COVID-19
កីឡាអន្តរជាតិ
អន្តរជាតិ
PSG ត្រៀមទទួល Messi ហើយ ក្រោយ Barca ចង់បន្ថយប្រាក់ឈ្នួល
× Paris Saint-Germain ត្រូវបានរាយការណ៍ថាបានត្រៀមខ្លួនរួចស្រេចសម្រាប់ការទៅដល់របស់ Lionel Messi ស្របពេលខ្សែបម្រើឆ្នើមរូបនេះកំពុងចរចាលើការកាត់បន្ថយប្រាក់ឈ្នួលរបស់ខ្លួនជាមួយ Barcelona។
បេក្ខភាពប្រធានក្លិបយក្សអេស្ប៉ាញថ្មីលោក Emili Rousaud បានអះអាងថា Messi អាចនឹងចាកចេញពីទឹកដី Nou Camp ប្រសិនបើរូបគេមិនយល់ព្រមនឹងការកាត់ប្រាក់ខែទេនោះ។ នេះបើតាមការចុះផ្សាយរបស់កាសែត The Sun នៅថ្ងៃទី១៦ ខែធ្នូ។
ក្លិប PSG ដែលស្ថិតក្នុងចំណោមក្លិបធំៗនៅអឺរ៉ុបបានបង្ហាញការចង់បានម្ចាស់ពានរង្វាន់ Ballon d'Or ៦ សម័យកាលនេះជាយូរមកហើយនោះ ធ្វើការយ៉ាងខ្លាំងដើម្បីទាក់ទងយក Messi ទៅរួមក្រុមដោយចាប់ដៃគូជាមួយមិត្តចាស់ Neymar និង Kylian Mbappé។
តាមការផ្សាយរបស់កាសែតបារាំងជាច្រើន PSG មានទំនុកចិត្តយ៉ាងខ្លាំងក្នុងការទទួលបានប្រធានក្រុមជម្រើសជាតិអាហ្សង់ទីនរូបនេះ។ ពួកគេរំពឹងថា ការមកដល់របស់ Messi នឹងធ្វើឲ្យពួកគេលក់ខោអាវ និងទំនិញរបស់ក្លិបបានរាប់រយលានដុល្លារទៀតផង។
Messi ដែលព្យាយាមចង់ចាកចេញពី Barcelona កាលពីដើមរដូវនេះ ក៏មានការទាក់ទងខ្លាំងពីសំណាក់ក្លិបអ្នកមាន Manchester City ផងដែរ។ លោក Pep Guardiola អ្នកចាត់ការទូទៅក្រុមមេឃខៀវបានបង្ហាញការចង់បាន និងប្រជែងយកអតីតកូនក្រុមចាស់រូបនេះទៅកាន់ទឹកដីអង់គ្លេសនៅទីផ្សារដោះដូរខែមករាខាងមុខ។
កិច្ចសន្យារបស់ខ្សែបម្រើវ័យ៣៣ឆ្នាំ នឹងផុតកំណត់នៅចុងបញ្ចប់រដូវកាល ២០២០-២១ ស្របពេលក្លិបបើកការចរចាលើការកាត់បន្ថយប្រាក់ឈ្នួលដ៏ច្រើនសន្ធឹករបស់ Messi អំឡុងពេលក្លិបជួបវិបត្តិដោយសារជំងឺ COVID-19។ យ៉ាងណា Messi នៅមិនទាន់សម្រេចពីអនាគតខ្លួនឡើយ ខណៈកូនៗរបស់គេមិនសប្បាយចិត្តរហូតដល់ថ្នាក់យំផង នៅពេលលឺព័ត៌មានពីផែនការចាកចេញរបស់ឪពុក៕
Tag:
Paris Saint-Germain
Lionel Messi
© រក្សាសិទ្ធិដោយ thmeythmey.com