COVID-19
សុខភាព
អន្តរជាតិ
ក្រុមការងារស្រាវជ្រាវ WHO នឹងទៅចិនខែក្រោយដើម្បីរកប្រភពជំងឺកូវីដ-១៩ ស្រ្តីចិនជិះកង់ក្នុងទីក្រុងវូហាន ខេត្តហ៊ូប៉ី ប្រទេសចិន។ រូបភាព AFP
× បេសកកម្មអន្តរជាតិមួយក្រុមដឹកនាំដោយអង្គការសុខភាពពិភពលោក(WHO) ត្រូវបានរំពឹងថា នឹងធ្វើដំណើរទៅចិននៅសប្តាហ៍ទី១ នៃខែមករា ឆ្នាំ២០២១ ដើម្បីស្រាវជ្រាវពីប្រភពនៃវីរុសដែលបង្កទៅជាជំងឺរាតត្បាតសាកលកូវីដ-១៩។ ការស៊ើបអង្កេតពីប្រភពនៃជំងឺកូវីត-១៩ ជាការទាមទាររបស់ប្រទេសជាច្រើន រហូតមានទាំងចោទប្រកាន់ WHOនិងចិនថា ខ្វះតម្លាភាពស្តីពីប្រភពនៃជំងឺឆ្លងនេះទៀតផង។
ក្រុមបេសកកម្មរបស់ WHO ដែលមានអ្នកជំនាញពី១២ ទៅ១៥នាក់ នឹងធ្វើដំណើរទៅកាន់ទឹកដី ដើម្បីពិនិត្យភស្តុតាង ដែលរួមមានសំណាកតេស្តរបស់មនុស្ស និងសត្វដែលប្រមូលដោយអ្នកស្រាវជ្រាវចិន សំដៅរកប្រភពជំងឺកូវីដ-១៩។ ទីក្រុងវូហាន ក៏ជាគោលដៅរបស់ក្រុមស្រាវជ្រាវដែរ។ លោកស្រី Tea Fischer សមាជិកក្រុមបេសកកម្មអះអាងថា ការសិក្សានេះនឹងមានរយៈពេល៦សប្តាហ៍ ដោយ២សប្តាហ៍ត្រូវធ្វើចត្តាឡីស័កបន្ទាប់ពីធ្វើដំណើរទៅដល់ចិន។
លោក Tarik Jasarevic អ្នកនាំពាក្យ WHO លើកឡើងថា នៅពេលនេះក្រុមការងារកំពុងរៀបចំសម្ភារ ដើម្បីធ្វើដំណើរទៅចិនឲ្យបានកាន់តែឆាប់តាមតែអាចធ្វើទៅបាន។ « យើងសង្ឃឹមថាក្រុមការងារនឹងអាចចេញធ្វើដំណើរក្នុងខែមករា»។ លោក Jasarevic និយាយបែបនេះដែលផ្សាយដោយទីភ្នាក់ងារព័ត៌មាន Reuters ។
ទាក់ទងរឿងនេះ អ្នកការទូតបស្ចិមលោកខ្លះ ចង់ឲ្យ ក្រុមការងារគួរណាស់តែចាកចេញឲ្យបានមុនកិច្ចប្រជុំក្រុមប្រឹក្សាប្រតិបត្តិរបស់ WHO ស្របពេលដែលទាំងចិន និង WHO សុទ្ធតែរងសម្ពាធយ៉ាងខ្លាំងពីប្រទេសដទៃក្នុងការស៊ើបអង្កេតពីប្រភពកំណើតរបស់វីរុស។ កាលពីខែឧសភាកន្លងទៅ រដ្ឋមន្ត្រីសុខាភិបាលប្រទេសជាច្រើន បានអំពាវនាវឲ្យស្ថាប័នសុខាភិបាលអន្តរជាតិមួយនេះកំណត់ពីប្រភពនៃវីរុស ក៏ដូចជារបៀបនៃការឆ្លងរបស់វីរុសពីសត្វផងដែរ។
ចំពោះការស្រាវជ្រាវស្វែងរកប្រភពជំងឺវិញ លោកPeter Ben Embarek អ្នកជំនាញសុខភាពសត្វរបស់ WHO លើកឡើងថា ក្រុមបេសកកម្មនេះក៏មានបំណងក្នុងការសម្ភាសកម្មករដែលធ្វើការក្នុងផ្សារនៅទីក្រុងវូហានដើម្បីចង់ដឹងថាពួកគែឆ្លងជំងឺកូវីដ-១៩ដោយរបៀបណា។ លោកបន្ថែមថា គ្មានភស្តុតាងណាចង្អុលបង្ហាញថាវីរុសនេះផលិតឡើងដោយមនុស្សឡើយ។
អាជ្ញាធរចិន បានជូនដំណឹងទៅ WHO ស្តីពីជំងឺផ្លូវដង្ហើមប្រភេទថ្មី នៅថ្ងៃទី៣១ ធ្នូ ឆ្នាំ២០១៩ ក្រោយមានករណីផ្ទុះជំងឺមិនធ្លាប់មាននេះក្នុងទីក្រុងវូហាន។ តាំងពីមក អមេរិកវិញ បានចោទប្រកាន់ចិនថាលាក់បាំងពីការផ្ទុះជំងឺឆ្លងនេះ និងក៏បានទាមទារផងដែរឲ្យ WHO ធស៊ើបអង្កេតដោយមានតម្លាភាពចំពោះការផ្ទុះឡើងនេះ៕
Tag:
កូវីត-១៩
WHO
ចិន
© រក្សាសិទ្ធិដោយ thmeythmey.com