COVID-19
អន្តរជាតិ
នាយករដ្ឋមន្ត្រីជប៉ុន រងការរិះគន់ខ្លាំង ព្រោះចូលរួមការជួបជុំពិសារអាហារដំណាច់ឆ្នាំ នាយករដ្ឋមន្រ្តីជប៉ុន ស៊ូហ្កា យូស៊ីហ៊ីដេ។ រូបភាព Xinhua
× នាយករដ្ឋមន្ត្រីជប៉ុន លោក ស៊ូហ្កា យូស៊ីហ៊ីដេ កំពុងរងការរិះគន់យ៉ាងខ្លាំង បន្ទាប់ពីចូលរួមក្នុងកម្មវិធីជួបជុំដំណាច់ឆ្នាំជាបន្តបន្ទាប់ ស្របពេលលោកអំពាវនាវ ឲ្យប្រជាជនជៀសវាងការជួបជុំណាមួយ ដើម្បីទប់ស្កាត់ការរាតត្បាតនៃកូវីដ-១៩ នៅក្នុងប្រទេស។ ប៉ុន្តែការរិះគន់នេះ ត្រូវបានរដ្ឋមន្ត្រីរបស់លោកនិយាយការពារនៅក្នុងសភា នៅថ្ងៃទី១៦ ខែធ្នូ។
ករណីឆ្លងនៅជប៉ុន បានហក់ឡើងយ៉ាងខ្លាំងមួយរយៈចុងក្រោយនេះ។ នៅថ្ងៃទី១៥ ខែធ្នូ ជប៉ុនមានករណីឆ្លង ២២១៧ករណី និងអ្នកស្លាប់មានចំនួន ៥៨នាក់។ ករណីឆ្លងសរុបមានចំនួនជាង ១៨ម៉ឺនករណី។ ទាក់ទិននឹងករណីឆ្លងបែបនេះ នាយករដ្ឋមន្ត្រីជប៉ុន លោក ស៊ូហ្កា យូស៊ីហ៊ីដេ បានអំពាវនាវប្រជាជន កុំឲ្យមានការជួបប្រជុំផ្សេងៗ។
ផ្ទុយពីការអំពាវនាវរបស់ខ្លួន លោកនាយករដ្ឋមន្ត្រី បែរជាចូលរួមកម្មវិធីជួបជុំញាំអាហារជាមួយមន្ត្រីជាន់ខ្ពស់របស់ខ្លួននៅភោជនីយដ្ឋានមួយទៅវិញ។ បញ្ហានេះ បានបង្កឲ្យមានការរិះគន់យ៉ាងខ្លាំងពីអ្នកនយោបាយ អ្នកលេងបណ្តាញសង្គម និងដៃគូសម្ព័ន្ធមិត្តរបស់ខ្លួន។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ប៉ុន្តែការជួបជុំនេះ ត្រូវបានមន្ត្រីជាន់ខ្ពស់របស់លោក ស៊ូហ្កា និយាយការពារ។ ថ្លែងនៅក្នុងសភា រដ្ឋមន្ត្រីពាណិជ្ជកម្ម លោក Yasutoshi Nishimura បានលើកឡើងថា ជប៉ុន គ្មានច្បាប់ចាប់បង្ខំការពិសារអាហារឡើយ។ ចំណែកអ្នកនាំពាក្យរដ្ឋាភិបាល លោក Katsunobu Kato លើកឡើងថា លោកនាយករដ្ឋមន្ត្រី បានគោរពវិធានទប់ស្កាត់កូវីដ-១៩ នៅក្នុងការជួបប្រជុំយ៉ាងល្អ។
នៅយប់ថ្ងៃទី១៤ ខែធ្នូ លោកនាយករដ្ឋមន្ត្រីបានជួបជុំជាមួយមនុស្សចំនួន៦នាក់ ដោយក្នុងនោះរួមទាំងមន្ត្រីជាន់ខ្ពស់របស់ជប៉ុនផង នៅភោជនីយដ្ឋានលំដាប់កំពូលមួយនៅក្នុងខណ្ឌ Ginza ក្នុងក្រុងតូក្យូ។ ជាអ្នកចូលរួមក្នុងកម្មវិធីនេះ លោក Ryotaro Sugi តារាសម្តែងវ័យ ៧៦ឆ្នាំ បានប្រាប់អ្នកសារព័ត៌មានថា ជំនួបនេះ ជាពិធីជប់លាងដំណាច់ឆ្នាំ ដែលនិយាយពីកីឡាវាយកូនបាល់ (Baseball) ។
លោក Toshihiro Nikai អគ្គលេខាធិការបក្សប្រជាធិបតេយ្យសេរី (LDP) ដែលកំពុងកាន់អំណាច ហើយដែលមានវត្តមានដែរនោះ បានបញ្ជាក់ថា ក្នុងពេលបរិភោគអាហារ អ្នកចូលរួមបានដោះម៉ាស់ទាំងអស់ ប៉ុន្តែមានការប្រុងប្រយ័ត្នខ្ពស់។
លើសពីនោះ លោកស៊ូហ្កា ក៏បានជួបជាមួយ លោក Haruyuki Takahashi មន្ត្រីប្រតិបត្តិនៃគណៈកម្មាធិការរៀបចំកីឡាទីក្រុងតូក្យូ និងបុគ្គលិករបស់ទូទស្សន៍ក្នុងស្រុកពីររូបទៀតផងដែរនៅភោជនីយដ្ឋានមួយផ្សេងទៀត៕
© រក្សាសិទ្ធិដោយ thmeythmey.com