ជាតិ
នយោបាយជាតិ
សម្ដេច ស ខេង ៖ ព័ត៌មានពិត មិនមែនទាល់តែគេនិយាយសរសើរនោះទេ
× ភ្នំពេញ៖ មិនមែនទាល់តែគេនិយាយសរសើរ ទើបចាត់ទុកជាព័ត៌មានពិត នោះទេ។ សម្ដេច ស ខេង រដ្ឋមន្ត្រីក្រសួងមហាផ្ទៃ ថ្លែងបែបនេះក្នុងពិធីប្រកាសចូលកាន់មុខតំណែងអភិបាលខេត្តប៉ៃលិន នៅសាលាខេត្តប៉ៃលិន នៅថ្ងៃទី២១ ធ្នូ នេះ។
ថ្លែងចំពោះមុខថ្នាក់ដឹកនាំ និងមន្ត្រីខេត្តប៉ៃលិន សម្ដេច ស ខេង បានក្រើនរំឭកពួកគេឲ្យចេះថ្លឺងថ្លែងនូវព័ត៌មានពិត និងព័ត៌មានប្រឌិត។ សម្ដេច បានសង្កត់ធ្ងន់ថា ការថ្លឹងថ្លែងព័ត៌មានពិត និងព័ត៌មានប្រឌិត គឺតម្រូវឲ្យប្រមូលព័ត៌មានទាំងអស់មកពិចារណា ដោយមិនមែនស្ដាប់តែពាក្យសរសើរ ហើយមិនទទួលយកការរិះគន់នោះទេ។
សូមស្ដាប់ប្រសាសន៍សម្ដេច ស ខេង៖
«សូមកុំភ្លេចថា ព័ត៌មានពិត មិនបានសេចក្តីថា ទាល់តែគេសរសើរយើង បានយើងថា អាហ្នុងជាព័ត៌មានពិត។ ដល់ពេលគេទិតៀន(ចំណុចអវិជ្ជមាន)យើង ដែលត្រឹមត្រូវ ដែលពិតនោះ តែយើងថា (ជារឿង)មិនពិត អាហ្នឹងក៏យើងខុសដែរ»។ នេះជាលើកឡើងរបស់សម្ដេច ស ខេង ដែលបានបន្ថែមថា ថ្នាក់ដឹកនាំ និងអាជ្ញាធរខេត្តទាំងអស់ ត្រូវទទួលយកទាំងការសរសើរ និងការរិះគន់របស់ប្រជាពលរដ្ឋ ។ ជាពិសេសអាជ្ញាធរ ត្រូវចេះអប់រំ និងបកស្រាយឲ្យទាន់ពេលវេលា ដើម្បីទប់ស្កាត់ព័ត៌មានក្លែងក្លាយ និងចលនាបំផុសញុះញង់នៅតាមមូលដ្ឋានខ្លួន។
រដ្ឋមន្ត្រីក្រសួងមហាផ្ទៃ ក៏ហាមអាជ្ញាធរ មិនឲ្យប្រើប្រាស់ហិង្សា យកធ្វើជាមធ្យោបាយដោះស្រាយបញ្ហាជាមួយពលរដ្ឋនោះទេ ពោលគឺត្រូវយកគោលការណ៍ច្បាប់ ទៅអនុវត្តជាធំ។
ថ្លែងបែបនេះហើយ សម្ដេច ស ខេង អះអាងថា គោលការណ៍រដ្ឋាភិបាល ទទួលយកទាំងការរិះគន់ និងការសរសើរទាំងអស់ ឲ្យតែពាក្យសម្ដីទាំងនោះ ជាព័ត៌មានពិត ដោយមិនមានបំណងញុះញង់ និងបំផ្លាញសន្តិសុខ សណ្ដាប់ធ្នាប់សាធារណៈ។
កាលពីពេលថ្មីនេះ អង្គការសម្ព័ន្ធខ្មែរជំរឿន និងការពារសិទ្ធិមនុស្ស ហៅកាត់ថា លីកាដូ បានចេញរបាយការណ៍មួយថា គណបក្សកាន់អំណាច បានប្រើប្រាស់រដ្ឋសភានិងព្រឹទ្ធសភា ដើម្បីអនុម័តឬរៀបចំច្បាប់ជាច្រើន ផ្ដល់អំណាចស្ទើរតែគ្មានដែនកំណត់ទៅរដ្ឋាភិបាល។ លើសពីនេះ ក៏មានការចាប់និងឃុំខ្លួន អ្នកដែលហ៊ានក្រោកឈរតស៊ូមតិ ដើម្បីសិទ្ធិសេរីភាពទៀតផង។
របាយការណ៍៣ឆ្នាំចុងក្រោយនេះ អង្គការលីកាដូ សង្កេតឃើញអាជ្ញាធរធ្វើទុក្ខបុកម្នេញលើអ្នកការពារសិទ្ធិមនុស្ស ,តុលាការរំលាយគណបក្សប្រឆាំង និងរឹតត្បិតសេរីភាពសកម្មជនកាន់តែខ្លាំង។ ជាពិសេស នៅអំឡុងពេល៦ខែចុងក្រោយនេះ ការបង្ក្រាបសកម្មជនដែលក្រោកឈរតស៊ូមតិជាមួយរដ្ឋាភិបាល កើនឡើងគួរឲ្យកត់សម្គាល់។
របាយការណ៍ ក៏បានលើកពីករណីចាប់ខ្លួនលោក រ៉ុង ឈុន ប្រធានសហភាពសហជីពកម្ពុជា កាលពីចុងខែកក្កដាកន្លមក ក្រោយពីលោកបានរិះគន់លើបញ្ហាព្រំដែនកម្ពុជា-វៀតណាម នៅខេត្តត្បូងឃ្មុំ។ ក្រៅពីនេះអាជ្ញាធរ ក៏បានចាប់ខ្លួនសកម្មជនការពារសិទ្ធិមនុស្សជាង១០នាក់ទៀត ដែលបានចេញមុខតវ៉ាទាមទាររកយុត្តិធម៌ឲ្យលោក រ៉ុង ឈុន ដែរ។ ពួកគេត្រូវបានបញ្ជូនទៅឃុំខ្លួនបណ្ដោះអាសន្ននៅពន្ធនាគារ។
តែយ៉ាងណាលោក ជិន ម៉ាលីន អ្នកនាំពាក្យក្រសួងយុត្តិធម៌ និងអនុប្រធានគណៈកម្មាធិការសិទ្ធិមនុស្សកម្ពុជា បានអះអាងថា ការអនុវត្តច្បាប់របស់រដ្ឋាភិបាល គឺជារឿងត្រឹមត្រូវ។ លោកថា អាជ្ញាធរអនុវត្តវិធានការលើអ្នកប្រព្រឹត្តខុសច្បាប់ ដោយមិនប្រកាន់និន្នាការឡើយ។«ការឃាត់ខ្លួន ការចោទប្រកាន់(សកម្មជនសិទ្ធិមនុស្ស) មិនមែនដោយសារពួកគាត់ធ្វើសកម្មភាពការពារសិទ្ធិមនុស្សទេ គឺដោយការធ្វើបំពានច្បាប់ មានមូលដ្ឋាន បង្កើតទៅជាបទល្មើស»។ នេះជាការអះអាងរបស់អ្នកនាំពាក្យក្រសួងយុត្តិធម៌៕
© រក្សាសិទ្ធិដោយ thmeythmey.com