ជាតិ
សង្គមជាតិ
សម្តេច ហ៊ុន សែន ផ្ញើសារសាទរលោក បៃឌិន ជាមួយការប្តេជ្ញាចិត្តក្នុងការធ្វើការជាមួយគ្នា សម្តេចនាយករដ្ឋមន្រ្តី ហ៊ុន សែន (រូបពីទំព័រហ្វេសប៊ុករបស់សម្តេច) និង លោក ចូ បៃឌិន ប្រធានាធិបតីជាប់ឆ្នោតរបស់អាមរិក (រូបពី AFP)
× សម្តេច ហ៊ុន សែន ប្រមុខរដ្ឋាភិបាលកម្ពុជា បានផ្ញើសារជូនទៅលោក ចូ បៃឌិន ដើម្បីអបអរសាទរនិងសម្តែងសេចក្តីសោមន្សរីករាយចំពោះលោក ដែលបានជាប់ឆ្នោតជាប្រធានាធិបតីទី៤៦របស់អាមេរិក។
តាមរយៈសារអបអរសាទរ ចុះនៅថ្ងៃទី១៥ ខែធ្នូ ឆ្នាំ២០២០ សម្តេចនាយករដ្ឋមន្ត្រី ហ៊ុន សែន ប្រាប់លោក ចូ បៃឌិន ថា បទពិសោធដ៏ធំធេងនិងភាពជាអ្នកដឹកនាំដ៏វាងវៃរបស់លោក គឺជាកត្តាសត្យានុម័តក្នុងការទទួលបានទំនុកចិត្តពីប្រជាជនអាមេរិក។ ប្រមុខរដ្ឋាភិបាលកម្ពុជា មានជំនឿថា ក្រោមការដឹកនាំរបស់លោក ចូ បៃឌិន អាមេរិក នឹងបន្តរីកចម្រើន និងរួមចំណែកនាំឲ្យពិភពលោកមានស្ថិរភាពនិងវិបុលភាពកាន់តែល្អប្រសើរថែមទៀត។
ជាមួយគ្នានេះ សម្តេចនាយករដ្ឋមន្ត្រី អះអាងថា រដ្ឋាភិបាលនិងប្រជាជនកម្ពុជា តែងផ្តល់សារសំខាន់ដល់ការពង្រឹងទំនាក់ទំនងជាមួយអាមេរិក។ មេដឹកនាំកម្ពុជា សរសេរទៅកាន់ប្រធានាធិតីថ្មីរបស់អាមេរិកដូច្នេះថា៖«រាជរដ្ឋាភិបាលរបស់ខ្ញុំ បានប្តេជ្ញាចិត្តយ៉ាងពេញលេញ ក្នុងការធ្វើការងារជាមួយរដ្ឋបាលរបស់ឯកឧត្តម ដើម្បីជំរុញទំនាក់ទំនងទ្វេភាគីឲ្យកាន់តែល្អប្រសើរបន្ថែមទៀត»។
បន្ថែមពីនេះ មេដឹកនាំកម្ពុជា បានជូនពរឲ្យលោក ចូ បៃឌិន ទទួលបានជោគជ័យក្នុងការបំពេញភារកិច្ចជាប្រវត្តិសាស្ត្រ ក្នុងនាមជាមេដឹកនាំនៃប្រជាជនអាមេរិក។
លោក ចូ បៃឌិន ដែលមានវ័យ៧៧ឆ្នាំហើយនោះ បានឈ្នះឆ្នោតលើលោក ដូណា ត្រាំ ដែលជាប្រធានាធិបតីទី៤៥របស់អាមេរិក។ លោក ចូ បៃឌិន នឹងស្បថចូលកាន់តំណែងប្រធានាធិតី នៅថ្ងៃទី២០ ខែមករា ឆ្នាំ២០២១៕
© រក្សាសិទ្ធិដោយ thmeythmey.com