន្លេមេគង្គ សហការជាមួយ វិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប នៃរដ្ឋាបាលជលផល ដឹកនាំដោយលោកបណ្ឌិត ង៉ោ ប៉េងប៊ុន ដោយមានការចូលរួមពីសកលវិទ្យាល័យ វ៉ាស៊ិនតោន សហរដ្ឋអាមេរិក ដែលមាន លោក ជេកសិន អេ ស្វន Jackson A. Swan បានយកឧបករណ៍វាស់ស្ទង់ Echosounder ទៅដាក់ភ្ជាប់ជាមួយឧករណ៍នេសាទត្រីឧស្សាហកម្ម «ដាយត្រី» តាមបណ្តោយដងទន្លេសាប នៅជូរលេខ១៥ នៅក្នុងឃុំកោះចិន ស្រុកពញាឮ ខេត្តកណ្តាល និង មួយគ្រឿងទៀត នៅ «ដាយត្រី» ជួរលេខ៣ ម្តុំជ្រោយចង្វារ រាជធានីភ្នំពេញ។ 
លោកបណ្ឌិត ង៉ោ ប៉េងប៊ុន និងលោក ជេកសិន អេ ស្វន Jackson A. Swan ក្នុងពេលដំឡើងឧបករណ៍វាស់ស្ទង់ Echosounder នៅលើឧករណ៍នេសាទត្រីឧស្សាហកម្ម «ដាយត្រី» តាមបណ្តោយដងទន្លេសាប នៅក្នុងឃុំកោះចិន ស្រុកពញាឮ ខេត្តកណ្តាល
អ្នកស្រាវជ្រាវអេកូឡូស៊ី ជលផលទឹកសាបក្នុងប្រទេស លោកបណ្ឌិត ង៉ោ ប៉េងប៊ុន បញ្ជាក់ថា៖ «ការដាក់ឧបករណ៍វាស់ស្ទង់ Echosounder នេះ គឺដើម្បីសិក្សាពីពេលវេលាធ្វើចរាចរ និងដង់ស៊ីតេរបស់ត្រីដែលចាកចេញពីបឹងទន្លេសាបនារដូវប្រាំង ត្រឡប់ចូលទៅក្នុង ទន្លេមេគង្គវិញ»។ លោកបណ្ឌិត បានបន្តទៀតថា៖ «ក្រៅពីដាក់ឧបករណ៍វាស់ស្ទង់នេះ ក្រុមការងាររបស់យើង ក៏បានប្រមូលទិន្នន័យជាក់ស្តែង ដោយធ្វើការយកសំណាកត្រីដើម្បីសិក្សាពីសមាសភាពប្រភេទត្រី ប្រវែង និងទម្ងន់របស់ត្រីដែលនេសាទបានផងដែរ ដើម្បីយកទៅផ្ទៀងផ្ទាត់ជាមួយទិន្នន័យដែលប្រមូលបាន ដោយឧបករណ៍វាស់ស្ទង់ Echosounder»។
ក្រុមការងារគម្រោងអច្ឆរិយភាពនៃទន្លេមេគង្គ កំពុងប្រមូលទិន្នន័យជាក់ស្តែង ដើម្បីយកទៅផ្ទៀងផ្ទាត់ជាមួយទិន្នន័យដែលប្រមូលបានដោយឧបករណ៍វាស់ស្ទង់ Echosounder
បច្ចុប្បន្ន ឧបករណ៍វាស់ស្ទង់ Echosounder នេះ គឺជាប្រព័ន្ធថ្មីមួយ ដែលពុំទាន់មានប្រើប្រាស់នៅឡើយទេ ក្នុងការប្រមូលទិន្នន័យជលផលទឹកសាបនៅក្នុងប្រទេសកម្ពុជា។ នេះគឺជាកាដំឡើងសាកល្បង ដែលអាចឈានទៅរកការកត់ត្រាទិន្នន័យជាក់លាក់មួយនៅពេលខាងមុខ។ លោកបណ្ឌិត ង៉ោ ប៉េងប៊ុន សង្ឃឹមថា បន្ទាប់ពីនេះទៅ យើងនឹងបានបទពិសោធន៍ពីការប្រើប្រាស់ឧបករណ៍ថ្មីនេះ ដើម្បីសិក្សាពីការធ្វើចរាចរ និងការប៉ាន់ប្រមាណដង់ស៊ីតេរបស់ត្រីនៅទន្លេសាប ដែលជាប្រយោជន៍ដើម្បីទំនើបកម្មការងារសិក្សាជ្រាវជ្រាវជលផលទឹកសាបឲ្យមានភាពសុក្រឹត និងការងារប្រមូលទិន្នន័យ ដែលបម្រើឲ្យការងារគ្រប់គ្រងធនធានជលផល ប្រកបដោយប្រសិទ្ធភាពខ្ពស់។ ការសិក្សាស្រាវជ្រាវនេះ ក៏មានការចូលរួមពីនិស្សិតថ្នាក់បណ្ឌិតក្នុងស្រុកចំនួនពីររូបផងដែរ ដែលនឹងត្រូវទទួលការបណ្តុះបណ្តាលពីការប្រើប្រាស់ ឧបករណ៍នេះ ដើម្បីនិរន្តភាពការងារស្រាវជ្រាវនេះទៅថ្ងៃអនាគត។
លោក ជេកសិន អេ ស្វន Jackson A. Swan អ្នកជំនាញ ប្រើប្រាស់ឧបករណ៍វាស់ស្ទង់ Echosounder មកពីសាកលវិទ្យាល័យ វ៉ាស៊ិនតោន សហរដ្ឋអាមេរិក បញ្ជាក់ថា៖ «យើងដាក់ឧបករណ៍វាស់ស្ទង់នេះ ក្នុងគោលបំណង គឺដើម្បីជាជំនួយបច្ចេកទេសដល់រដ្ឋបាលជលផល ដែលពីមុនមកពុំធ្លាប់មានប្រើប្រាស់នៅឡើយ ក្នុងការគ្រប់គ្រងវិស័យជលផល ដើម្បីឲ្យមាននិរន្តភាពនោះ»។
លោក ជេកសិនបញ្ជាក់បន្ថែមទៀតថា៖ «ខ្ញុំគិតថាធម្មតា និងជាអកុសល អ្នកស្រាវជ្រាវលោកខាងលិច ដែលបានមកប្រទេសកម្ពុជា ដើម្បីសុំការសហការស្រាវជ្រាវអ្វីមួយ ពួកគេបាននាំយកមកនូវឧបករណ៍ទំនើបៗ មកទីនេះ ដើម្បីធ្វើការស្រាវជ្រាវ។ បន្ទាប់ពីចប់កិច្ចការស្រាវជ្រាវហើយ ពួកគេទុកឧបករណ៍ទាំងនោះឲ្យម្ចាស់ប្រទេស ប៉ុន្តែ ពួកគេមិនបានបង្រៀនពីរបៀបប្រើប្រាស់ឲ្យបានច្បាស់លាស់ឡើយ។ ប៉ុន្តែ ផ្ទុយពីពួកគេ ខ្ញុំនឹងបង្រៀនពីរបៀបប្រើប្រាស់ឧបករណ៍ទាំងនេះ ដល់និស្សិតថ្នាក់បណ្ឌិតជនជាតិខ្មែរពីរនាក់ ដែលទទួលបានអាហារូបករណ៍ពីគម្រោងអច្ឆរិយភាពនៃទន្លេមេគង្គ ពីរបៀបប្រើប្រាស់ទាំងអស់។ ដូច្នេះ ពេលគម្រោងនេះចប់ទៅ ពួកគេអាចបន្តប្រើប្រាស់ឧបករណ៍ទាំងនោះជាបន្តទៀតបានដោយរលូន»។
ក្រុមការងារគម្រោងអច្ឆរិយភាពនៃទន្លេមេគង្គ រូបទី១រាប់ពីឆ្វេង និស្សិតអាហារូបករណ៍ ឈួយ សំអុល, អ៊ុយ សោភ័ណ្ឌ, ពិន កក្កដា, លោកបណ្ឌិត ង៉ោ ប៉េងប៊ុន និងលោក ជេកសិន អេ ស្វន Jackson A. Swan
ក្នុងពេលរៀបចំដំឡើងគ្រឿងបង្គំសំខាន់ៗ នៃឧបករណ៍ Echosounder និស្សិតអាហារូបកណ៍ថ្នាក់បណ្ឌិត អ៊ុយ សោភ័ណ្ឌ និង ពិន កក្កដា ក៏បានចូលរួមដោយផ្ទាល់ក្នុងការងារនេះដែរ។ ពួកគេបានជួយផ្គុំឧបករណ៍ Transducer ទៅនឹងឧបករណ៍ Transceiver ក៏ដូចជាប្រព័ន្ធកុំព្យូទ័រ Raspberry Pi សម្រាប់ញ្ជូនទិន្នន័យទៅ Savers និងរៀនពីរបៀបទាញយក ទិន្នន័យពី Savers វិញផងដែរ។ ពួកគេបានបញ្ជាក់ដូចគ្នាថា ការសិក្សាពីរបៀបប្រើប្រាស់ឧបករណ៍ Echosounder នេះ គឺជាចំណេះដឹងថ្មីមួយសម្រាប់ពូកគេ។ ពីមុនមក ពូកគេធ្លាប់តែឮគេនិយាយអំពីវា តែមិនបានជួបផ្ទាល់ឡើយ។ ឥឡូវនេះ ពួកគេបានជួប និងកំពុងសិក្សាអំពីវា។ ដូច្នេះ ពួកគេប្តេជ្ញាចិត្តថា នឹងខិតខំឲ្យអស់ពីសមត្ថភាពសិក្សាពីវា ដើម្បីជាប្រយោជន៍សម្រាប់ជាជំនួយក្នុងការគ្រប់គ្រងវិស័យជលផលទៅថ្ងៃអនាគត»។
គួរបញ្ជាក់ថា ការដាក់ឧបករណ៍វាស់ស្ទង់ Echosounder នេះ ប្រព្រឹត្តទៅ ២៤ម៉ោង លើ២៤ម៉ោង មានរយៈពេល ប្រហែល ៤ទៅ ៥ ខែ ( គឺចាប់ពីខែវិច្ឆិកា រហូតដល់ខែកុម្ភៈ ឬមិនា អាស្រ័យទៅតាមការនេសាទនៃដាយត្រី ដើម្បីប្រមូលព័ត៌មានពីដុងស៊ីតេនៃការធ្វើចរាចរណ៍ត្រីចេញពីទន្លេបឹងទន្លេសាប។
© រក្សាសិទ្ធិដោយ thmeythmey.com
