សង្គមអន្តរជាតិ
អន្តរជាតិ
អូស្ត្រាលី នឹងប្ដឹងទៅ WTO ករណីចិនដំឡើងពន្ធលើស្រូវបាឡេរបស់ខ្លួន រូបភាព Unsplash
× រដ្ឋាភិបាលសហព័ន្ធអូស្ត្រាលី នៅថ្ងៃទី១៦ ខែធ្នូ បានបញ្ជាក់ថា ខ្លួន នឹងប្តឹងទៅអង្គការពាណិជ្ជកម្មអន្តរជាតិ (WTO) លើការសម្រេចចិត្តរបស់រដ្ឋាភិបាលចិនដែលបានដំឡើងពន្ធលើស្រូវបាឡេ (Barley) របស់ខ្លួនសរុបរហូតដល់៨០ភាគរយ។ ការបញ្ជាក់នេះ ធ្វើឡើងស្របពេលក្រុងកង់ប៉េរ៉ា និងក្រុងប៉េកាំង កំពុងមានភាពតានតឹងជាមួយគ្នា លើបញ្ហាជាច្រើន។
ក្នុងសន្និសីទសារព័ត៌មានមួយ លោក Simon Birmingham រដ្ឋមន្ត្រីពាណិជ្ជកម្មអូស្ត្រាលី ចាត់ទុកការដំឡើងពន្ធលើស្រូវបាឡេ ពីសំណាក់ចិន ជាការខ្វះមូលដ្ឋានច្បាស់លាស់ និងមិនស្របទៅលើការពិត និងភស្តុតាង។ ទាក់ទិននឹងបញ្ហានេះ អូស្ត្រាលី បានប្រកាសប្តឹងទៅអង្គការពាណិជ្ជកម្មពិភពលោក ឲ្យបើកការស៊ើបអង្កេតជុំវិញបញ្ហានេះ បើទោះបីជាលោករដ្ឋមន្ត្រី បានទទួលស្គាល់ថា នីតិវិធីនៅអង្គការWTO ត្រូវប្រើរយៈពេលយូរក៏ដោយ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ។
«យើងមានទំនុកចិត្តលើភស្តុតាង, ទិន្នន័យ និងការវិភាគ ដែលយើងបានដាក់ទៅ»។ លោក Birmingham បានលើកឡើងបែបនេះ ដោយបន្ថែមថា អូស្ត្រាលីមានសិទ្ធិការពារផលប្រយោជន៍ និងវិបុលភាពរបស់កសិកររបស់ខ្លួន និងអ្នកផលិតស្រូវបាឡេ។
នៅក្នុងខែឧសភា កន្លងមក ចិនបានដំឡើងពន្ធលើស្រូវបាឡេរបស់អូស្រា្តលីរហូតដល់ ៨០,៥ភាគរយឯណោះ ដោយក្នុងនោះ ៧៣,៦ ភាគរយលើការលក់តម្លៃទាបនៅក្នុងស្រុកចិន និង៦,៩ភាគរយទៀត គឺជាពន្ធប្រឆាំងនឹងការឧបត្ថម្ភធនពីសំណាក់រដ្ឋាភិបាលអូស្ត្រាលី។
ការដាក់ពាក្យបណ្តឹងទៅអង្គការពាណិជ្ជកម្មពិភពលោកនេះ ត្រូវបានអូស្ត្រាលី ចាត់ទុកថា គឺជាវិធានការឆ្លើយតបទៅនឹងចិន។ ទន្ទឹមនេះ លោករដ្ឋមន្ត្រី បានព្រមានថា អូស្ត្រាលី ក៏អាចប្រើវិធីមួយនេះ លើវិស័យផ្សេងទៀតផងដែរ។ កន្លងមក ចិន បានដំឡើងលើផលិតផលអូស្ត្រាលីជាច្រើនមុនដូចជា បង្កង កប្បាស សាច់គោ ធ្យូងថ្ម ស្ករ និងស្រាជាដើម។
អូស្ត្រាលី នាំចេញស្រូវបាឡេ ទៅចិនប្រមាណ ១ពាន់លានដុល្លារឯណោះ ក្នុងមួយឆ្នាំ ដោយស្រូវប្រភេទនេះ ភាគច្រើន យកត្រូវផលិតជាស្រាបៀ។ ប៉ុន្តែដោយសារគ្រោះរាំងស្ងួតនៅក្នុងប្រទេស ការនាំចេញអូស្រា្តលីទៅចិន ត្រូវធ្លាក់ចុះ។
ក្នុងការដំឡើងពន្ធរបស់ចិន លើអូស្ត្រាលី ត្រូវបានអ្នកជំនាញមួយចំនួន មើលឃើញថា ក៏ជាផ្នែកមួយនៃបញ្ហានយោបាយផងដែរ។ ការដំឡើងពន្ធរបស់ចិន លើទំនិញអូស្ត្រាលីម្តងៗហើយ ម្តងទៀតនេះ កើតឡើងចំពេលទំនាក់ទំនងរបស់ប្រទេសទាំងពីរធ្លាក់ចុះទាបបំផុត បើគិតចាប់តាំងពីមានការបង្ក្រាបនៅទីលានធានអានមេន នៅក្នុងឆ្នាំ១៩៨៩ កន្លងមក៕
© រក្សាសិទ្ធិដោយ thmeythmey.com