COVID-19
អន្តរជាតិ
វៀតណាម ចាប់ផ្តើមធ្វើតេស្តវ៉ាក់សាំងកូវីដ-១៩ លើមនុស្ស បុរសជនជាតិវៀតណាមម្នាក់ ដែលត្រូវបានទទួលវ៉ាក់សាំងសាកល្បងNanocovax របស់ក្រុមហ៊ុនឱសថ Nanogen នៅថ្ងៃទី១៧ ខែធ្នូ ឆ្នាំ២០២០។ រូបភាព៖ Vietnam Express
× វៀតណាម នៅព្រឹកថ្ងៃទី១៧ ខែធ្នូ បានចាប់ផ្តើមសាកល្បងវ៉ាក់សាំងប្រឆាំងកូវីដ-១៩ របស់ខ្លួនលើមនុស្សនៅក្នុងដំណាក់កាលទីមួយ។ តាមការអះអាងរបស់វៀតណាម វ៉ាក់សាំងរបស់ខ្លួន អាចដាក់ឲ្យផលិតក្នុងទំហំទ្រង់ទ្រាយធំ នៅក្នុងខែឧសភា ឆ្នាំ២០២១ ខាងមុខ។
បន្ទាប់ពីទទួលបានជោគជ័យនៅក្នុងដំណាក់ជ្រើសរើសកោសិកាខ្សោយ ឬងាប់របស់កូរ៉ូណាវីរុស និងការធ្វើតេស្តលើសត្វនាពេលកន្លងមក ការសាកល្បងវ៉ាក់សាំងរបស់វៀតណាម ត្រូវឈានចូលដល់ដំណាក់កាលធ្វើតេស្តលើមនុស្ស ដែលស្ថិតនៅក្នុងការពិសោធល្អិតល្អន់។ វ៉ាក់សាំង Nanocovax របស់ក្រុមហ៊ុនឱសថវៀតណាម Nanogen ត្រូវបានចាក់លើមនុស្សចំនួន ៣នាក់ ដែលមានបុរស ២នាក់ និងស្ត្រី ១នាក់ នៅព្រឹកថ្ងៃទី១៧ ខែធ្នូ។
ការធ្វើតេស្តនេះ ត្រូវតាមដានរយៈពេល ៧២ម៉ោង។ បន្ទាប់ពីចាក់បានរយៈពេល ២ម៉ោងរួចមក បេក្ខជនដែលមានវ័យប្រមាណ ២០ឆ្នាំទាំងនោះ មិនទាន់មានប្រតិកម្មអ្វីនៅឡើយទេ។ បើទោះបីជាវ៉ាក់សាំងរបស់ខ្លួនចេញលទ្ធផលល្អមែន វៀតណាម បន្តប្រាប់ប្រជាជនរបស់ខ្លួន កុំឲ្យធ្វេសប្រហែស នឹងវិធានទប់ស្កាត់កូវីដ-១៩ ដែលអាចធ្វើឲ្យប្រទេសស្ថិតក្នុងស្ថានភាពលំបាកកាន់តែខ្លាំងថែមទៀត។
«វៀតណាម នៅតែបន្តប្រយុទ្ធជាមួយកូវីដ-១៩ ហើយវាត្រូវការការចូលរួមពីអាជ្ញាធរ និងសហគមន៍»។ លោក Nguyen Ngo Quang អនុប្រធានរដ្ឋបាលនៃវិទ្យាសាស្ត្រ បច្ចេកវិទ្យា និងហ្វឹកហាត់ របស់ក្រសួងសុខាភិបាលវៀតណាម បានលើកឡើងបែបនេះ ដោយបន្ថែមថា ប្រសិនបើធ្វេសប្រហែស កិច្ចខិតខំរបស់អាជ្ញាធរក្នុងការទប់ស្កាត់កូវីដ-១៩ នឹងត្រូវអសារបង់។
តាមការចុះផ្សាយរបស់កាសែត Vietnam Express វ៉ាក់សាំងមួយដូស អាចមានតម្លៃប្រមាណជាង ៥ដុល្លារ។ ប៉ុន្តែប្រជាជនត្រូវរង់ចាំរហូតដល់ ខែឧសភា ឆ្នាំ២០២១ ទើបវៀតណាម ត្រូវផលិតវ៉ាក់សាំងទ្រង់ទ្រាយធំ។ ទន្ទឹមនេះ រាល់អ្នកចូលរួមសាកល្បងនេះ ត្រូវបានទទួលការធានាសុខភាពពីក្រុមហ៊ុនឱសថ Nanogen ដែលបានចុះកុងត្រាជាមួយក្រុមហ៊ុនធានាផ្សេងៗ។
ក្រៅពីវ៉ាក់សាំងរបស់ក្រុមហ៊ុន Nanogen វៀតណាមនៅមានស្ថាប័នផលិតវ៉ាក់សាំងចំនួន ៣ទៀតផងដែរ ដូចជា ក្រុមហ៊ុន Vabiotech, ក្រុមហ៊ុន Polyvac និងវ៉ាក់សាំងរបស់វិទ្យាស្ថានវ៉ាក់សាំង និងវេជ្ជសាស្ត្រ (IVAC)។
គិតត្រឹមថ្ងៃទី១៦ ខែធ្នូ វៀតណាម មានករណីឆ្លងកូវីដ-១៩ សរុបចំនួន ១៤០៥ករណី និងអ្នកស្លាប់មានចំនួន ៣៥នាក់។ ចំណែកអ្នកជាសះស្បើយមានចំនួន ១២៥២នាក់ ៕
© រក្សាសិទ្ធិដោយ thmeythmey.com