COVID-19
ជាតិ
ក្រសួងសុខាភិបាល តម្រូវឲ្យអ្នកការទូត និងមន្ត្រីអង្គការអន្តរជាតិ ធ្វើចត្តាឡីស័ក១៤ថ្ងៃ ពេលមកកម្ពុជា
លោក ម៉ម ប៊ុនហេង រដ្ឋមន្រ្តីក្រសួងសុខាភិបាល។
×![]()
ភ្នំពេញ៖ ក្រសួងសុខាភិបាល នៅព្រឹកថ្ងៃទី ១៩ ធ្នូនេះ បានចេញសេចក្ដីប្រកាសព័ត៌មានស្ដីពី ការកែសម្រួលការអនុវត្តវិធានការសុខាភិបាល និងការធ្វើចត្តាឡីស័ក ចំពោះអ្នកការទូត និងមន្ត្រីអង្គការអន្តរជាតិ ដែលកាន់ទិដ្ឋាការការទូត (Visa A)។ បើតាមក្រសួងសុខាភិបាល អ្នកការទូត និងមន្ត្រីអង្គការអន្តរជាតិ ត្រូវមានវិញ្ញាបនបត្របញ្ជាក់សុខភាព ដោយបញ្ជាក់ថា គ្មានកូវីដ-១៩ មានសុពលភាពរយៈពេល៧២ម៉ោង មុនពេលចេញដំណើរ និងត្រូវធ្វើចត្តាឡីស័ករយៈពេល ១៤ថ្ងៃ ពេញលេញ។
ក្រោយចំណាររបស់នាយករដ្ឋមន្ត្រីកម្ពុជា សម្ដេច ហ៊ុន សែន នៅថ្ងៃទី១៨ ធ្នូកន្លងទៅ ក្រសួងសុខាភិបាល ប្រកាសកែសម្រួលការអនុវត្តវិធានការសុខាភិបាល និងការធ្វើចត្តាឡីស័ក ចំពោះអ្នកការទូត និងមន្ត្រីអង្គការអន្តរជាតិ ដែលកាន់ទិដ្ឋាការការទូត (Visa A)។ សេចក្ដីប្រកាសព័ត៌មានខាងលើ បញ្ជាក់ថា អ្នកការទូត និងមន្ត្រីអង្គការអន្តរជាតិ ដែលកាន់ទិដ្ឋាការការទូត (Visa A) ត្រូវមានវិញ្ញាបនបត្របញ្ជាក់សុខភាព ចេញដោយអាជ្ញាធរសុខាភិបាលទទួលស្គាល់ដោយប្រទេសសាមី បញ្ជាក់ថាគ្មានកូវីដ-១៩ មានសុពលភាពរយៈពេល៧២ម៉ោង មុនពេលចេញដំណើរ។ បន្ថែមលើនេះ នៅពេលមកដល់កម្ពុជា អ្នកទាំងនោះ ត្រូវឆ្លងកាត់ការយកសំណាកទៅធ្វើតេស្តដោយក្រុមគ្រូពេទ្យកម្ពុជា។
ក្រសួងសុខាភិបាល បន្តថា ស្ថានតំណាងបរទេស និងក្រុមការងារអង្គការសហប្រជាជាតិនៅកម្ពុជា ត្រូវធានាលើការត្រួតពិនិត្យឲ្យបានហ្មត់ចត់ ក្នុងការអនុវត្តរបស់អ្នកទទួលបានទិដ្ឋាការការទូតកម្ពូជា (Visa A) ក្នុងការធ្វើចត្តាឡីស័ក១៤ថ្ងៃ ពេញលេញ។ ជាមួយគ្នានេះ ក្នុងការករណីមានអ្នកដំណើរណាម្នាក់ ធ្វើតេសត្តវិជ្ជមានកូវីដ-១៩ ក្រសួង នឹងបញ្ជូនអ្នកវិជ្ជមាននោះ ទៅមន្ទីរពេទ្យតាមការកំណត់របស់ក្រសួង។
ចំពោះការធ្វើចត្តាឡីស័ក១៤ថ្ងៃ ពេញលេញ អាចធ្វើនៅនិវេសនដ្ឋានរបស់ស្ថានទូត ឬគេហដ្ឋានដាច់ដោយឡែក។ សេចក្ដីប្រកាសដដែល បញ្ជាក់ថា ក្នុងការករណីអ្នកការទូតដែលមិនស្នាក់នៅក្នុងនិវេសនដ្ឋានរបស់ស្ថានទូត ឬគេហដ្ឋានដាច់ដោយឡែក ត្រូវធ្វើចត្តាឡីស័កនៅសណ្ឋាគារ Himawari និងស្ថិតក្រោមការត្រួតពិនិត្យរបស់ស្ថានទូត អង្គការអន្តរជាតិសាមី និងមន្ត្រីសុខាភិបាល ដោយការចំណាយជាបន្ទុករបស់សាមីខ្លួន។
បើតាមក្រសួងសុខាភិបាល ក្នុងពេលធ្វើចត្តាឡីស័ក១៤ថ្ងៃ ពេញលេញ មិនអនុញ្ញាតឲ្យជួបភ្ញៀវឡើយ។ ទន្ទឹមនឹងនេះ ការធ្វើដំណើរពីអាកាសយានដ្ឋានទៅនិវេសនដ្ឋានរបស់ស្ថានទូត ឬគេហដ្ឋានដាច់ដោយឡែក ត្រូវប្រើតែមធ្យោបាយដឹកជញ្ជូនរបស់ស្ថានទូត ឬអង្គការអន្តរជាតិប៉ុណ្ណោះ។
សូមបញ្ជាក់ថា គិតត្រឹមថ្ងៃទី១៩ធ្នូ កម្ពុជាមានករណីឆ្លងកូវីដ-១៩ សរុប ៣៦២ករណី ក្នុងនោះសះស្បើយអស់ ៣៤៥នាក់ហើយ។ បច្ចុប្បន្ន មានអ្នកជំងឺ ១៣នាក់កំពុងសម្រាក់ព្យាបាននៅមន្ទីរពេទ្យមិត្តភាពខ្មែរ-សូវៀត ២នាក់ នៅមណ្ឌលសុខភាពចាក់អង្រែ និង២នាក់ ទៀត នៅមជ្ឈមណ្ឌលជាតិប្រយុទ្ធនឹងជំងឺរបេង និងហង់សិន៕
Tag:
សុខាភិបាល
COVID-19
អ្នកការទូត
មន្ត្រីអង្គការអន្តរជាតិ
© រក្សាសិទ្ធិដោយ thmeythmey.com
