ធនាគារវិនិយោគអឺរ៉ុប បោះទុនជិត១០០លានដុល្លារ លើគម្រោងកែលម្អប្រព័ន្ធធារាសាស្ត្រកសិកម្មនៅកម្ពុជា

ជាតិ

សេដ្ឋកិច្ច

ធនាគារវិនិយោគអឺរ៉ុប បោះទុនជិត១០០លានដុល្លារ លើគម្រោងកែលម្អប្រព័ន្ធធារាសាស្ត្រកសិកម្មនៅកម្ពុជា

16, Dec 2020 , 10:29 pm

រូបភាព

រូបថត៖ ទំព័រហ្វេសប៊ុក European Union in Cambodia

ដោយ: អ៊ូ សុខមាន (OU Sokmean)

ភ្នំពេញ៖ ធនាគារវិនិយោគអឺរ៉ុប(EIB) នឹងបោះទុនវិនិយោគទុននៅកម្ពុជាចំនួន៨០លានអឺរ៉ូ ឬជិត១០០លានដុល្លារអាមេរិក លើគម្រោងកែលម្អប្រព័ន្ធធារាសាស្ត្រកសិកកម្ម(IAIP)។ បើតាមសេចក្តីប្រកាសព័ត៌មានរបស់ធនាគារEIB កាលពីថ្ងៃទី១៤ធ្នូ ឆ្នាំ២០២០ ការវិនិយោគលើគម្រោងកែលម្អប្រព័ន្ធធារាសាស្ត្រកសិកកម្មនេះ ដើម្បីពង្រីកបណ្ដាញផ្គត់ផ្គង់ទឹកនិងប្រព័ន្ធធារាសាស្ត្រ ក្នុងខេត្តចំនួន៥ នៅកម្ពុជា។

តាមគម្រោងវិនិយោគនេះ មានពលរដ្ឋប្រមាណ២០ម៉ឺននាក់ នៅក្នុងខេត្តចំនួន៥ រួមទាំងផ្ទៃដីដាំដំណាំ៥,១ម៉ឺនហិកតា នឹងទទួលបានផលប្រយោជន៍ពីការគាំទ្ររបស់ធនគារEIB។ សេចក្តីប្រកាសព័ត៌មានលើខាងលើបានបញ្ជាក់ថា គម្រោងកែលម្អប្រព័ន្ធធារាសាស្ត្រកសិកកម្ម ផ្តល់លទ្ធភាពឱ្យកម្ពុជាអាចបង្កើតមជ្ឈមណ្ឌលជាតិគ្រប់គ្រងទិន្នន័យធនធានទឹក ដែលមានសារៈសំខាន់ក្នុងរយៈពេលវែង លើការជួយឱ្យប្រទេសអាចកាត់បន្ថយផលប៉ះពាល់នៃការប្រែប្រួលអាកាសធាតុ លើការផ្គត់ផ្គង់ទឹក និងកសិកម្ម។

«ធនាគាររបស់សហភាពអឺរ៉ុប កំពុងវិនិយោគលើអនាគតរុងរឿង កាន់តែមានសុវត្ថិភាព និងប្រកបដោយចីរភាពសម្រាប់ពលរដ្ឋកម្ពុជា»។ នេះជាការលើកឡើងរបស់ លោក Christian Kettel Thomsen អនុប្រធានធនាគារEIB ដែលទទួលខុសត្រូវលើប្រតិបត្តិការនៅកម្ពុជា ដោយបន្តថា៖ «រួមគ្នាជាមួយនឹងដៃគូមកពីធនាគារអភិវឌ្ឍន៍អាស៊ី និងសហភាពអឺរ៉ុប ដែលយើងកំពុងរួមចំណែកយ៉ាងពិតប្រាកដដល់កំណើនសេដ្ឋកិច្ចប្រកបដោយបរិយាបន្ន តាមរយៈវិស័យកសិកម្ម និងបង្កើនភាពធន់ទៅនឹងអាកាសធាតុ និងគ្រោះមហន្តរាយនៅកម្ពុជា»។

បើតាមលោក Christian Kettel Thomsen ការគាំទ្របច្ចេកទេស និងហិរញ្ញវត្ថុនេះ នឹងធ្វើឱ្យកម្ពុជាកាន់តែរឹងមាំ, កាន់តែមានសុវត្ថិភាព និងកាន់តែធន់ទៅនឹងផលប៉ះពាល់ដែលបង្កឡើងដោយសារការប្រែប្រួល អាកាសធាតុ។ លោក បានបន្ថែមថា គម្រោងនេះ ក៏នឹងជួយឆ្លើយតបចំពោះតម្រូវការស្ដារឡើងវិញរបស់កម្ពុជា ក្រោយជំងឺកូវីដ-១៩ ជាមួយនឹងការយកចិត្តទុកដាក់ចំពោះបរិស្ថានផងដែរ។

គម្រោងវិនិយោគលើកែលម្អប្រព័ន្ធធារាសាស្ត្រកសិកកម្មរបស់ធនាគារEIB នៅកម្ពុជានេះ ជាគម្រោងទី៣ ដែលមានរយៈពេលជិត២ឆ្នាំ។ លោកស្រីCarmen Moreno ឯកអគ្គរដ្ឋទូតសហភាពអឺរ៉ុបប្រចាំប្រទេសកម្ពុជា ថា គម្រោងនេះនឹងបង្កើនផលិតកម្មកសិកម្ម ព្រមទាំងលើកកម្ពស់ភាពធន់នឹងអាកាសធាតុ និងគ្រោះមហន្តរាយ ក៏ដូចជាផ្ដល់ឱ្យកម្ពុជានូវជំនួយបច្ចេកទេសដ៏មានសារៈសំខាន់ និងឧបករណ៍ សម្រាប់លើកកម្ពស់អភិបាលកិច្ចក្នុងវិស័យគ្រប់គ្រងទឹក។

តាមរយៈគម្រោងនេះ ក្រុមអឺរ៉ុប (Team Europe) បន្តគាំទ្រដល់កម្ពុជា ក្នុងកិច្ចខិតខំប្រឹងប្រែងស្ដារឡើងវិញប្រកបដោយបរិយាបន្ន និងគិតគូរពីបរិស្ថានក្រោយជំងឺកូវីដ-១៩ ក្នុងវិស័យសេដ្ឋកិច្ច។លោកស្រីឯកអគ្គរដ្ឋទូតសហភាពអឺរ៉ុបប្រចាំប្រទេសកម្ពុជារូបនេះ បានអះអាងដូច្នេះ៖«ការធ្វើកសិកម្មប្រកបដោយចីរភាព និងភាពធន់ និងការគ្រប់គ្រងធនធានទឹកប្រកបដោយបរិយាបន្ន អាចជំរុញឱ្យមានការស្ដារសេដ្ឋកិច្ចឡើងវិញកាន់តែរឹងមាំសម្រាប់កម្ពុជា ព្រមទាំងបង្កើតការងារថ្មីៗជូនប្រជាពលរដ្ឋនៅក្នុងប្រទេសផងដែរ»។

សម្រាប់គម្រោងកែលម្អប្រព័ន្ធធារាសាស្ត្រកសិកកម្មនេះ រាជរដ្ឋាភិបាលកម្ពុជាស្វាគមន៍ការវិនិយោគពីធនាគារEIB ដោយចាត់ទុកថានេះ ជាជំហានដ៏សំខាន់មួយដើម្បីឈានឆ្ពោះទៅកែលម្អជីវភាពរស់នៅ និងបង្កើនផលិតកម្មកសិកម្មនៅកម្ពុជា។ លោកអូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានលើកឡើងយ៉ាងដូច្នេះ ដោយបន្តថា គម្រោងនេះ នឹងផ្ដល់លទ្ធភាពឱ្យកម្ពុជាកាន់តែអាចបន្សាំខ្លួនទៅនឹងការប្រែប្រួលអាកាសធាតុ និងកែលម្អការគ្រប់គ្រងធនធានទឹកសម្រាប់ការងារកសិកម្ម និងរបៀបធ្វើកសិកម្ម។

រដ្ឋមន្ត្រីសេដ្ឋកិច្ចមានប្រសាសន៍ថា៖«IAIPនេះ ជាគម្រោងមួយដ៏ល្អ ដែលបង្ហាញពីរបៀបដែលដៃគូនានាអាចធ្វើការងាររួមគ្នាជុំវិញចក្ខុវិស័យតែមួយ ដើម្បីឈានទៅលើកកម្ពស់ភាពធន់និងវិបុលភាពសម្រាប់កម្ពុជា»។

សូមជម្រាបថា ធនាគារវិនិយោគអឺរ៉ុប បានផ្ដល់ការគាំទ្រដល់ការអភិវឌ្ឍប្រកបដោយចីរភាពរបស់កម្ពុជាចាប់តាំងពីឆ្នាំ២០១៨មក។ រហូតមកដល់ទល់បច្ចុប្បន្នធនាគារសហភាពអឺរ៉ុបនេះ បានវិនិយោគទឹកប្រាក់ ២២២.៥លានអឺរ៉ូ(ប្រមាណ២៧០លានដុល្លារអាមេរិក) ក្នុងការរួមចំណែកដល់កំណើនសង្គម និងសេដ្ឋកិច្ចនៅកម្ពុជា៕