COVID-19
អន្តរជាតិ
រូបថត AFP
×![]()
ដោយ: ធៀន ភារិន្ទ
កូរ៉េខាងត្បូង នៅថ្ងៃទី១៨ ខែធ្នូ បានបញ្ជាក់ថា ខ្លួននឹងចុះកុងត្រាទិញវ៉ាក់សាំងប្រឆាំងកូវីដ-១៩ ពីក្រុមហ៊ុនពីរបន្ថែមទៀត មុនដំណាច់ឆ្នាំ២០២០ ។ បន្ថែមពីលើនេះ នៅដើមឆ្នាំ២០២១ រដ្ឋាភិបាលក្រុងសេអ៊ូល នឹងចុះកិច្ចព្រមព្រៀងជាមួយក្រុមហ៊ុនមួយទៀត ដើម្បីបង្គ្រប់ចំនួនដូសដែលត្រូវចាក់លើចំនួនប្រជាជនប្រមាណ៨៨ភាគរយ។
ដើម្បីប្រយុទ្ធប្រឆាំងជាមួយកូរ៉ូណាវីរុស ដែលកំពុងតែរាតត្បាត កូរ៉េខាងត្បូង បានចុះកិច្ចព្រមព្រៀងជាមួយក្រុមហ៊ុន AstraZeneca ដើម្បីទិញវ៉ាក់សាំងប្រឆាំងកូវីដ-១៩ សម្រាប់ប្រជាជន ១០លាននាក់។ មិនត្រឹមតែប៉ុណ្ណោះ កូរ៉េខាងត្បូង បានបរិចាគទឹកប្រាក់ប្រមាណ ៧៧,៦លានដុល្លារ នៅខែតុលា ទៅឲ្យគម្រោង COVAX ដែលស្ថិតក្រោមការគ្រប់គ្រងរបស់អង្គការសុខភាពពិភពលោក (WHO) ថែមទៀត។
ប៉ុន្តែកុងត្រាជាមួយក្រុមហ៊ុន AstraZeneca មិនទាន់គ្រប់គ្រាន់ សម្រាប់គម្រោងរបស់កូរ៉េខាងត្បូង ដែលត្រូវចាក់លើប្រជាជនប្រមាណ ៤៤លាននាក់ ឬ ៨៨ភាគរយ នៃប្រជាជនសរុបឡើយ។ ដើម្បីផ្គត់ផ្គង់វ៉ាក់សាំងឲ្យបានគ្រប់គ្រាន់ រដ្ឋាភិបាលទីក្រុងសេអ៊ូល សម្លឹងឃើញក្រុមហ៊ុនផលិតវ៉ាក់សាំងមួយចំនួនទៀត។
ទីភ្នាក់ងារព័ត៌មានYonhap ផ្សាយថា កូរ៉េខាងត្បូងនឹងចុះកុងត្រាំទិញវ៉ាក់សាំងពីក្រុមហ៊ុន Pfizer និង ក្រុមហ៊ុនឱសថ Janssen ដែលជាផ្នែកមួយរបស់ក្រុមហ៊ុន Johnson & Johnson មុនដំណាច់ឆ្នាំនេះ។ ចំណែកក្រុមហ៊ុន Moderna រដ្ឋាភិបាលកូរ៉េខាងត្បូង នឹងចុះកិច្ចព្រមព្រៀងនៅខែមករា ឆ្នាំ២០២១។
លោក Im In-taek មន្ត្រីទទួលបន្ទុកលើការទិញវ៉ាក់សាំង បាននិយាយនៅក្នុងសន្និសីទសារព័ត៌មានថា រដ្ឋាភិបាល ត្រូវទិញវ៉ាក់សាំងចំនួន ២០លានដូស ពីក្រុមហ៊ុនផលិតវ៉ាក់សាំងនីមួយៗ ដែលមានចំនួន ៣ ក្រុមហ៊ុន ក្នុងនោះមានដូចជា AstraZeneca, Pfizer និងModerna។ ចំណែកវ៉ាក់សាំងរបស់ក្រុមហ៊ុនឱសថ Janssen កូរ៉េខាងត្បូង នឹងទិញចំនួន៤លានដូសប៉ុណ្ណោះ។
បន្ថែមពីលើនេះ កូរ៉េខាងត្បូង មានថវិកាផ្សេងទៀត ប្រមាណ ១,១ពាន់លានដុល្លារ សម្រាប់ទុកទិញវ៉ាក់សាំងផងដែរ។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
វ៉ាក់សាំងរបស់ក្រុមហ៊ុន AstraZeneca អាចមកដល់កូរ៉េខាងត្បូង នៅក្នុងខែកុម្ភៈ ឬខែមីនា ឆ្នាំ២០២១ ខណៈវ៉ាក់សាំងរបស់ក្រុមហ៊ុនផ្សេងទៀត រដ្ឋាភិបាលសេអ៊ូលមិនបានបញ្ជាក់ទេថា នឹងមកដល់ពេលណា ដោយសំអាងថា គឺជារឿងសម្ងាត់។
ក្រុមមនុស្ស ដែលត្រូវចាក់វ៉ាក់សាំងដំបូងគេ នៅកូរ៉េខាងត្បូង មានមនុស្សចាស់ អ្នកថែទាំងមនុស្សចាស់ និងក្រុមគ្រូពេទ្យថែទាំអ្នកជំងឺកូវីដ-១៩ ហើយបន្ទាប់មកទើបប្រជាជននៅក្នុងប្រទេស។
សូមបញ្ជាក់ថា ពេលនេះ ករណីឆ្លងនៅកូរ៉េខាងត្បូង បានកើនឡើងយ៉ាងខ្លាំង ពោលគឺមានករណីឆ្លងលើសពី ១ពាន់ករណី ក្នុងរយៈពេល ៣ថ្ងៃជាប់គ្នា។ តួលេខឆ្លងកូវីដ-១៩ សរុបមានចំនួន ៤៧៥១៥ករណី ខណៈអ្នកស្លាប់មានចំនួន ៦៤៥នាក់។ ចំណែកអ្នកជាសះស្បើយមានចំនួន ៣៣៩៨២នាក់៕
Tag:
កូរ៉េខាងត្បូង
វ៉ាក់សាំង
© រក្សាសិទ្ធិដោយ thmeythmey.com
