COVID-19
អន្តរជាតិ
មនុស្សជំនិតលោក បៃឌិន ម្នាក់ ធ្វើតេស្តវិជ្ជមានជំងឺកូវីដ-១៩ លោក Cedric Richmond និយាយជាមួយលោក ចូ បៃឌិន នៅព្រលានយន្តហោះ Columbus ក្នុងរដ្ឋ Georgia កាលពីខែតុលា ។ រូបពី AP
× អនាគតទីប្រឹក្សាជាន់ខ្ពស់ម្នាក់របស់ប្រធានាធិបតីជាប់ឆ្នោត ចូ បៃឌិន លោក Cedric Richmond មានលទ្ធផលតេស្តវិជ្ជមានកូវីដ-១៩ នៅថ្ងៃទី ១៧ ខែធ្នូ ។ នេះបើតាមការប្រកាសរបស់ក្រុមការងារផ្ទេរអំណាចរបស់លោក បៃឌិន ផ្ទាល់។ លោក Richmond បានចូលរួមការឃោសនារកសំឡេងឆ្នោតដែលរៀបចំឡើងដោយលោកបៃឌិន កាលពី២ថ្ងៃមុនផងដែរ ប៉ុន្តែមិនស្ថិតក្នុងចំណោមអ្នកទាក់ទងផ្ទាល់នឹងលោក បៃឌិន ឡើយ។
លោក Richmond ត្រូវបានរកឃើញថា ឆ្លងកូវីដ-១៩ ២ថ្ងៃប៉ុណ្ណោះក្រោយធ្វើដំណើរទៅកាន់ទីក្រុង Atlanta រដ្ឋ Georgia ដើម្បីចូលរួមការឃោសនារកសំឡេងឆ្នោតមួយ ដែលលោក ចូ បៃឌិន ចូលរួមជាមួយបេក្ខជនព្រឹទ្ធសភារបស់បក្សប្រជាធិបតេយ្យ២នាក់ គឺលោក Jon Ossoff និងលោក Raphael Warnock។ អ្នកនាំពាក្យរបស់ក្រុមការងារផ្ទេរអំណាចរបស់លោកបៃឌិន អ្នកស្រី Kate Bedingfield បញ្ជាក់បែបនេះក្នុងសេចក្តីថ្លែងការណ៍ថ្ងៃទី១៧ ខែធ្នូ។
លោក Richmond ជាតំណាងរាស្ត្រនៃរដ្ឋ Louisiana ដែលនឹងលាលែងពីតួនាទីក្នុងសភាអាមេរិកដើម្បីទៅចូលរួមជាមួយអនាគតរដ្ឋបាលលោក បៃឌិន ក្នុងនាមជាទីប្រឹក្សាជាន់ខ្ពស់។ បើតាមអ្នកស្រី Bedingfield លោក Richmond ដែលកើតកូវីដ-១៩ មិនមានការប៉ះពាល់ជិតស្និទ្ធជាមួយលោក បៃឌិន និងបេក្ខជនព្រឹទ្ធសភារដ្ឋ Georgia ទាំងពីរ។ លោក Richmond អាយុ៤៧ឆ្នាំ បានចាប់ផ្ដើមចេញរោគសញ្ញាកាលពីថ្ងៃទី១៦ ខែធ្នូ។
តាមការចុះផ្សាយរបស់ទីភ្នាក់ងារព័ត៌មាន AP អ្នកស្រី Bedingfield បញ្ជាក់ទៀតថា លោកប្រធានាធិបតីជាប់ឆ្នោត បៃឌិន បានធ្វើតេស្តកូវីដ-១៩ នៅថ្ងៃទី១៧ ខែធ្នូ ហើយលទ្ធផលគឺអវិជ្ជមាន។ លោក បៃឌិន បានសម្ងំនៅតែផ្ទះក្នុងស្រុកកំណើតលោក ចាប់តាំងពីការបោះឆ្នោតកាលពីខែមុន ហើយការឃោសនារកសំឡេងនៅរដ្ឋ Georgia គឺជាលើកទី២ហើយចាប់តាំងពីថ្ងៃបោះឆ្នោត ដែលលោកបៃឌិនបានចាកចេញពីផ្ទះនៅរដ្ឋ Delaware ។
សូមបញ្ជាក់ថា លោក Richmond បានជាប់ឆ្នោតក្លាយជាសមាជិកសភាអាមេរិកលើកដំបូងក្នុងឆ្នាំ២០១០ នៅពេលដែលលោក បៃឌិន ជាអនុប្រធានាធិបតីអាណត្តិប្រធានាធិបតី បារ៉ាក់ អូបាម៉ា។ លោក នឹងដើរតួនាទីសំខាន់ក្នុងរដ្ឋបាលលោក បៃឌិន ក្នុងការប្រាស្រ័យទាក់ទងសាធារណៈ ជាពិសេសផ្តោតសំខាន់លើសហគមន៍អាមេរិកស្បែកខ្មៅ និងក្រុមជនជាតិភាគតិចផ្សេងទៀត៕
Tag:
ចូ បៃឌិន
Cedric Richmond
កូវីដ-១៩
© រក្សាសិទ្ធិដោយ thmeythmey.com