អនុរដ្ឋមន្ត្រីឧស្សាហកម្ម និងពាណិជ្ជកម្មវៀតណាម លោក Tran Quoc Khanh តាមរយៈជំនួបតុមូលជាមួយនឹងប្រតិភូសហភាពអឺរ៉ុបប្រចាំវៀតណាម ក្នុងសប្តាហ៍នេះ បានអះអាងថា កិច្ចព្រមព្រៀងពាណិជ្ជកម្មសេរីសហភាពអឺរ៉ុប-វៀតណាម (EVFTA) គឺជាចំណងមួយដ៏ពិសេសនៃទំនាក់ទំនងវៀតណាម និងសហភាពអឺរ៉ុប។ លោកអនុរដ្ឋមន្ត្រី បានវាយតម្លៃខ្ពស់លើកិច្ចព្រមព្រៀងពាណិជ្ជកម្មនេះ។ 

 

តាមការចុះផ្សាយរបស់សារព័ត៌មាន Vietnam News ចំពោះមុខប្រតិភូសហភាពអឺរ៉ុប មន្ត្រីជាន់ខ្ពស់រដ្ឋាភិបាលរូបនេះ បានគូសបញ្ជាក់ថា ក្នុងរយៈពេលបីខែនៃការអនុវត្តកិច្ចព្រមព្រៀងនេះ បានបង្ហាញឲ្យឃើញថា EVFTA ពិតជាបានបើកឱកាសយ៉ាងសន្ធឹកសន្ធាប់សម្រាប់ការអភិវឌ្ឍប្រកបដោយចីរភាពនៃទំនាក់ទំនងពាណិជ្ជកម្មទ្វេភាគី។ 

 

លោក បានឲ្យដឹងថា ខែទីមួយ ក្រោយ EVFTA ចូលធរមាន ការនាំចេញរបស់វៀតណាមទៅសហភាពអឺរ៉ុប បានកើនត្រឹម ៧ ភាគរយ ហើយខែទីពីរ កើនបាន ៩ ភាគរយ និងខែទីបី កើនរហូតដល់ ១៥ ភាគរយ។ ចំណុចនេះ លោកអនុរដ្ឋមន្ត្រី ព្យាករថា ក្នុងរយៈពេលបីខែនេះ កំណើននៃការនាំចេញរបស់វៀតណាមទៅកាន់អឺរ៉ុប បានកើនឡើងជាមធ្យម ១០-១១ ភាគរយ។ 

 

បើតាមក្រសួងផែនការ និងវិនិយោគវៀតណាម EVFTA មិនត្រឹមតែបង្កើនទំហំពាណិជ្ជកម្មវៀតណាម និងសហភាពអឺរ៉ុបប៉ុណ្ណោះនោះទេ តែថែមទាំងបង្កើនការវិនិយោគរបស់សហភាពអឺរ៉ុបនៅក្នុងប្រទេសវៀតណាមទៀតផង។ គ្រាន់តែរយៈពេលបីខែចុងក្រោយនេះ សហភាពអឺរ៉ុប បានទម្លាក់ទុនវិនិយោគតម្លៃប្រមាណជាង ៧០០ លានដុល្លារ៕